ᐃᖃᓗᐃᑦ, ᓄᓇᕗᑦ -- (ᒪᐃ 22, 2009) - ᑭᒡᒐᖅᑐᐃᓪᓗᓂ ᒥᓂᔅᑕ ᔩᒻᔅ ᒧᐊᒥᒃ, ᒥᓂᔅᑕ ᑲᓇᑕᒥ ᐃᑦᑕᕐᓂᑕᓕᕆᓂᕐᒧᑦ ᐅᖃᐅᓯᑦ ᐃᓕᑕᕆᔭᐅᓯᒪᓂᖏᓐᓄᓪᓗ, ᒥᓂᔅᑕ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᑐᕚᒥ ᑲᑎᒪᕐᔪᐊᕐᕕᖕᒥ (ᓄᓇᕗᑦ), ᐅᓪᓗᒥ ᑐᓴᖅᑎᑎᓚᐅᖅᐳᖅ ᐊᑎᖏᓂᒃ ᓵᓚᒃᓴᓚᐅᖅᑐᑦ ᓯᑕᒪᓂ ᐅᑭᐅᖃᖅᑐᓂ ᐊᔾᔨᒌᖏᑦᑐᓂ ᐊᒻᒪᓗ ᓯᕗᓪᓕᖅᐸᐅᓚᐅᖅᑐᓂ 2009-ᒥ ᑎᑎᖅᑐᒐᖅᑎᑕᐅᑎᓪᓗᒋᑦ ᑲᓇᑕᐅᑉ ᓇᓪᓕᐅᕐᓂᖅᓯᐅᕐᓂᖓᓂ.

ᓄᓇᕗᒥ ᓵᓚᒃᓴᖃᑕᐅᓚᐅᖅᑐᖅ, ᐊᒥᓕᐊ ᓗᐃᔅ, ᐊᕐᕌᒍᓕᒃ 17-ᓂᒃ, ᐃᓕᓐᓂᐊᖃᑦᑕᖅᐳᖅ ᐃᓄᒃᓱᒃ ᐃᓕᓐᓂᐊᕐᕕᒡᔪᐊᖓᓂ ᐃᖃᓗᖕᓂ. ᑎᑎᖅᑐᒐᖅᑕᒥᓂᒃ ᑕᐃᒍᖅᓯᓚᐅᖅᖢᓂ,"ᖃᐅᒪᔪᑦ ᐆᒻᒪᑎᖏᑦ," ᑕᐃᒪᓐᓇ ᓴᓇᓪᓗᓂᐅᒃ ᓇᖕᒥᓂᖅ.

ᑭᒡᒐᖅᑐᐃᓪᓗᓂᓗ ᓂᕆᐅᖕᓂᕐᒥᒃ ᐱᖃᓐᓇᕇᖕᓂᕐᒥᒡᓗ, ᐃᓄᒃᓱᒃ ᐊᒥᓕᐊ ᑎᑎᖅᑐᒐᖅᑕᖓᓂ ᓴᕆᒪᓱᑦᓯᐊᖅᖢᓂ ᓇᑉᐸᖅᓯᒪᕗᖅ ᑎᒍᒥᐊᖅᖢᓂ ᐅᓕᑉᐱᒃ ᖃᐅᔨᒪᔪᒥᒃ ᐊᒻᒪᓗ ᒎᓗᑎᒥᒃ ᐅᔭᒥᒃᓯᒪᓪᓗᓂ. ᐱᑕᖃᖅᖢᓂᓗ ᑲᓇᑕᒥ ᓴᐃᒻᒪᐅᑎᒥᒃ ᐊᒻᒪᓗ ᐸᒥᐅᖅᑑᒥᒃ, ᑲᓇᑕᒥ ᓂᕐᓕᕐᒥᒃ, ᐊᒻᒪᓗ ᑲᓇᑕᐅᑉ ᓴᐃᒻᒪᐅᑎᖓᓂᒃ.

"ᐅᐱᒋᑦᓯᐊᖅᐸᒃᑲ ᐊᔪᖏᑦᑐᒻᒪᕆᐅᓂᖏᓐᓄᑦ ᒪᒃᑯᒃᑐᑦ ᑲᓇᑕᒥᐅᑕᐃᑦ. ᑕᒪᕐᒥᒃ ᑎᑎᖅᑐᒐᖃᑕᐅᓯᒪᔪᑦ ᑕᑯᑎᑎᔪᓐᓇᓚᐅᖅᐳᑦ ᑲᓇᑕᒥᐅᑕᐅᓂᕐᒥᖕᓄᑦ ᓄᓇᖓ ᑲᔾᔮᕐᓇᕐᓂᖓᓄᑦ ᖃᓄᑐᐃᓐᓇᖅ ᐅᓂᒃᑳᒐᒃᓴᖃᕐᓂᖓᓄᓪᓗ ᐊᒻᒪᓗ ᐊᔾᔨᒌᖏᑦᑐᓂᒃ ᐃᓕᖁᓯᖃᐅᕐᓂᖏᓐᓄᑦ," ᐅᖃᓚᐅᖅᐳᖅ ᒥᓂᔅᑕ ᒧᐊ. "2010 ᐅᑭᐅᒃᑯᑦ ᐃᖃᐃᓕᓴᕐᓂᕐᒧᑦ ᐱᓐᖑᐊᕐᔪᐊᕐᓇᐅᓂᐊᖅᑐᖅ ᐊᕐᕌᒎᓪᓗᐊᖏᓕᖅᑎᓪᓗᒍ, ᑎᑎᖅᑐᒐᕐᓇᐅᑎᓪᓗᒍ ᒪᒃᑯᒃᑐᑦ ᐊᒥᓱᑦ ᓇᑭᑐᐃᓐᓇᖅ ᑲᓇᑕᒥᐅᑕᐃᑦ ᐃᓚᐅᑎᑕᐅᓯᒪᕗᑦ ᖁᕕᐊᓱᒃᓯᒪᕗᑦ ᐊᒻᒪᓗ ᑲᓇᑕᒥ ᐱᓐᖑᐊᕐᔪᐊᕐᓂᐊᕐᓂᕐᒧᑦ ᐊᔾᔨᓕᐅᕆᔪᓐᓇᖅᓯᒪᕗᑦ. ᐅᐱᒋᑦᓯᐊᖅᐸᕗᑦ ᑕᒪᕐᒥᒃ ᐃᓚᐅᓚᐅᖅᑐᑦ ᑎᑎᖅᑐᒐᖃᑕᐅᓂᕐᒧᑦ."

"ᖁᕕᐊᓱᒃᐳᖓ ᐅᖃᕈᓐᓇᕋᒪ ᐊᕐᕌᒍᒥ ᑎᑎᖅᑐᒐᖅᑕᐅᓚᐅᖅᑐᑦ ᐊᑐᖅᑕᐅᒍᒪᒻᒪᕆᓚᐅᖅᐳᑦ ᓄᓇᕗᒥ," ᐅᖃᓚᐅᖅᐳᖅ ᐊᒡᓘᒃᑲᖅ. "400-ᑲᓴᐃᑦ ᐃᓄᐃᑦ ᐊᕐᕌᒍᖃᖅᑐᑦ ᑕᓪᓕᒪᓂᑦ 18-ᒧᑦ ᐃᓚᐅᓚᐅᖅᐳᑦ ᖃᐅᔨᑎᑎᔪᓐᓇᓚᐅᖅᐳᓪᓗ ᐊᔪᖏᓐᓂᕐᒥᖕᓂᒃ, ᐅᐱᒋᔭᖃᕐᓂᕐᒥᖕᓄᓪᓗ ᑲᓇᑕᒥᐅᑕᐅᓂᕐᒧᑦ. ᐅᐱᒋᑦᓯᐊᕈᒪᕙᒃᑲ ᑕᒪᕐᒥᒃ."

ᑕᒪᒃᑯᐊ ᓯᕗᓪᓕᐅᓪᓗᑎᒃ ᓂᕈᐊᖅᑕᐅᖃᑕᐅᓚᐅᖅᑐᑦ ᓯᑕᒪᐅᓚᐅᖅᑦ ᐅᑯᐊ ᐃᒪᓐᓇ ᐊᕐᕌᒍᖃᖅᑐᑦ:


- ᐊᕐᕌᒍᓕᑦ ᑕᓪᓕᒪᓂᑦ 8-ᓄᑦ: ᑎᕆᓯ ᑯᓗᓛ, ᐊᕐᕌᒍᓕᒃ 7-ᓂᒃ, ᓇᑲᓱᒃ ᓕᓐᓂᐊᕐᕕᒃ, ᐃᖃᓗᐃᑦ

- ᐊᕐᕌᒍᓕᑦ 9-ᓂᑦ 11-ᓄᑦ: ᑎᐅᕆᓐ ᐅᒡᕈᒃ, ᐊᕐᕌᒍᓕᒃ 11-ᓂᒃ, ᓇᑦᓯᓕᒃ ᐃᓕᓐᓂᐊᕐᕕᒃ, ᑕᓗᕐᔪᐊᒃ

- ᐊᕐᕌᒍᓕᒃ 12-ᓂᑦ 14-ᓄᑦ: ᓗᐊᕋ ᐃᑦᑐᖓᑦ, ᐊᕐᕌᒍᓕᒃ 12-ᓂᒃ, ᓇᑦᓯᓕᒃ ᐃᓕᓐᓂᐊᕐᕕᒃ, ᑕᓗᕐᔪᐊᒃ

- ᐊᕐᕌᒍᓕᑦ 15-ᓂᑦ 18-ᒧᑦ: ᐊᒥᓕᐊ ᓗᐃᔅ, ᐊᕐᕌᒍᓕᒃ 17, ᐃᓄᒃᓱᒃ ᐃᓕᓐᓂᐊᕐᕕᒡᔪᐊᖓᓐᓂᑦ, ᐃᖃᓗᐃᑦ

ᐊᒥᓕᐊ ᐃᓚᒋᔭᐅᖃᑕᐅᓂᐊᖅᐳᖅ 13-ᓄᑦ ᑲᓇᑕᒥ ᐊᕕᒃᑐᖅᓯᒪᐅᖅᑐᑦ ᓄᓇᓕᖕᓐᓂ ᓄᓇᕗᒥᑦ ᓄᓇᑦᓯᐊᒥ ᔪᑳᓐᒥᐅᓂᓪᓗ ᐊᑐᕚᓕᐊᕐᓂᐊᖅᖢᓂ ᔫᓐᒥ ᐃᓚᐅᒋᐊᖅᑐᕐᓗᓂ ᑲᓇᑕ ᓇᓪᓕᐅᕐᓂᖅᓯᐅᖅᑎᓪᓗᒍ. ᓯᕗᓪᓕᖅᐸᐅᖃᑕᐅᓪᓗᓂᓗ ᓵᓚᒃᓴᐅᑎᖃᕐᓂᐊᖅᐳᖅ: ᐊᑭᓕᖅᑕᐅᓗᓂᓗ 2010 ᐃᖃᐃᓕᓴᐅᑎᓂᒃ ᐱᓐᖑᐊᕐᔪᐊᖅᑎᓪᓗᒋᑦ ᐅᑭᐅᒃᑯᑦ ᐃᓚᐅᓂᐊᖅᖢᓂ ᕚᓐᑰᕙᒧᑦ.


ᓵᓚᒃᓴᖅᑐᖅ ᓯᕗᓪᓕᖅᐸᐅᓪᓗᓂ ᓂᕈᐊᖅᑕᐅᓚᐅᖅᐳᖅ 13-ᓂᑦ. ᑎᑎᖅᑐᒐᖅᑕᖓᓗ ᑕᑯᒃᓴᐅᑎᑕᐅᓂᐊᖅᖢᓂ ᑲᓇᑕ ᓇᓪᓕᐅᕐᓂᖅᓯᐅᕐᓂᖓᓂ ᓇᒧᑐᐃᓐᓇᕐᓗ ᑲᓇᑕᒥᐅᑕᐅᔪᓄᑦ ᑐᓂᐅᖃᖅᑕᐅᓂᐊᖅᖢᓂ.

ᐱᒋᐊᖅᑕᐅᓚᐅᖅᓯᒪᓪᓗᓂ ᑕᑯᒃᓴᐅᔪᒃᓴᓂᒃ ᑎᑎᖅᑐᒐᕐᓂᖅ 187-ᒥ ᑎᓕᐅᖅᑕᐅᕙᒃᖢᑎᒡᓗ ᒪᒃᑯᒃᑐᑦ ᑲᓇᑕᒥᐅᑦ ᐃᓕᓐᓂᐊᖅᐸᓪᓕᐊᖁᓪᓗᒋᑦ ᑲᓇᑕᒥᐅᓂᒃ,  ᐅᐱᒋᔭᖃᖁᓪᓗᒋᑦ ᓄᓇᒥᖕᓂᒃ ᓴᓐᖏᓕᖅᑎᑎᖁᓪᓗᒋᓪᓗ ᑲᓇᑕᒥᐅᑕᐅᓂᕐᒥᖕᓄᑦ.

ᑐᑭᓯᒋᐊᒃᑲᓐᓂᕈᒪᔪᑦ 2009-ᒥ ᑲᓇᑕᐅᑉ ᓇᓪᓕᐅᕐᓂᖅᓯᐅᕐᕕᖓᓂ ᑎᑎᖅᑐᒐᒐᒃᓴᖃᖅᑎᑕᐅᓂᕐᒧᑦ, ᖃᐅᔨᒋᐊᕈᓐᓇᖅᐳᑦ ᖃᕆᑕᐅᔭᒃᑯᑦ ᐅᕗᖓ www.posterchallenge.pch.gc.ca.