ᒥᓂᔅᑕ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐊᒻᒪᓗ ᑲᑎᒪᔨᕐᔪᐊᖑᖃᑕᐅᔪᑦ ᐊᑐᕚᒥ ᑲᑎᒪᔨᕐᔪᐊᓄᑦ ᓄᓇᕗᒥᐅᓄᑦ ᖁᕕᐊᓱᖏᑦᓯᐊᖅᐳᖅ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᑦ ᐃᓱᒪᓕᐅᕈᑎᒋᓚᐅᖅᑕᖏᓐᓂᒃ ᑕᐅᖅᓰᖃᑦᑕᐅᑎᖃᑦᑕᕈᒪᔪᓐᓃᖅᖢᑎᒃ ᑕᒪᒃᑯᓂᖓ ᓇᑦᓯᕐᓂᒃ ᐃᓚᖏᓐᓂᒡᓗ.

"ᑕᒪᓐᓇ ᐊᒃᑐᐊᓂᖃᓪᓚᕆᒃᐳᖅ ᐅᑭᐅᖅᑕᖅᑐᒥ," ᐅᖃᓚᐅᖅᐳᖅ ᒥᓂᔅᑕ ᐊᒡᓘᒃᑲᖅ. "ᐅᑭᐅᖅᑕᖅᑐᒥᐅᑕᐅᓪᓗᖓ, ᐆᒻᒪᑎᒐᓄᑦ ᐊᒃᑐᐊᖓᖕᒪᑦ ᑕᒪᓐᓇ. ᓇᑦᓯᓕᖕᒥᐅᑕᐅᓪᓗᖓ. ᓇᑦᓯᖅᓯᐅᕐᓂᖅ ᐃᓅᓇᓱᐊᕈᑎᒋᒐᑦᑎᒍ. ᓂᕿᑦᓯᐊᕙᐅᓪᓗᑎᒃ, ᐅᖁᖅᓴᐅᑕᐅᓪᓗᑎᒡᓗ ᐅᖅᓱᖏᑦ ᐃᒡᓗᒃᓴᐅᓪᓗᑎᒃ ᐊᒻᒪᓗ ᐊᓐᓄᕌᒃᓴᐅᓪᓗᑎᒃ ᐱᒋᒐᑦᑎᒍ. ᑮᓇᐅᔭᓕᐅᕈᑕᐅᖃᑦᑕᖅᖢᑎᒡᓗ ᐃᓄᖕᓄᑦ ᓄᓇᓕᖕᓂᒥᐅᓄᑦ ᐃᖅᑲᓇᐃᔭᕐᕕᖃᖏᑦᑐᓄᑦ ᐊᓯᖏᓐᓂᒃ."

ᐱᖁᔭᒃᓴᓕᐅᓚᐅᖅᑕᖓᑦ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᑦ ᓇᒡᓕᒍᓱᒃᖢᑎᒃ ᐱᒋᐊᕈᑕᐅᓚᐅᕐᒪᑦ ᑭᒃᑯᑐᐃᓐᓇᕐᓂᒃ ᑐᓴᖅᑎᑎᓇᓱᐊᖅᖢᑎᒃ ᑕᒪᒃᑯᐊ ᓇᑦᓯᖅᓯᐅᖁᔨᖏᑦᑐᑦ ᑎᒥᐅᔪᑦ. ᓂᕐᔪᑎᓂᒃ ᓇᒡᓕᒍᓱᒃᑎᑦ ᑕᐃᒪᓐᓇ ᑐᑭᓯᐅᒪᑦᓯᐊᖏᑦᖢᑎᒃ ᑕᐃᒪᓐᓇᐃᓕᐅᖅᐸᖕᒪᑕ. ᓱᓇᑐᐃᓐᓇᑎᒍᑦ ᖃᐅᔨᓴᕈᑎᑎᒍᑦ ᖃᐅᔨᓴᖅᑕᐅᓯᒪᖏᑦᖢᑎᒃ ᐃᓱᒫᓗᒍᑎᒃᓴᖅᑕᖃᖏᑎᓪᓗᒍ ᖃᐅᔨᓴᖅᑕᐅᓚᐅᖏᓐᓂᖏᓐᓄᑦ ᑕᒪᒃᑯᐊ ᖃᐃᕈᓖᑦ. ᑕᐃᒪᓐᓇ ᒪᓕᒐᑎᒍᑦ ᐱᔾᔪᑎᖃᖏᒃᑲᓗᐊᕐᒪᑕ ᐆᒪᔪᓂᒃ.

"ᑲᓐᓲᕕᑎᒃᑯᑦ ᒐᕙᒪᒃᑯᖏᑦ ᐱᓕᕆᔪᒻᒪᕆᐅᓯᒪᕗᑦ ᓯᓚᕐᔪᒥᐅᓄᑦ ᓇᑦᓯᑦ ᐊᑐᖅᑕᐅᓂᖏᓐᓄᑦ," ᐅᖃᓚᐅᖅᐳᖅ ᒥᓂᔅᑕ ᐊᒡᓘᒃᑲᖅ. "ᑲᓇᑕᐅᑉ ᒐᕙᒪᒃᑯᖏᑦᑕ ᐊᖓᔪᖃᖓᑦ ᓯᑏᕕᓐ ᕼᐋᐳ ᐊᑭᕋᖅᑐᓚᐅᖅᐳᖅ ᑕᕆᐅᑉ ᐊᑭᐊᓂ ᒐᕙᒪᐅᖃᑎᒥᓄᑦ ᓯᕗᓂᐊᒍᑦ ᐱᒋᐊᓕᓵᖅᑎᓪᓗᒍ ᑕᒪᓐᓇ. ᖁᕕᐊᓱᖏᑉᐳᖓ ᓕᑉᐳᕈᒃᑯᓐᓄᑦ ᓴᓇᑐ ᐃᑦᑐᖅ ᒫ ᕼᐊᑉ ᐃᑲᔪᖅᑐᐃᓂᖓᓄᑦ ᑕᒪᑐᒥᖓ ᓄᖅᑲᖅᑎᑎᓂᖏᓐᓄᑦ. ᖃᐅᔨᒪᖏᑦᓯᐊᕐᒪᑦ ᐃᓄᖕᓂᒃ ᓇᑦᓯᖅᓯᐅᕐᓂᕐᒧᑦ ᐃᓅᓯᖃᖅᑐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᑲᓇᑕᒥ."

ᓇᑦᓯᖅᓯᐅᖃᑦᑕᕐᓂᖅ ᑲᓇᑕᒥᓪᓘᓐᓃᑦ ᐅᑭᐅᖁᑐᓂᖅᓴᐅᖕᒪᑦ. ᓇᑦᓯᖅᓯᐅᕐᓂᖅ ᐃᓅᓯᐅᖕᒪᑦ.  ᐊᔪᖏᑉᐳᑦ ᑕᐃᒪᓐᓇ ᑕᕆᐅᑉ ᐊᑭᐊᓂ ᑲᑎᒪᔨᕐᔪᐊᑦ ᓂᕈᐊᕐᓂᕐᒥᒃ ᐃᑲᔪᖅᑐᐃᓗᑎᒃ ᑕᐅᖅᓰᖃᑦᑕᐅᑎᑦᑕᐃᓕᒪᒍᑕᐅᒋᐊᖃᕐᓂᖏᓐᓄᑦ ᓇᑦᓯᑦ ᐃᓚᖏᓪᓗ ᐃᒃᐱᒍᓱᖏᑐᐊᕈᑎᒃ. ᓱᓕ ᐊᖏᖅᑕᐅᒋᐊᖃᖅᐳᖅ ᑕᕆᐅᑉ ᐊᑭᐊᓂ ᑲᑎᒪᔨᖏᓐᓄᑦ. ᒐᕙᒪᕗᑦ ᐊᒃᓱᕈᕈᑎᖃᐃᓐᓇᕐᓂᐊᖅᐳᑦ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᑦ ᐅᑕᕿᔪᓐᓇᖁᓪᓗᒋᑦ ᓄᖅᑲᖅᑎᑎᓂᕐᒧᑦ ᑕᐅᖅᓰᖃᑦᑕᕐᓂᕐᒧᑦ ᓇᑦᓯᕐᓂᒃ ᐃᓚᖏᓐᓂᒡᓗ ᓂᕈᐊᕈᑎᖃᓚᐅᖏᓐᓂᕐᒥᖕᓂ.