ᐃᖃᓗᐃᑦ, ᓄᓇᕗᑦ, - ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓕᐅᓇ ᐊᒡᓘᒃᑲᖅ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦᑕ ᓯᕗᓕᖅᑎᖓᑦ ᐄᕙ ᐋᕆᐊᒃ, ᑐᓴᖅᑎᑎᖃᐅᕗᑦ ᐅᓪᓗᒥ ᑕᒪᒃᑯᐊ ᓄᓇᓖᑦ ᓄᓇᕗᒥ ᐸᕐᓇᑦᓯᐊᕈᓐᓇᕐᓂᖅᓴᐅᓂᐊᓕᖅᐳᑦ ᐱᖁᑎᕐᔪᐊᖅᑖᕐᓂᕐᒧᑦ ᑮᓇᐅᔭᖅᑖᖅᑎᑕᐅᒃᑲᓐᓂᕐᓂᐊᕐᒪᑕ $60-ᒥᓕᔭᓐᑖᓚᓂᒃ ᑲᓇᑕᐅᑉ ᒐᕙᒪᒃᑯᖏᑦᑕ ᒑᓯᓄᑦ ᑖᒃᓯᔭᐃᔭᕈᑎᑦ ᑮᓇᐅᔭᖁᑎᖏᓐᓂᑦ ᐊᑯᓐᓂᖓᓂ 2010 ᐊᒻᒪ 2014.

"ᑖᓐᓇ ᓄᑖᖅ ᒑᓯᓄᑦ ᑖᒃᓯᔭᐃᔭᕈᑎᓄᑦ ᑮᓇᐅᔭᑦ ᐱᔪᓐᓇᖅᑎᑎᓂᐊᖅᐳᑦ ᓄᓇᕗᒥᐅᓂᒃ ᓄᓇᓕᖕᓂᒃ ᑮᓇᐅᔭᖃᖅᑎᑕᐅᔪᓐᓇᖁᓪᓗᒋᑦ ᐱᖁᑎᕐᔪᐊᓕᐅᖅᑕᐅᔪᑦ," ᐅᖃᓚᐅᖅᐳᖅ ᒥᓂᔅᑕ ᐊᒡᓘᒃᑲᖅ. "ᑲᓇᑕ ᐱᕈᖅᐸᓪᓕᐊᒋᐊᖃᕐᓂᖓ ᑮᓇᐅᔭᑎᒍᑦ ᐱᓕᕆᐊᕆᔭᐅᕗᖅ ᒐᕙᒪᒃᑯᓐᓄᑦ. ᑕᐃᒪᓐᓇ ᐱᖁᑎᕐᔪᐊᓕᐅᕐᓂᐊᕐᓂᕋᕐᓗᑕ ᑮᓇᐅᔭᖃᖅᑎᑎᓗᑕᓗ, ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᑐᐃᖕᒪᑕ ᐃᖅᑲᓇᐃᔭᒐᒃᓴᓕᐅᖅᑎᑎᓪᓗᑎᒃ ᓴᓐᖏᓂᖅᓴᐅᓕᖁᓪᓗᒍᓗ ᑮᓇᐅᔭᓕᐅᕐᓂᖅ ᐅᑭᐅᖅᑕᖅᑐᒥ, ᑕᐃᒪᓐᓇ ᓄᓇᓖᑦ ᐱᓕᕆᒍᑎᓕᐅᕐᓗᒋᑦ."

ᓄᓇᕗᒥ, ᒑᓯᑖᕈᑎᓄᑦ ᑖᒃᓯᔭᐃᔭᕈᑎᑦ ᑮᓇᐅᔭᑦ ᐃᑲᔪᖅᑐᐃᕗᑦ ᐊᕙᑎᒥᐅᑕᓂᒃ ᑲᒪᑦᓯᐊᕋᓱᐊᖅᖢᑎᒃ ᐱᖁᑎᕐᔪᐊᓕᐅᕐᓂᕐᒥᒃ, ᓲᕐᓗ ᓴᓇᒍᑎᒃ ᐃᒪᕐᒥ, ᖁᕐᕕᒃᑕᕐᕕᖕᓂᒃ ᐊᒃᑕᕐᕕᖕᓂᒡᓗ. ᑮᓇᐅᔭᑦ ᐊᑐᐃᓐᓇᐅᑎᑕᐅᕗᓪᓗ ᓄᓇᓕᖕᓄᑦ ᑕᐃᒪᓐᓇ ᐊᑯᓂ ᐊᐅᓚᔪᓐᓇᐅᑎᖃᖁᓪᓗᒋᑦ. 2005-ᒥᑦ 2014-ᒧᑦ, ᓄᓇᕗᑦ ᓄᓇᓕᖏᑦ ᑮᓇᐅᔭᖅᑖᖅᑎᑕᐅᓂᐊᖅᐳᑦ $97.15 ᒥᓕᔭᓐᑖᓚᓂᒃ ᑖᒃᑯᑎᒎᓇ. ᒑᓯᓄᑦ ᑖᒃᓯᔭᐃᔭᕈᑎᑦ ᑮᓇᐅᔭᑦ ᐊᑐᖅᑕᐅᖏᓐᓇᐅᔭᓕᕐᓗᓂ 2014-ᒥ.

"ᑕᒪᕐᒥᒃ ᓄᓇᕗᒥᐅᑦ ᐊᑐᕆᐊᖃᖅᑕᖏᓐᓂᒃ ᐊᑐᐃᓐᓇᖃᖅᑎᑕᐅᑦᓯᐊᕆᐊᖃᖅᐳᑦ," ᐅᖃᓚᐅᖅᐳᖅ ᓯᕗᓕᖅᑎ ᐋᕆᐊᒃ.
"ᐅᓪᓗᒥ ᑐᓴᖅᑎᑎᒍᑕᐅᔪᖅ ᐱᑕᖃᕈᑕᐅᓂᐊᖅᐳᑦ ᐅᓗᕆᐊᓇᖏᑦᑐᒥ ᐃᒪᖃᖁᓪᓗᑕ, ᐊᒃᑕᖅᑕᐅᕙᓪᓕᐊᔪᓪᓗ ᐱᔾᔪᑎᒋᓪᓗᒋᑦ ᐱᓕᕆᒍᑎᖃᑦᓯᐊᕈᓐᓇᖁᓪᓗᑕ, ᓄᓇᓕᖕᓂᓗ ᐃᖅᑲᓇᐃᔭᖅᐸᓪᓕᐊᑎᑕᐅᖁᓪᓗᒋᑦ ᐊᒻᒪᓗ ᐸᐸᑦᓯᓗᑎᒃ ᐊᕙᑎᒥᐅᑕᒥᖕᓂᒃ ᑲᒪᑦᓯᐊᕐᓗᑎᒃ."

ᐊᒻᒪᓗ ᑕᒪᒃᑯᐊ ᐊᑐᖅᑕᐅᓂᐊᕐᓂᖏᑦ ᒑᓯᓄᑦ ᑖᒃᓯᔭᐃᔭᕈᑎᑦ ᑮᓇᐅᔭᑦ ᐅᐃᒍᒋᐊᖅᑕᐅᓂᐊᖅᑎᓪᓗᒋᑦ ᐊᕐᕌᒍᓄᑦ ᓯᑕᒪᓄᑦ, ᑲᓇᑕᐅᑉ ᒐᕙᒪᒃᑯᑦ ᒪᕐᕈᐃᖅᑕᖅᑎᑎᕗᑦ ᐊᕐᕌᒍᑕᒫᖅᓯᐅᑎᓂᒃ ᑮᓇᐅᔭᓂᒃ ᓄᓇᕗᒧᑦ ᑖᒃᑯᑎᒎᓇᖅ ᐊᑐᐃᓐᓇᐅᑎᑎᓪᓗᑎᒡᓗ ᑮᓇᐅᔭᓂᒃ ᓄᓇᓕᖕᓄᑦ, ᐄᐳᕈ ᐊᑐᓕᓵᖅᑎᓪᓗᒍ, ᐱᖓᓱᓂᒃ ᑕᖅᑭᓂᒃ ᓯᕗᕙᓯᒃᖢᑎᒃ. ᑐᑭᖃᖅᐳᖅ ᑖᒃᑯᐊ ᑮᓇᐅᔭᑦ ᐅᓄᖅᓯᒋᐊᖅᑕᐅᖕᒪᑕ ᓄᓇᕗᒥ $7.5-ᒥᓕᔭᓐᑖᓚᓂᑦ $15-ᒥᓕᔭᓐᑖᓚᓄᑦ ᐊᕐᕌᒍᒧᑦ.

"ᒑᓯᓄᑦ ᑖᒃᓯᔭᐃᔭᕈᑎᑦ ᑮᓇᐅᔭᑦ ᐃᑲᔪᕈᑕᐅᓯᒪᕗᑦ ᓄᓇᕗᑦ ᒐᕙᒪᒃᑯᖏᓐᓂᒃ ᑕᒪᒃᑯᐊ ᓄᑖᖑᖅᑎᑕᐅᒋᐊᖃᓪᓚᕆᒃᑐᑦ ᓴᓇᔭᐅᓂᖏᓐᓄᑦ ᓄᓇᓕᖕᓂ ᐃᒪᖃᐅᑎᑦ ᖁᕐᕕᒃᑕᐅᑎᓪᓗ ᓄᓇᕗᓕᒫᒥ," ᐅᖃᓚᐅᖅᐳᖅ ᒥᓂᔅᑕ ᓗᐊᓐ ᑯᓱᒐᖅ, ᒥᓂᔅᑕ ᓄᓇᓕᖕᓂ ᒐᕙᒪᓕᕆᔨᒃᑯᓐᓄᑦ ᐱᔨᑦᓯᕋᖅᑎᒃᑯᓐᓄᓪᓗ. "ᑮᓇᐅᔭᖅᑖᖅᑎᑕᐅᒍᒪᖃᑦᑕᖅᓯᒪᐃᓐᓇᕋᑦᑕ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᒥᐅᑕᐅᔪᒍᑦ ᑐᒃᓯᕋᐅᑎᖃᖅᓯᒪᖃᑦᑕᖅᖢᑕ ᑮᓇᐅᔭᖅᑖᕆᐊᖃᕐᓂᑦᑎᓐᓄᑦ ᐃᓄᒋᐊᖕᓂᑦᑎᓐᓅᖏᑦᑐᖅ ᑕᐃᒪᓐᓇ ᑮᓇᐅᔭᖅᑖᖅᑎᑕᐅᕙᓪᓕᐊᓕᖅᐳᒍᑦ ᒑᓯᓄᑦ ᑖᒃᓯᔭᐃᔭᕈᑕᐅᓚᐅᖅᑐᓂᑦ ᑮᓇᐅᔭᓂᒃ."

ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᓕᐅᖅᑎᑎᕙᓪᓕᐊᓂᕐᒧᑦ ᐸᕐᓇᒃᓯᒪᒍᑎᖏᑦ ᐱᕙᓪᓕᐊᓂᖃᓪᓚᕆᒃᐳᖅ ᐊᖏᒡᓕᕙᓪᓕᐊᓪᓗᓂᓗ ᑲᓇᑕᐅᑉ ᒐᕙᒪᒃᑯᖏᓐᓂᖔᕐᓂᐊᖅᑐᑦ $33-ᐱᓕᔭᓐᑖᓚᓄᑦ ᐱᖁᑎᕐᔪᐊᓕᐅᕐᓂᕐᒧᑦ, ᑕᒪᒃᑯᐊ ᐃᓚᐅᑎᑕᐅᓪᓗᑎ ᒑᓯᓄᑦ ᑖᒃᓰᔭᐃᔭᕈᑕᐅᓚᐅᖅᑐᓂᒃ ᑮᓇᐅᔭᑦ, $12-ᐱᓕᔭᒃᑲᓐᓂᕐᓂᒃ ᓄᑖᓄᑦ ᐱᖁᑎᕐᔪᐊᓕᐅᕈᑎᒃᓴᐃᑦ ᐊᕐᕌᒍᓂ ᒪᕐᕉᓂᐊᖅᑐᓂ. ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᖃᑦᓯᐊᖅᐳᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᑕᒪᒃᑯᐊ ᐱᖁᑎᕐᔪᐊᓄᑦ ᑮᓇᐅᔭᑦ ᐊᑐᖅᑐᒃᓴᐃᑦ ᓯᕗᓪᓕᖅᐸᐅᑎᑕᐅᒋᐊᖃᖅᑐᓄᑦ ᓴᓇᔭᐅᒋᐊᖃᖅᑐᓄᑦ ᐊᑐᖅᑕᐅᒐᓗᐊᕐᒪᖔᑕ ᓄᓇᓕᖕᓂ.

ᑐᑭᓯᒋᐊᒃᑲᓐᓂᕈᒪᔪᑦ ᑲᓇᑕᐅᑉ ᐊᒻᒪ ᓄᓇᓖᑦ ᐊᕕᒃᑐᖅᓯᒪᐅᖅᑐᑦ ᖃᓪᓗᓈᑦ ᓄᓇᖓᓐᓂᓗ ᒑᓯᓄᑦ ᑖᒃᓯᐃᔭᕈᑎᓄᑦ ᐊᑐᖅᑕᐅᓂᐊᖅᑐᑦ ᐱᔾᔪᑎᒋᓪᓗᒋᑦ ᖃᕆᑕᐅᔭᒃᑯᑦ ᖃᐅᔨᒋᐊᒃᑲᓐᓂᕈᓐᓇᖅᐳᑦ ᐅᕙᖓᑦ  www.buildingcanada.gc.ca, www.infrastructure.gc.ca or cgs.gov.nu.ca.