ᓄᓇᕗᒥ ᐅᖃᐅᓯᑦ ᐃᓕᑕᕆᔭᐅᓯᒪᓂᖏᓐᓄᑦ ᐱᖁᔭᕐᔪᐊᖅ

ᖁᕕᐊᓱᒃᐳᖓ ᐃᑦᑐᐃᑦ ᑲᑎᒪᔨᖏᓐᓄᑦ ᐊᖏᖅᑕᐅᓯᒪᓕᕐᒪᑦ ᓄᓇᕗᒥ ᐅᖃᐅᓯᑦ ᒪᓕᒐᑎᒍᑦ ᐃᓕᑕᕆᔭᐅᓯᒪᓂᖏᓐᓄᑦ ᐱᖁᔭᕐᔪᐊᖅ.

ᐱᒋᐊᖅᑎᑎᓚᐅᖅᓯᒪᕗᖓ ᐃᑲᔪᖅᑐᐃᓪᓗᖓ ᑕᒪᑐᒥᖓ ᐊᑐᕚᒥ ᑲᑎᒪᕐᔪᐊᕐᕕᖕᒥ ᔫᓐ 2-ᖑᑎᓪᓗᒍ. ᑭᓯᐊᓂ ᓕᐳᕈᒃᑯᓐᓄᑦ ᓄᖅᑲᖓᑎᑕᐅᓚᐅᐱᓪᓚᓚᐅᖅᐳᖅ ᐃᑦᑐᐃᑦ ᑲᑎᒪᔨᖏᓐᓄᓪᓗ.

ᓄᓇᕗᑖᖅᑎᑕᐅᓯᒪᓕᖅᑎᓪᓗᑕ 1999-ᒥ, ᓄᓇᕗᒥᐅᑦ ᓄᓇᑦᓯᐊᒥ ᐅᖃᐅᓯᑦ ᒪᓕᒐᑎᒍᑦ ᐃᓕᑕᕆᔭᐅᓯᒪᓂᖏᓐᓄᑦ ᐱᖁᔭᕐᔪᐊᒥᒃ ᐱᓚᐅᖅᓯᒪᕗᑦ. ᖃᓪᓗᓈᑎᑐᑦ, ᐅᐃᕖᑎᑐᑦ ᐊᒻᒪᓗ ᐱᖓᓲᔪᖅᑐᑦ (6) ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ. ᑕᐃᒪᓐᓇᐃᒃᑲᓗᐊᖅᑎᓪᓗᒍ ᐊᔾᔨᐅᖏᑦᑑᖏᓐᓇᓚᐅᖅᐳᑦ ᐅᖃᐅᓯᖏᑦ ᓄᓇᕗᒥ. 70-ᐳᓴᓐ ᐅᖓᑖᓄᑦ ᓄᓇᕗᒥᐅᑦ ᐃᓄᐃᑦ ᐅᖃᓪᓚᖃᑦᑕᕐᒪᑕ ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᑦ. ᐊᓯᖏᓐᓂᒃ ᐅᖃᐅᓯᕐᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐅᖃᓪᓚᖃᑦᑕᖏᒻᒪᑕ.

ᓄᓇᕗᒥᐅᑦ ᐊᖏᕈᑎᖃᓚᐅᖅᐳᑦ ᐅᖃᐅᓯᑦ ᐃᓕᑕᕆᔭᐅᓯᒪᓂᖏᓐᓄᑦ ᐱᖁᔭᕐᔪᐊᒥᒃ ᔫᓐ 2008-ᒥ. ᐃᓕᑕᕆᔭᐅᓪᓗᑎᒃ ᐱᖁᔭᑎᒍᑦ ᖃᓪᓗᓈᑎᑐᑦ, ᐅᐃᕖᑎᑐᑦ, ᐃᓄᒃᑎᑐᑦ ᐃᓄᐃᓐᓇᖅᑎᑐᓪᓗ ᐅᖃᐅᓯᑦ ᓄᓇᕗᒥ, ᐊᒻᒪᓗ ᒪᓕᒐᓕᐅᖅᑎᑦ ᐅᖃᐅᓯᕐᓂᒃ ᑕᒪᒃᑯᓂᖓ ᐊᑐᕆᐊᖃᖅᖢᑎᒃ. ᑕᐃᒪᓐᓇ ᐃᑲᔪᖅᑕᐅᓂᐊᖅᖢᑎᒃ ᐸᐸᑕᐅᒋᐊᖃᕐᓂᖏᓐᓄᑦ ᐅᖃᐅᓯᑦ ᐃᓕᖁᓯᑐᖃᐃᓪᓗ ᐊᒻᒪᓗ ᐃᓄᐃᑦ ᐅᐱᓪᓗᑎᒃ ᑲᒪᒋᔭᖃᕈᓐᓇᖁᓪᓗᒋᑦ ᒐᕙᒪᒃᑯᑦ ᐱᓕᕆᕕᖏᓐᓂᒃ, ᐅᖃᓪᓚᒍᓐᓇᕐᓗᑎᒡᓗ ᐅᖃᐅᓯᕐᒥᖕᓂᒃ ᓯᕗᓂᒃᓴᒥᖕᓂᒡᓗ ᑲᒪᒋᔭᖃᕐᓗᑎᒃ. ᐊᐃᑦᑖᖑᒐᓗᐊᖅᐳᑦ ᓕᐳᕈᒃᑯᓐᓄᑦ ᑕᒪᓐᓇ ᓄᖅᑲᖅᑎᑕᐅᓇᓱᐊᓚᐅᕐᒪᑦ.

ᑭᓯᐊᓂ, ᐃᒃᐸᒃᓴᖅ, ᓕᐳᕈᒃᑯᑦ ᐊᖏᕈᑎᖃᓕᑕᐃᓐᓇᓚᐅᖅᐳᑦ ᐱᒋᐊᖅᑎᑕᐅᒍᑕᐅᓚᐅᖅᑐᒥᒃ. ᑲᓐᓲᕕᑎᒃᑯᑦ ᒐᕙᒪᒃᑯᖏᑦ ᐱᓕᕆᖃᑎᖃᐃᓐᓇᕐᓂᐊᖅᐳᑦ ᓄᓇᕗᒥᐅᓂᒃ ᐃᑲᔪᖅᑐᐃᓗᑎᒃ ᐃᓕᖁᓯᑐᖃᖏᓐᓂᒃ ᐱᖅᑯᓯᑐᖃᖏᓐᓂᒡᓗ.

ᒥᓂᔅᑕ ᓕᐅᓇ ᐊᒡᓘᒃᑲᖅ
ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᓇᑕᒥ,
ᒥᓂᔅᑕ ᐱᓕᕆᐊᖃᖅᑐᑦ ᐅᑭᐅᖅᑕᖅᑐᒥᐅᓂᒃ
ᓄᓇᕗᒧᑦ ᒪᓕᒐᓕᐅᖅᑎ ᐊᑐᕚᒥ