ᑖᓐᓇ ᐊᖏᕈᑕᐅᓚᐅᖅᓯᒪᔪᖅ ᑲᓇᑕᐅᑉ ᐊᖓᔪᖅᑳᕐᔪᐊᒻᒪᕆᐊᓄᑦ ᓯᑎᕙᓐ ᕼᐊᐸᒧᑦ ᑕᐃᑦᓱᒪᓂ ᓂᕈᐊᕐᔪᐊᕋᓱᐊᓕᖅᑎᓪᓗᒋᑦ ᐅᑭᐊᒃᓵᖅ.  ᐊᖏᓚᐅᖅᑐᖅ ᐱᓕᕆᐊᖃᕈᒪᓪᓗᓂ ᑕᕝᕚᑭᑦ ᓂᐅᕐᕈᑕᐅᖃᑦᑕᕐᓂᖏᑦ ᐊᓯᔾᔨᕈᒪᓪᓗᓂᒋᑦ ᑐᕌᖓᔪᑦ ᒪᒃᑯᒃᑐᓄᑦ.  ᐃᑉᐸᒃᓴᖅ, ᓯᕗᒧᐊᒃᑎᑕᐅᓚᐅᖅᑐᖅ ᐊᖏᖅᓯᒪᓂᕆᔭᖓ ᓴᖅᑭᑦᑎᓪᓗᑎᒃ “ᓄᖅᑲᖅᑎᑦᓯᒐᓱᐊᕐᓂᕐᒥᒃ ᑕᕝᕚᑮᑦ ᓂᐅᕐᕈᑕᐅᖃᑦᑕᕐᓂᖏᓐᓂᒃ ᑐᕌᖓᔪᓂᒃ ᒪᒃᑯᒃᑐᑦ ᐱᖁᔭᕐᔪᐊᖏᓐᓄᑦ.”

ᐊᒃᓱᕈᕐᓇᕐᒪᑕ ᑕᕝᕚᑭᓂᑦ ᓴᓇᓯᒪᔪᑦ ᐴᖅᑐᖅᓯᒪᔪᑦ ᐊᑭᓴᖅᑐᕋᓱᐊᕐᖢᖏᑦ, ᐊᑭᓕᖅᓱᖅᓯᒪᐅᖅᖢᑎᒃ ᐊᒻᒪ ᑎᐱᖏᑦ ᐊᔾᔨᒌᖏᓪᖢᑎᒃ ᐊᑐᖅᑕᐅᔪᒪᓪᓚᕆᒃᐊᒃᑐᑦ -- ᒪᒃᒃᑐᓄᑦ.  ᐊᓂᒍᖅᑎᑕᐅᒃᐸᑕ ᐋᖅᑭᒋᐊᕈᑎᑦ, ᐃᓕᓯᔪᓐᓇᐃᓪᓕᓂᐊᖅᑐᑦ ᑕᕝᕚᑭᓄᑦ ᑲᔪᖏᖅᓴᐅᑎᓂᒃ ᐅᖃᓕᒫᖏᓐᓂ ᒪᒃᑯᒃᑐᑦ - ᐊᒻᒪ ᑲᓇᑕ ᓯᕗᒃᑲᖅᑕᖅᑎᐅᓕᕐᓗᓂ ᓄᓇᕐᔪᐊᕐᒥ ᑕᕝᕚᑭᓄᑦ ᐊᐅᓚᑦᑎᔾᔪᑎᑎᒍᑦ.

ᓯᒡᒐᓕᐊᖅᑐᖃᑦᑕᕐᓂᖅ ᑲᓇᑕᒥ ᐋᓐᓂᐊᕆᔭᐅᖃᑦᑕᕐᓂᖅᐹᖑᕗᖅ ᑕᐃᒪᐃᑦᑕᐃᓕᒪᔭᐅᔪᓐᓇᕋᓗᐊᕐᖢᓂ. ᐅᓄᖅᑐᒻᒪᕆᑦ ᑕᔭᑕᐅᓴᖏᓐᓂᑦᑐᑦ ᑲᓇᑕᒥᐅᑦ ᓯᒡᒐᓕᐊᖅᑐᖃᑦᑕᕐᓂᕐᒥᑦ ᐋᓐᓂᐊᖃᖅᐳᑦ.  ᐋᖅᑭᒋᐊᕈᑎᑦ ᑕᕝᕚᑭᑦ ᐱᖁᔭᕐᔪᐊᖏᓐᓄᑦ ᑎᐱᖏᑦ ᐊᔾᔨᒌᖏᑦᑐᑦ ᓯᒡᒐᓕᐊᑦ ᒪᒃᑯᒃᑐᓄᑦ ᑲᔪᖏᖅᓴᐅᑕᐅᔪᑦ ᐃᓚᓕᐅᑎᔭᐅᖃᑦᑕᕐᓂᐊᕈᓐᓂᖅᐳᑦ.  ᐋᖅᑭᒋᐊᕈᑎᑦ ᐃᑲᔪᖅᓯᓂᐊᕐᒥᔪᖅ ᓱᐴᖅᑐᖏᓐᓂᖅᓴᐅᖁᓪᓗᒋᑦ ᐃᓅᓯᓕᒫᒧᑦ ᖃᐅᔨᒪᑦᑎᐊᕐᓗᑎᒃ ᑎᒥᒧᑦ ᐋᓐᓂᐊᖅᑖᕈᑕᐅᔪᓐᓇᕐᓂᖓᓂᒃ.

2007-ᖑᑎᓪᓗᒍ, 400 ᒥᓕᐊᓐ ᐅᖓᑖᓂ ᐅᓄᕐᓂᖃᖅᑐᑦ ᓯᒡᒑᑦ ᓂᐅᕕᖅᑕᐅᓚᐅᖅᑐᖅ - ᑕᑯᔪᑯᑖᖑᓪᓗᑎᒃ ᑐᐊᑦᑐᑦ ᑲᓇᑕᒥ.  ᐅᓄᖅᑐᓪᓗ ᑯᑯᒃᑎᑐᑦ ᑎᐱᖃᕐᖢᑎᒃ, ᐳᕕᒐᖅᑎᑐᑦ ᑕᒧᐊᔭᒐᖅᑎᑐᑦ ᐅᕝᕙᓗ ᐸᐅᓐᖓᕕᓂᕐᒥᒃ ᑎᐱᓕᖅᓯᒪᓪᓗᑎᒃ - ᒪᒃᑯᒃᑐᓄᑦ ᐱᐅᒋᔭᐅᓂᐊᕐᒪᑕ ᓯᒡᒐᓕᐊᖅᑐᖅᐸᖏᑦᑐᓄᑦ.  ᑕᒪᒃᑯᐊᓗ ᖃᒃᓴᐃᑦ ᑎᐱᖃᖅᑐᑦ “blunt wraps,” -ᖑᓂᕋᖅᑕᐅᔪᑦ ᓂᐅᕐᕈᑕᐅᓇᓱᐊᓕᕆᕗ ᑦᒪᒃᑯᒃᑐᓄᑦ ᐊᑭᑭᑦᑑᓪᓗᑎᒃ “ᓱᕈᓯᖅᓯᐅᑎᑦ”.  ᑕᐃᒪᐃᑦᑐᑦ ᓂᐅᕐᕈᑕᐅᓂᖏᓐᓄᑦ ᐅᐸᓗᖓᐃᔭᐅᑎᑦ ᓄᖅᑲᖅᑎᑦᑎᒐᓱᐊᖅᑐᑦ.  ᑕᕝᕙᑮ ᐅᖁᒻᒥᐊᒐᐅᖏᒻᒪᑕ ᐊᒻᒪ ᑕᐃᒪᐃᑦᑐᓄᑦ ᑕᒻᒪᐅᑕᐅᔭᕆᐊᖃᖏᒻᒪᕆᖕᒪᑕ .

ᐃᓚᖓᑦᑕᐅᖅ ᑎᐱᖓᑦ ᑎᓕᐅᕆᔾᔪᑕᐅᔪᖅ ᒪᒃᑯᒃᑐᑦ ᓯᒡᒐᓕᐊᒥᒃ ᐆᒃᑐᕋᕐᓂᐊᕐᒪᑕ ᑕᐃᒃᑯᐊ ᑕᐃᒪᓐᓇ ᐱᕙᒃᐳᑦ. ᑕᕝᕙᑭᑦ ᐊᑭᑭᑉᐸᑕ, ᐅᓄᕐᓂᖅᓴᐅᔪᑦ ᒪᒃᑯᒃᑐᑦ ᐆᒃᑐᕋᕐᓂᐊᕐᒪᑕ.  ᐊᕐᕌᒍᑦ ᖁᓕᑦ ᐊᓂᒍᖅᓯᒪᓕᖅᑐᑦ, ᑲᓇᑕᐅᑉ ᒐᕙᒪᒃᑯᖏᑦ ᓯᒡᒐᓕᐊᓂᒃ ᓂᐅᕐᕈᑎᖃᕈᓐᓇᖅᑎᑦᓯᓚᐅᖅᑐᑦ ᐊᕙᑎᓂᒃ ᐅᓄᕐᓂᖃᖅᑐᓂᒃ ᐊᑭᑭᓐᓂᖅᓴᐅᓗᑎᒃ ᓱᕈᓯᕐᓄᑦ ᐱᔭᐅᔪᓐᓇᕐᓂᖅᓴᐅᓂᐊᕐᒪᑕ.  ᒫᓐᓇᐅᔪᕐᓕ ᒪᓕᒐᖏᑦ ᐊᑐᖅᑕᐅᓂᖏᑦ ᐊᖏᓕᒋᐊᖅᑕᐅᕗᑦ ᓯᒡᒑᓄᑦ ᑕᐃᒪᓐᓇ ᑲᔪᖏᖅᓴᐅᑕᐅᖁᓇᒋᑦ.

ᑖᒃᑯᐊ ᓄᑖᑦ ᐱᖁᔭᕐᔪᐊᑦ ᓄᖅᑲᖅᑎᑦᑎᓂᐊᖅᑐᑦ ᑕᕝᕙᑭᑦ ᑲᔪᖏᖅᓴᐅᑕᐅᓂᖏᓐᓄᑦ ᒪᒃᑯᒃᑐᓄᑦ ᑎᑭᐅᒪᓪᓗᑎᒃ ᐅᓄᖅᓯᕙᓪᓕᐊᓕᓚᐅᕐᒪᑕ ᑕᕝᕙᑭᒧᑦ ᑲᔪᖏᖅᓴᐅᑎᑦ ᐱᕙᓪᓕᐊᔪᑎᒍᑦ ᐱᓇᓱᐊᕈᓯᑕᒫᖅᓯᐅᑎᑎᒍᑦ ᐊᒻᒪ ᖃᐅᑕᒫᑦ ᐱᕙᓪᓕᐊᔪᑎᒍᑦ ᑐᓴᒐᒃᓴᑎᒍᑦ.  ᒫᓐᓇᐅᔪᖅ ᑕᕝᕙᑭᒧᑦ ᐱᖁᔭᕐᔪᐊᖅ ᐊᑐᕐᓗᒍ ᓴᖅᑭᔮᖅᑎᑦᑎᔭᕆᐊᖃᖏᒻᒪᑕ ᑎᑎᖅᑲᓂ ᐅᖃᓕᒫᒐᓂ ᐅᖃᓕᒫᖅᑕᐅᕙᒃᑐᓂᒃ 85%-ᖏᓐᓄᑦ ᐃᓐᓇᐃᑦ.  ᑖᒃᑯᐊ ᐊᓯᔾᔨᕈᑕᐅᔪᑦ ᓄᖅᑲᖅᑎᑦᑎᓂᐊᖅᑐᑦ ᑕᐃᒃᑯᓇᓂ ᓴᖅᑭᔮᖅᑎᑦᑎᓂᕐᒥᒃ ᑕᕝᕙᑭᓄᑦ ᑲᔪᖏᖅᓴᐅᑎᓂᒃ.

ᖁᕕᐊᓱᑦᑎᐊᖅᑐᖓ  ᐃᑲᔪᖅᑐᖅᑕᐅᓯᒪᓕᕋᑦᑕ ᐱᖁᔭᒃᓴᓄᑦ ᐅᓄᖅᑐᓂᑦ ᐊᒃᑐᖅᑕᐅᓯᒪᔪᓄᑦ ᓘᒃᑖᓄᑦ ᓯᒡᒐᓕᐊᖅᑐᖃᑦᑕᖁᔨᖏᑦᑐᓄᑦ ᑲᓇᑕᒥ, ᑲᓇᑕᒥᓗ ᐳᕙᓕᕆᓂᕐᒧᑦ ᑲᑐᔾᔨᖃᑎᒌᓄᑦ, ᑲᓇᑕᒥ ᑳᓐᓱᓕᕆᓂᕐᒧᑦ ᑲᑐᔾᔨᖃᑎᒌᓂᑦ ᐊᒻᒪ ᑲᓇᑕᒥ ᐃᓅᓕᓴᐃᔨᑦ ᑲᑐᔾᔨᖃᑎᖐᖏᓐᓂᑦ.  ᓂᕆᐅᑦᑎᐊᕋᓗᐊᖅᐳᖓ ᐱᖁᔭᒃᓴᖅ ᑕᒪᓐᓇ ᐊᓂᒍᖅᑎᑕᐅᖁᓪᓗᒍ ᕿᓚᒻᒥᐅᓂᖅᐹᖑᔪᓐᓇᖅᑐᒃᑯᑦ.

ᓕᐅᓇ ᐊᒡᓗᒃᑲᖅ
ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ