ᐋᑐᐊ –ᓕᐅᓇ ᐊᒡᓗᒃᑲᖅ, ᒥᓂᔅᑕᖓᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐊᒻᒪ ᒥᐊᔨ ᓴᐃᒪᓐ, ᐊᖓᔪᖅᑳᕆᔭᐅᔪᖅ ᐃᓄᐃᑦ ᑕᐱᕇᑦ ᑲᓇᑕᒥ, ᐅᓪᓗᒥ ᐊᑎᓕᐅᕆᖅᑲᐅᔪᑦ ᐅᖓᕙᕆᐊᖅᑕᐅᖁᓪᓗᒍ ᕿᒥᕐᕈᔨᑦ ᑲᑎᒪᔨᖏᑕ ᐊᖏᕈᑎᖓᑦ ᓇᓗᓇᐃᖅᓯᖁᓪᓗᒋᑦ ᑲᔪᓯᑎᑦᑎᓂᖏᓐᓂᒃ ᐃᑲᔪᖃᑎᒌᖕᓂᕐᒥᒃ ᐱᐅᓯᒋᐊᖅᑕᐅᖁᓪᓗᖏᑦ ᐃᓄᐃᑦ ᐋᓐᓂᐊᖅᑐᓕᕆᔭᐅᓂᖏᑦ.

 “ᑖᒃᑯᐊ ᐊᖏᕈᑎᑦ ᓇᓗᓇᐃᖅᓯᕗᑦ ᐱᓪᓗᐊᑕᐅᕆᔭᐅᓂᖏᓐᓂᒃ ᑲᓇᑕᐅᑉ ᐊᖏᖅᓯᒪᓂᖓᑦ ᐃᖅᑲᓇᐃᔭᖃᑎᖃᕈᒪᓪᓗᑎᒃ ᐃᓄᖕᓂᒃ ᑕᐱᕆᓗᒋᑦ ᐱᐅᓯᒋᐊᖅᑕᐅᓂᐊᕐᒪᑕ ᐃᓅᓯᖏᑦ ᐊᒻᒪ ᑲᔪᖏᖅᓴᐃᔾᔪᑎᖃᕐᓗᑎᒃ ᖃᓄᐃᖏᑦᓯᐊᕐᓗᑎᒃ ᓯᕗᓂᒃᓴᖃᕈᓐᓇᖁᓪᓗᒋᑦ ᐊᑕᖏᕐᓗᑎᒃ ᐃᓄᐃᑦ,” ᒥᓂᔅᑕ ᐊᒡᓗᒃᑲᖅ ᐅᖃᖅᑲᐅᔪᖅ ᑕᐃᒪᓐᓇ ᐊᑎᓕᐅᕆᑎᓪᓗᒋᑦ ᐋᑐᐊᒥ.  “ᐃᓅᓪᓗᖓ, ᑕᑯᓯᒪᕗᖓ ᑭᓐᖒᒪᔭᐅᔪᓂᒃ ᐊᒻᒪ ᐱᕕᒃᓴᐅᔪᓂᒃ ᐱᐅᓯᒋᐊᖅᑎᑕᐅᖁᓪᓗᒍ ᐋᓐᓂᐊᖅᑐᓕᕆᓂᐅᕙᒃᑐᖅ ᐅᑭᐅᖅᑕᖅᑐᕐᒥ ᐅᖓᓯᒃᑐᒥ.

 “ᑖᒃᑯᐊ ᑐᓴᖅᑎᑦᑎᔾᔪᑎᐅᔪᑦ ᐱᒻᒪᕆᐅᓂᖓᓂᒃ ᐅᖓᕙᕆᐊᖅᑕᐅᓗᓂ ᐱᐅᔪᒃᑯᑦ ᐱᓕᕆᖃᑎᒌᒍᓐᓇᖁᓪᓗᒋᑦ ᑕᐃᒪᓐᓇ ᐱᓕᕆᖃᑎᒌᖕᓂᖏᑦ ᐊᑐᕐᓗᒋᑦ, ᐊᒻᒪ ᑲᑎᑕᐅᓪᓗᑎᒃ ᐱᐅᓯᕆᔭᐅᔪᑦ ᐃᔨᒋᓂᕐᒧᑦ ᐱᓪᓗᐊᑕᐅᓂᖏᓐᓄᑦ ᓯᕗᓪᓕᐅᔾᔭᐅᓯᒪᔪᑦ ᑖᒃᑯᐊ ᐊᒃᑐᐃᓂᖃᖅᑐᑦ ᐃᓄᐃᑦ ᐋᓐᓂᐊᖅᑐᓕᕆᔭᐅᓂᖏᓐᓂᒃ ᐅᑭᐅᖅᑕᖅᑐᕐᒥ,” ᑕᐃᒪᓐᓇ ᐅᖃᓚᐅᖅᑐᖅ ᒥᐊᔨ ᓴᐃᒪᓐ, ᐊᖓᔪᖅᑳᕆᔭᐅᔪᖅ ᐃᓄᐃᑦ ᑕᐱᕇᑦ ᑲᓇᑕᒥ. “ᑖᒃᑯᐊ ᕿᒥᕐᕈᔨᑦ ᑲᑎᒪᔨᖏᑦ ᐊᒻᒪ ᐃᖅᑲᓇᐃᔭᕐᓂᐊᕐᓂᖏᓐᓄᑦ ᐸᕐᓇᐅᑎᐅᔪᑦ ᐊᒃᓱᐊᓗᒃ ᐊᑑᑎᖃᖅᐳᑦ ᓴᓇᕐᕈᑕᐅᓂᐊᕐᓗᑎᒃ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐋᖅᑭᒡᓱᐃᑎᓪᓗᒋᑦ ᐊᒻᒪ ᑲᔪᓯᑎᑦᑎᑎᓪᓗᒋᑦ ᓇᓗᓇᐃᖅᓯᒪᑦᑎᐊᖅᑐᓂᒃ ᑐᕌᒐᒃᓴᓂᒃ ᑕᒪᑐᒧᖓ ᐱᐅᓯᒋᐊᖅᑎᑦᑎᓂᕐᒧᑦ ᐃᓄᐃᑦ ᐋᓐᓂᐊᖅᑐᓕᕆᔭᐅᓂᖏᓐᓄᑦ.”

ᑖᓐᓇ ᐊᖏᕈᑎᐅᔪᖅ ᕿᓂᖅᑐᖅ ᑲᔪᖏᖅᓴᐃᔪᒪᓪᓗᑎᒃ ᐊᒻᒪ ᐊᖏᓕᕆᐊᖅᑕᐅᖁᓪᓗᒍ ᓯᕗᒧᐊᑦᑎᐊᕐᓂᕆᔭᖓᑦ ᑲᑐᔾᔨᓪᓗᑎᒃ ᐱᔭᕆᐊᑭᒡᓕᑎᑦᑎᔨᐅᔪᑦ ᐱᒋᐊᓚᐅᖅᓯᒪᔭᖓᑦ 2006-ᖑᑎᓪᓗᒍ.  ᑖᒃᑯᐊ ᕿᒥᕐᕈᔨᑦ ᑲᑎᒪᔨᖏᑕ ᑎᓕᔭᐅᓯᒪᔾᔪᑎᖓᑦ ᓯᕗᒧᐊᒃᑎᑦᑎᓂᐊᖅᑐᑦ ᐅᖃᐅᑕᐅᒃᑲᓐᓂᖁᓪᓗᒋᑦ ᐊᒻᒪ ᐅᓂᒃᑳᓕᐅᕐᓗᑎᒃ ᐅᑯᓄᖓ: ᐱᐅᓯᕆᔭᐅᔪᑦ ᐃᑲᔪᖅᑐᐃᔾᔪᑕᐅᔪᑦ ᐊᑑᑎᖃᖅᑐᑦ ᐋᓐᓂᐊᖅᑐᓕᕆᔭᐅᓂᖏᑦ ᐱᔨᑦᓯᖅᑕᐅᓪᓗᑎᒃ ᐃᓄᐃᑦ, ᓄᓇᓕᖕᓂᓗ ᖃᓄᐃᖏᑦᓯᐊᕋᓱᐊᕐᓂᕐᒧᑦ ᐸᕐᓇᐅᑎᑦ, ᐃᓱᒪᓕᕆᓂᕐᒧᑦ ᐱᒋᐊᖅᑎᑦᓯᔾᔪᑎᑦ, ᐃᖅᑲᓇᐃᔭᖅᑐᓕᕆᓂᖅ, ᐊᒻᒪ ᑐᓴᒐᒃᓴᐃᑦ ᖃᕆᑕᐅᔭᒃᑯᓪᓗ ᓄᐊᑕᐅᖃᑦᑕᕐᓂᖏᑦ.  ᐱᓕᕆᖃᑎᒋᔭᐅᑎᓪᓗᒋᑦ ᐊᒡᒍᖅᑐᖅᓯᒪᓂᕐᒥ ᐊᒻᒪ ᑲᓇᑕᒥ ᐱᓕᕆᔨᐅᔪᑦ, ᑲᑐᔾᔨᖃᑎᒌᒡᓗᑎᒃ ᐱᓕᕆᖃᑎᖃᕐᓗᑎᒃ ᐃᓄᐃᑦ ᑕᐱᕇᑦ ᑲᓇᑕᒥ, ᐊᒻᒪ ᐱᒋᐊᕈᑎᖏᑦ ᑎᑎᕋᕐᕕᖓᑦᑕ ᐃᓄᐃᑦ ᐋᓐᓂᐊᖅᑐᓕᕆᔭᐅᓂᖏᑕ, ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ ᐊᑑᑎᖃᑦᑎᐊᖅᑐᒃᑯᑦ ᑭᐅᔭᐅᔪᓐᓇᕐᓂᐊᕐᒪᑕ ᐃᓄᐃᑦ ᐋᓐᓂᐊᖅᑐᓕᕆᔭᐅᓂᖏᓐᓄᑦ ᐃᓱᒫᓗᒍᑕᐅᔪᑦ ᐊᒻᒪ ᐱᔾᔪᑎᐅᔪᑦ, ᐊᒻᒪ ᐅᔾᔨᕈᓱᓕᖅᑎᑦᑎᓂᖅᓴᐅᓗᑎᒃ ᐃᓄᐃᑦ ᐋᓐᓂᐊᖅᑐᓕᕆᔭᐅᓂᖏᓐᓄᑦ ᐱᔾᔪᑎᐅᔪᓂᒃ ᓇᐅᒃᑯᓕᒫᖅ ᐊᔾᔨᒌᖏᑦᑐᑦ ᒐᕙᒪᐃᑦ ᐃᓗᐊᒍᑦ.

ᑖᒃᑯᐊ ᕿᒥᕐᕈᔨᑦ ᑲᑎᒪᔨᖏᑦ, ᑐᓂᓰᓐᓇᖃᑦᑕᕐᓂᐊᖅᑐᑦ ᐅᓂᒃᑳᓕᐊᓂᒃ ᒥᓂᔅᑕᖓᓐᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐊᒻᒪ ᐊᖓᔪᖅᑳᖓᓐᓄᑦ ᐃᓄᐃᑦ ᑕᐱᕇᑦ ᑲᓇᑕᒥ, ᑖᒃᑯᐊᓗ ᕿᒥᕐᕈᔨᑦ 7-ᓂᒃ ᑲᑎᒪᔨᖃᖅᑐᑦ ᐊᖓᔪᖅᑲᐅᑎᓂᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᓐᖔᖅᑐᑦ ᑲᓇᑕᒥ, ᐅᖁᒪᐃᓐᓂᕐᓂᐊᕐᕕᓕᕆᔨᒃᑯᓐᓂᑦ ᑲᓇᑕᒥ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ.  ᑖᒃᑯᐊ ᑎᓕᔭᐅᓯᒪᔾᔪᑎᖏᑦ ᕿᒥᕐᕈᔨᑦ ᐅᖓᕙᕆᐊᖅᑕᐅᓯᒪᓕᖅᑐᑦ ᐊᑐᖅᑕᐅᓂᒃᓴᖓ 2010-ᒧᑦ.

ᑲᔪᓯᑎᑕᐅᓪᓗᓂ ᐊᖏᖅᓯᒪᓂᕆᓚᐅᖅᑕᖓᑦ ᑲᔪᖏᖅᓴᐃᔾᔪᑎᖃᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᐋᓐᓂᐊᖃᕐᓇᖏᑦᑐᓕᕆᔨᖏᑦ, ᒐᕙᒪᒃᑯᑦ ᑐᓂᓯᓚᐅᖅᑐᑦ $305 ᒥᓕᐊᓐᓂᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᒋᐊᕈᑕᐅᓂᐊᕐᓗᑎᒃ ᐸᕐᓇᐅᑎᖏᑦ ᐃᑲᔪᖅᑐᐃᔾᔪᑕᐅᔪᑦ ᐊᓪᓚᓄᑦ ᐊᒻᒪ ᐃᓄᐃᑦ ᐋᓐᓂᐊᖅᑐᓕᕆᔭᐅᓂᖏᓐᓄᑦ ᐱᓕᕆᐊᖏᓐᓄᑦ ᐊᕐᕌᒎᒃ ᒪᕐᕉᒃ ᐊᓂᒍᖅᐸᑎᒃ.