April 23, 2009

ᐊᑐᕚ - ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᐳᑦ ᑐᑭᓯᒋᐊᕈᑎᒃᓴᑎᒍᑦ ᖃᐅᔨᕚᓪᓕᕈᑎᒃᓴᑎᒍᓪᓗ ᑲᓇᑕᒥᐅᑦ ᖃᐅᔨᕙᓪᓕᐊᔪᓐᓇᖁᓪᓗᒋᑦ ᓴᐳᔾᔨᓇᓱᐊᕐᓂᕐᒧᑦ, ᖃᐅᔨᓂᕐᒧᓪᓗ ᑲᒪᒋᔭᖃᕐᓂᕐᒧᓪᓗ ᐊᓂᖅᓵᖅᑐᕐᓂᕐᑯᑦ ᐳᕙᒃᑯᓪᓗ ᐋᓐᓂᐊᖅᑖᕆᔭᐅᕙᒃᑐᓂᒃ, ᑖᓐᓇ ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᓕᐅᓇ ᐊᒡᓘᒃᑲᖅ ᐅᖃᓚᐅᖅᐳᖅ ᐅᓪᓗᒥ. ᑖᓐᓇ ᑐᓴᖅᑎᑎᒍᑕᐅᔪᖅ ᑕᐃᒪᓐᓇ ᐱᒋᐊᖅᑕᐅᓯᒪᕗᖅ ᑐᓴᖅᑎᑎᓚᐅᖅᑎᓪᓗᒋᑦ ᑕᐃᒪᓐᓇᐃᓕᐅᕐᓂᐊᕐᓂᕐᒧᑦ ᒐᕙᒪᒃᑯᑦ ᓄᕕᐱᕆ 2008-ᒥ ᐅᖃᐅᓯᕆᔭᐅᓂᑯᑎᒍᑦ ᐅᖃᐅᓯᖓᐅᑎᑎᒍᑦ ᒐᕙᒪᒃᑯᑦ ᑲᑎᒪᕐᔪᐊᕆᐊᓕᖅᑎᓪᓗᒋᑦ.

"ᐊᓂᖅᓵᖅᑐᕐᓂᒃᑯᑦ ᐋᓐᓂᐊᖅᑖᕆᔭᐅᕙᒃᑐᑦ ᐋᓐᓂᐊᓕᕈᑕᐅᕙᒃᐳᑦ ᐊᒥᓱᓄᑦ ᒥᓕᔭᓃᑦᑐᓄᑦ ᑲᓇᑕᒥᐅᓄᑦ ᑲᑉᐱᐊᓱᒍᑕᐅᕙᒃᖢᑎᒡᓗ ᐊᒻᒪᓗ ᐅᖁᒪᐃᒃᓴᕈᑕᐅᕙᒃᖢᑎᒡᓗ ᑮᓇᐅᔭᓕᐅᕈᑎᑦᑎᓐᓄᑦ ᐋᓐᓂᐊᖅᑐᓕᕆᒍᑕᐅᕙᒃᑐᓄᓪᓗ ᑲᓇᑕᒥ," ᐅᖃᓚᐅᖅᐳᖅ ᒥᓂᔅᑕ ᐊᒡᓘᒃᑲᖅ. "ᖃᐅᔨᕚᓪᓕᖅᑎᑎᓗᑕ ᑲᓇᑕᒥᐅᑕᐅᔪᓂᒃ ᖃᓄᖅ ᓴᐳᔾᔨᔪᓐᓇᕐᓂᖏᓐᓄᑦ ᐳᕙᒃᑯᑦ ᐋᓐᓂᐊᖅᑖᕐᓂᕐᒧᑦ ᑲᒪᑦᓯᐊᕈᓐᓇᖁᓪᓗᒋᑦ ᐊᑲᐅᓂᖅᓴᐅᓇᔭᕐᓂᖓᓄᑦ."

ᑲᓇᑕᑉ ᒐᕙᒪᒃᑯᖏᑦᑕ ᑮᓇᐅᔭᖁᑎᖏᑦ $10-ᒥᓕᔭᓐᑖᓚᐃᑦ ᐅᖓᑖᓄᑦ ᑮᓇᐅᔭᑦ ᐊᑐᖅᑕᐅᓂᐊᖅᐳᑦ ᐊᕐᕌᒍᓂ ᐱᖓᓱᓂ ᑕᐃᒪᓐᓇ ᐳᕙᒃᑯᑦ ᐋᓐᓂᐊᖅᑖᕈᑕᐅᕙᒃᑐᓂᒃ ᑐᑭᓯᒋᐊᕈᑎᒃᓴᖃᕐᓗᑎᒃ ᑲᓇᑕᒥᐅᑕᐃᑦ ᐃᒪᓐᓇ:

• ᑲᓇᑕᒥ ᖃᐅᔨᒪᓂᖅᓴᐅᖁᓪᓗᒋᑦ ᓴᐳᔾᔭᐅᒋᐊᖃᕐᓂᖏᓐᓄᑦ, ᖃᐅᔨᑲᐅᑎᒋᖃᑦᑕᕈᓐᓇᕐᓂᖏᓐᓄᓪᓗ ᐱᓕᕆᐊᖃᕈᓐᓇᕐᓂᕐᒧᓪᓗ ᐳᕙᒃᑯᑦ ᐋᓐᓂᐊᖅᑖᕆᔭᐅᕙᒃᑐᓂᒃ  ᑭᒃᑯᑐᐃᓐᓇᐃᑦ ᖃᐅᔨᕚᓪᓕᖅᑎᑎᒍᑎᖃᖅᑎᑕᐅᓗᑎᒃ ᖃᓄᑐᐃᓐᓇᖅ, ᑕᒪᒃᑯᐊᓗ ᐅᓗᕆᐊᓇᕐᓂᖅᓴᐃᑦ ᓱᕈᓯᑦ ᐊᓯᖏᓪᓗ
• ᐋᓐᓂᐊᓕᖅᓴᕋᐃᑦᑐᑦ ᒦᑦᑕᐃᓕᖁᓪᓗᒋᑦ;
• ᐋᖅᑭᒃᓱᐃᓂᖅ ᐃᑲᔪᕈᑎᒃᓴᖏᓐᓂᒃ ᐋᓐᓂᐊᓕᖅᐸᒃᑐᑦ, ᖃᑕᖑᑎᒌᓪᓗ ᐋᓐᓂᐊᖅᑐᓕᕆᔨᓪᓗ ᓴᐳᔾᔨᑦᓯᐊᖁᓪᓗᒋᑦ ᐊᐅᓚᑦᓯᓯᑦᓯᐊᖁᓪᓗᒋᓪᓗ ᐳᕙᒃᑯᑦ ᐊᓂᖅᓵᖅᑐᕐᓂᒃᑯᑦ ᐋᓐᓂᐊᖅᑖᕆᔭᐅᕙᒃᑐᓂᒃ;
• ᖃᐅᔨᒪᒍᑕᐅᓇᔭᖅᑐᓂᒃ ᐋᖅᑭᒃᓱᐃᓂᖅ ᑐᓴᖅᑎᑎᒍᑎᖃᕐᓂᖅ ᑲᓇᑕᒥᐅᑕᐃᑦ ᑐᑭᓯᐅᒪᒍᑎᒃᓴᖏᓐᓂᒃ ᐳᕙᒃᑯᑦ ᐊᓂᖅᓵᖅᑐᕐᓂᒃᑯᓪᓗ ᐋᓐᓂᐊᖅᑖᕆᔭᐅᕙᒃᑐᓂᒃ; ᐊᒻᒪ
• ᖃᐅᔨᓴᕐᓂᖅ ᑐᓴᖅᑎᑎᒍᑎᖃᕐᓂᕐᓗ ᐅᓗᕆᐊᓇᕐᓂᖏᓐᓄᑦ ᐳᕙᒃᑯᑦ ᐋᓐᓂᐊᖅᑖᕆᔭᐅᕙᒃᑐᑦ ᐊᓂᖅᓵᖅᑐᕈᑎᑦ ᓯᓚᒥ ᖃᐅᔨᒪᔭᐅᑦᓯᐊᖁᓪᓗᒋᑦ ᓴᓗᒪᒐᓗᐊᕐᒪᖔᑕ ᐃᖅᑭᓖᑦ ᓄᓇᖏᓐᓂ ᐃᓄᐃᑦ ᓄᓇᖏᓐᓂᓗ.

   
ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᑐᐃᓯᒪᕗᑦ ᑲᓇᑕᒥ ᐳᕙᒃᑯᑦ ᐋᓐᓂᐊᖅᑖᕈᑕᐅᕙᒃᑐᑦ ᑲᑐᔾᔨᖃᑎᒌᒃᑯᖏᑦ ᑕᐃᒪᖓᓂᑦ 2006-ᒥᑦ ᐋᖅᑭᒃᓱᐃᓪᓗᑎᒃ ᑲᓇᑕᒥ ᐳᕙᒃᑯᑦ ᐋᓐᓂᐊᖅᑖᕈᑕᐅᕙᒃᑐᑦ ᐋᓐᓂᐊᖅᑐᓕᕆᓂᕐᒧᑦ ᐱᓕᕆᐊᖃᖅᓯᒪᕗᑦ, ᑮᓇᐅᔭᓂᒃ ᐊᑐᖅᓯᒪᓪᓗᑎᒡᓗ $2-ᒥᓕᔭᓐᑖᓚᓂᒃ ᐃᑲᔪᕈᑎᒃᓴᓂᒃ ᖃᓄᐃᓕᐅᕆᐊᕈᑎᒃᓴᓂᒡᓗ.

ᑖᓐᓇ ᐱᓕᕆᐊᕆᓯᒪᔭᖓᑦ ᐱᒋᐊᖅᑕᐅᓚᐅᖅᐳᖅ ᑲᑐᔾᔨᖃᑎᒌᒃᑯᓐᓄᑦ ᔫᓐ 2008-ᒥ ᓇᓗᓇᐃᔭᖅᓯᒪᓪᓗᓂᓗ ᖃᐅᔨᕚᓪᓕᕈᑎᒃᓴᓂᒃ ᐱᑕᖃᖏᑦᑐᓂᒃ ᖃᐅᔨᔭᐅᒋᐊᖃᖅᑐᓂᒃ ᑐᑭᓯᐅᒪᑦᓯᐊᕈᑎᒃᓴᓂᒡᓗ ᐳᕙᒃᑯᑦ ᐋᓐᓂᐊᖅᑖᕈᑕᐅᕙᒃᑐᓂᒃ ᐃᓄᐃᑦ ᑲᓇᑕᒥᐅᑕᐃᑦ ᑕᐃᒪᓐᓇ ᐋᓐᓂᐊᖅᑖᖅᑕᐃᓕᒪᖁᓪᓗᒋᑦ ᖃᓄᐃᓕᐅᕆᐊᖃᕐᓂᖏᓐᓄᓪᓗ ᑕᐃᒪᓐᓇ ᐋᓐᓂᐊᖅᑖᕌᖓᒥᒃ.

"ᐅᓪᓗᒥ ᑮᓇᐅᔭᖅᑖᕐᓂᖅ ᑕᒪᑯᓄᖓ ᑐᑭᖃᖅᐳᖅ ᐳᕙᒃᑯᑦ ᐋᓐᓂᐊᖅᑖᕈᑕᐅᕙᒃᑐᑦ ᐱᔾᔪᑎᒋᓪᓗᒋᑦ ᖃᓄᐃᓕᐅᕈᑎᖃᑲᐅᑎᒋᔪᓐᓇᖅᐳᒍᑦ ᐳᕙᒃᑯᑦ ᐋᓐᓂᐊᖅᑖᖅᑐᓂᒃ - ᐸᕐᓇᐅᑕᐅᓯᒪᔪᑦ ᐊᑐᖅᑕᐅᔪᓐᓇᖅᖢᑎᒃ ᐃᖢᐊᖅᓴᖅᑕᐅᒋᐊᖃᕐᓂᖏᓐᓄᑦ, ᐅᑕᕿᑎᑕᐅᑯᑖᖃᑦᑕᕆᐊᖃᖏᓐᓂᖏᓐᓄᓪᓗ ᑲᒪᒋᔭᐅᓂᐊᕐᓗᑎᒃ ᐋᓐᓂᐊᕐᕕᖕᒧᐊᕆᐊᖃᕈᑎᒡᓗ ᐋᓐᓂᐊᕐᕕᖕᒧᐊᖅᑎᑕᐅᑲᐅᑎᒋᖃᑦᑕᖁᓪᓗᒋᑦ ᐊᒻᒪ ᑮᓇᐅᔭᖅᑐᕈᑕᐅᖏᓐᓂᖅᓴᐅᔪᓐᓇᖁᓪᓗᒋᑦ ᖃᐅᔨᔭᐅᑲᐅᑎᒋᓗᑎᒃ ᐃᖢᐊᖅᓴᖅᑕᐅᑲᐅᑎᒋᓗᑎᒡᓗ," ᐅᖃᓚᐅᖅᐳᖅ ᓄᐊᕋ ᓱᐳᓚᕝ, ᐊᖓᔪᖃᕆᔭᐅᔪᖅ ᑐᑭᒧᐊᒃᑎᑎᔨᐅᔪᕐᓗ ᐳᕙᒃᑯᑦ ᐋᓐᓂᐊᖅᑖᕐᓂᕐᒧᑦ ᑲᑐᔾᔨᖃᑎᒌᒃᑯᖏᓐᓂ ᐊᒻᒪ ᐃᒃᓯᕙᐅᑕᕆᔭᐅᔪᖅ  ᑲᓇᑕᒥ ᐳᕙᒃᑐᑦ ᐋᓐᓂᐊᖅᑖᖅᐸᒃᑐᑦ ᐱᓕᕆᔨᖏᓐᓂ ᑲᑎᒪᔨᕋᓛᖏᓐᓂ. "ᓱᕈᓯᖃᕈᕕᑦ ᐳᕙᒃᑯᑦ ᐋᓐᓂᐊᖃᖅᑐᒥᒃ ᐊᓂᕐᓂᖃᑦᓯᐊᕈᓐᓇᖏᑦᑐᒥᒃ ᑕᖃᒑᖓᒥ, ᑕᐃᒪᓐᓇ ᐳᕙᒃᑯᑦ ᐋᓐᓂᐊᓕᖅᓴᕋᐃᑦᑐᖁᑎᖃᕈᕕᓪᓗ ᑭᓇᑐᐃᓐᓇᕐᒥᒃ ᐃᒡᓗᒥᐅᑕᖃᑎᒋᓗᒍ ᐅᕙᓘᓐᓃᑦ ᐊᓂᖅᓵᖅᑐᑦᓯᐊᕈᓐᓇᖏᑦᑐᖃᕈᕕᑦ ᖃᑕᖑᑎᖕᓂᒃ ᐳᔪᖅᑕᖃᓗᐊᓕᕌᖓᑦ ᓄᓇᑦᓯᖕᓂ, ᑲᓇᑕᒥ ᐳᕙᒃᑯᑦ ᐋᓐᓂᐊᖅᑖᖅᐸᒃᑐᑦ ᐱᓕᕆᕕᖓᑦ ᐊᑐᖅᑕᐅᔪᓐᓇᖅᐳᑦ ᑕᐃᒪᓐᓇ ᐊᓂᖅᓵᖅᑐᑦᓯᐊᒃᑲᓐᓂᕈᑎᒃᓴᑎᒍᑦ."

ᑕᐃᒪ 6 ᒥᓕᔭᐃᑦ ᐃᓄᐃᑦ ᑲᓇᑕᒥᐅᑦ ᐊᓂᖅᓵᖅᑐᕐᓂᕐᒧᑦ ᐋᓐᓂᐊᖃᕐᒪᑕ ᓲᕐᓗ ᑕᖃᓗᑎᒃ ᐊᓂᖅᓵᖅᑐᓯᐊᕈᓐᓃᕈᓐᓇᕐᓂᕐᒥᒃ, ᐳᕙᒃᑯᑦ ᑳᓐᓱᖃᖅᖢᑎᒡᓗ, ᐳᕙᒡᓗᒃᖢᑎᒡᓗ, ᐱᕈᖅᑐᖃᖅᓯᒪᓪᓗᑎᒡᓗ ᐳᕙᒃᑯᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᑐᖅᐸᒃᖢᑎᒡᓗ ᑕᒪᒃᑯᓄᖓ ᑮᓇᐅᔭᓂᒃ $12-ᐱᓕᔭᓐᑖᓚᓂᒃ ᐋᓐᓂᐊᖅᑐᓕᕆᔭᐅᓂᖏᓐᓄᑦ - 2000ᖑᓚᐅᖅᑐᒥ ᐊᕐᕌᒍᒥ. ᐳᕙᒃᑯᑦ ᐋᓐᓂᐊᖃᕐᓂᖅ ᐱᖓᔪᒋᔭᐅᓪᓗᓂ ᐊᖏᓛᖑᓪᓗᓂ ᑐᖁᒍᑕᐅᕙᒃᖢᓂ ᑲᓇᑕᒥᐅᓄᑦ.

ᐊᓯᖏᑦ ᒫᓐᓇ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᓕᕆᐊᕆᔭᐅᔪᑦ ᐳᕙᒃᑯᑦ ᐋᓐᓂᐊᖃᖅᐸᒃᑐᓄᑦ:

• $57 -ᒥᓕᔭᓐᑖᓚᐃᑦ ᐊᕐᕌᒍᑕᒫᑦ ᑎᐹᒃᑐᖅᑕᐃᓕᒋᐊᖃᕐᓂᕐᒧᑦ ᐱᓕᕆᒍᑕᐅᔪᑦ;
• $30 -ᒥᓕᔭᓐᑖᓚᐃᑦ ᐊᕐᕌᒍᓄᑦ ᓯᑕᒪᓄᑦ ᐊᓂᖅᓵᖅᑐᕐᓂᕐᒧᑦ ᐊᑐᖅᑐᓂᒃ ᐋᓐᓂᐊᖅᑐᓕᕆᒍᑕᐅᔪᑦ;
• $110 -ᒥᓕᔭᓐᑖᓚᐃᑦ ᐊᕐᕌᒍᓄᑦ ᓯᑕᒪᓄᑦ ᐊᑐᖅᑐᒃᓴᐃᑦ ᑕᐃᒪᓐᓇ ᐊᓂᖅᓵᖅᑐᕐᕕᐅᔪᓂ ᑲᒪᑦᓯᐊᕆᐊᖃᕈᑎᑦ ᓴᓗᒪᑎᑎᓇᓱᐊᕈᑎᑦ;
• $209 -ᒥᓕᔭᓐᑖᓚᐃᑦ 2000-ᒥᑦ - ᖃᐅᔨᓴᕈᑎᒃᓴᐃᑦ ᐳᕙᖕᒧᑦ ᐋᓐᓂᐊᓕᕈᑕᐅᕙᒃᑐᓂᒃ ᖃᐅᔨᓴᕐᓂᕐᒧᑦ;
• $9.2 -ᒥᓕᔭᓐᑖᓚᐃᑦ ᐳᕙᒡᓗᒃᑖᖃᑦᑕᖅᑐᑦ ᑲᒪᒋᔭᐅᒍᑎᒃᓴᓂᖏᑦ ᖃᓄᐃᓕᐅᕈᑕᐅᒍᑎᒃᓴᖏᑦ; ᐊᒻᒪ
• $230,000 ᐊᕐᕌᒍᑕᒫᑦ ᖃᐅᔨᓴᕈᑕᐅᕙᒃᑐᑦ ᐳᕙᒃᑯᑦ ᐋᓐᓂᐊᖅᑖᕈᑕᐅᕙᒃᑐᓂᒃ.