ᐃᖃᓗᐃᑦ — ᐲᑕ ᕚᓐ ᓘᓐ, ᒥᓂᔅᑕᕆᔭᐅᔪᖅ ᑕᖅᑲᒃᑯᐊ ᐊᑦᑕᓇᔾᔭᐃᖅᑕᐅᓯᒪᓂᖏᓐᓄᑦ, ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᓯᕗᓕᖅᑎᖓᑦ, ᐄᕙ ᐋᕆᐊᖅ, ᐊᒻᒪᓗ ᓕᐅᓇ ᐊᒡᓘᒃᑲᖅ, ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒥᓂᔅᑕ, ᐅᑭᐅᖅᑕᖅᑐᒥᐅᓂᒃ ᐱᔭᒃᓴᖅᑖᖅᑎᑕᐅᓯᒪᔪᖅ ᒥᓂᔅᑕ, ᓄᓇᕗᒻᒧᑦ ᒪᓕᒐᓕᐅᖅᑎᕐᔪᐊᑦ, ᓇᓗᓇᐃᖅᓯᖅᑲᐅᕗᑦ ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᒻᒥ ᑮᓇᐅᔭᐃᕈᑕᐅᓚᐅᖅᑐᑦ ᐃᓚᖓᒍᑦ ᐃᑲᔪᕐᓂᐊᕐᓂᕐᒥᖕᓂᒃ, ᐊᑐᕐᓗᒋᑦ ᐱᕐᓗᐊᕿᓂᕐᒧᑦ ᑮᓇᐅᔭᖅᑎᒍᑦ ᐃᑲᔫᑎᑦ, ᖄᒥᑦᑐᖃᖅᑐᐊᓘᓚᐅᖅᑎᓪᓗᒍ ᓯᖁᑦᑎᓚᐅᖅᖢᓂᓗ ᐃᑳᕈᑏᑦ ᐊᐳᑦ ᐊᐅᑲᓪᓚᓗᐊᕐᓂᖓᓄᑦ ᒪᖁᓗᐊᕐᓂᖓᓄᓪᓗ ᖃᓄᐃᓕᓂᕐᓗᖕᓂᐅᓚᐅᖅᑐᒧᑦ ᔫᓂ 2008-ᖑᑎᓪᓗᒍ.

 “ᑲᓇᑕᒥᐅᑦ ᐊᒃᑐᖅᑕᐅᔭᕌᖓᑕ ᓯᓚᒧᑦ ᐱᑎᑕᐅᓯᒪᔪᒧᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᖏᖅᓯᒪᑦᑎᐊᖅᐳᑦ ᐃᑲᔪᕐᓂᐊᕐᓂᕐᒥᒃ ᓄᓇᓕᖕᓂᒃ, “ᐅᖃᓚᐅᖅᑐᖅ ᒥᓂᔅᑕ ᕚᓐ ᓘᓐ.  ᖁᔭᓐᓇᒦᖅᐸᒃᑲ ᓄᓇᕗᒻᒥ ᓄᓇᓖᑦ ᐃᖅᑲᓇᐃᔭᑦᑎᐊᖅᑐᕐᔪᐊᒻᒪᕆᐊᓘᓚᐅᕐᒪᑕ ᐊᕐᕌᓂ ᖄᒥᑦᑐᖃᑲᓪᓚᓚᐅᖅᑎᓪᓗᒍ, ᐊᒻᒪᓗ ᑕᒪᓐᓇ ᓄᓇᓕᖕᓄᑦ ᐊᒃᓱᕈᕐᓇᑲᐃᓐᓇᓚᐅᖅᓯᒪᓪᓗᓂ ᑮᓇᐅᔭᖅᑎᒍᑦ.  ᐅᓪᓗᒥ ᓇᓗᓇᐃᖅᓯᓂᑦᑎᒍᑦ ᓇᓗᓇᕈᓐᓃᖅᑐᖅ ᑲᓇᑕᐅᑉ ᒐᕙᒪᒃᑯᖏᑦ ᑕᒫᓃᒻᒪᑕ ᐃᑲᔪᖅᑎᒃᓴᐅᓪᓗᑎᒃ ᒐᕙᒪᖃᕐᕕᖕᓂ ᖃᓪᓗᓈᑦ ᐊᒻᒪᓗ ᐅᑭᐅᖅᑕᖅᑑᑉ ᓄᓇᖏᓐᓂ ᐃᑲᔪᖅᑕᐅᔪᖅᑕᖃᕆᐊᖃᓕᕌᖓᑦ.”

“ᐅᓪᓗᒥ ᑕᒪᓐᓇ ᐊᔪᕐᓇᖅᑐᖅᓯᐅᕈᑕᐅᔪᖅ ᑕᐃᒃᑯᓄᖓ ᓄᓇᓕᖕᓄᑦ ᐊᒃᑐᖅᑕᐅᓯᒪᔪᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᓯᕗᓕᖅᑎ ᐋᕆᐊᖅ.  “ᓄᓇᕗᑦ ᒐᕙᒪᒃᑯᑦ ᐸᖕᓂᖅᑑᕐᒥᐅᓂᒃ ᓇᓗᓇᐃᖅᓯᕗᑦ ᒪᑭᑦᑎᐊᒃᑲᓐᓂᕈᓐᓇᓚᐅᕐᓂᖏᓐᓂᒃ ᐊᒻᒪᓗ ᐃᖅᑲᓇᐃᔭᑦᑎᐊᓚᐅᕐᓂᖏᓐᓂᒃ ᑕᒪᒃᑯᐊ ᐱᔨᑦᑎᕈᑏᑦ ᑲᔪᓰᓐᓇᕈᓐᓇᕐᓂᐊᕐᒪᑕ ᐊᒻᒪᓗ ᐱᖁᑎᕐᔪᐊᑦ ᓯᖁᑦᑎᓚᐅᖅᑐᑦ ᐋᖅᑭᒃᑕᐅᑦᑎᐊᕐᓂᐊᕐᒪᑕ.”

“ᒐᕙᒪᕗᑦ ᓄᓇᕗᒻᒥᐅᑦ ᐊᖓᔪᖅᑲᐅᑎᖏᓐᓂᒃ ᐃᖅᑲᓇᐃᔭᖃᑎᖃᑦᑎᐊᓚᐅᖅᑐᑦ ᖄᒥᓐᓂᐅᓚᐅᖅᑑᑉ ᑭᖑᕐᖓᓂ, ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᐊᒡᓘᒃᑲᖅ.  ᑲᓇᑕᒥᐅᓕᒫᑦ ᓇᓗᓇᐃᖅᓯᕕᒋᕙᕗᑦ ᑲᓇᑕᐅᑉ ᒐᕙᒪᒃᑯᖏᑦ ᐅᐸᓗᖓᐃᖅᓯᒪᓂᖏᓐᓂᒃ ᐃᑲᔪᖅᑎᐅᓂᐊᕐᓂᖏᓐᓂᒡᓗ ᖃᖓᑐᐃᓐᓇᖅ ᐱᕐᓗᐊᕿᓂᖅᑕᖃᖅᑎᓪᓗᒍ ᓄᓇᑦᑎᓐᓂ.”

12 ᐃᑲᕐᕋᑦ ᐅᖓᑖᓄᑦ ᔫᓂ 8 ᐊᒻᒪᓗ 9, 2008-ᖑᑎᓪᓗᒍ, ᐊᐳᑦ ᐊᐅᒃᐸᓪᓕᐊᒐᓴᓗᐊᕐᓂᖓ ᐊᒻᒪᓗ ᒪᖁᒡᔪᐊᓗᐊᕐᓂᖓ ᐱᔾᔪᑎᒋᓪᓗᒍ, ᐸᖕᓂᖅᑑᕐᒥ ᖄᒥᑦᑐᖃᖅᑐᐊᓘᓚᐅᖅᓯᒪᔪᖅ.  ᐊᐅᒃᐸᓪᓕᐊᓚᓴᓗᐊᕐᓂᖓ ᒪᖁᓗᐊᕐᓂᖓᓗ ᐱᔾᔪᑎᒋᓪᓗᒍ, ᓄᓇᐅᑉ ᐃᑭᐊᖓᓂ ᐊᐅᓱᐃᑦᑑᒐᓗᐊᖅ ᐊᐅᖕᒪᑦ ᐃᑳᕈᑦ ᐃᒥᓚᐅᖅᓯᒪᔪᖅ ᐸᖕᓂᖅᑑᑉ ᑰᖓ ᖄᒥᓐᓂᖓᓄᑦ, ᓯᖁᒥᑕᐅᓪᓗᑎᒡᓗ ᒪᕐᕉᒃ ᐃᑳᕈᑏᒃ ᐊᒻᒪᓗ ᐃᑳᕈᑦ ᐊᖅᑯᓯᐅᖅᓯᒪᔪᓃᑦᑐᑦ, ᐊᒻᒪᓗ ᑖᒃᑯᐊ ᓯᖁᒥᑕᐅᓂᖏᓐᓄᑦ ᐃᒥᖅᑕᖅᑕᐅᔪᓐᓇᐃᓪᓕᐅᖅᑲᑲᐃᓐᓇᓚᐅᖅᑐᑦ ᐸᖕᓂᖅᑑᕐᒥᐅᑦ. 

“ᖁᔭᓐᓇᒦᕈᒪᔭᒃᑲ ᑲᓇᑕᐅᑉ ᒐᕙᒪᒃᑯᖏᑦ ᐅᔾᔨᕆᓚᐅᕐᒪᑕ ᑐᐊᕕᕐᓇᖅᑐᖅᓯᐅᓚᐅᕐᓂᖏᑦ ᐸᖕᓂᖅᑑᒥᐅᑦ, ᐃᑳᕈᑦ ᐃᒥᖕᒪᑦ ᔫᓂ 2008-ᖑᑎᓪᓗᒍ.  ᑕᒪᓐᓇ ᐱᕐᔪᐊᒻᒪᕆᐊᓗᒃ ᐅᑎᖅᑎᑦᑎᓇᓱᒃᑎᓪᓗᑕ ᑐᐊᕕᕐᓇᖅᑐᓕᕆᓂᕐᒧᑦ ᑮᓇᐅᔭᐃᕈᑎᖃᓚᐅᖅᑎᓪᓗᑕ ᓄᓇᓖᑦ ᐃᑳᕈᑎᖏᑦᑕ ᐋᖅᑭᒃᓱᖅᑕᐅᓂᖏᓐᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᓗᐊᓐ ᑯᓱᒐᖅ, ᒥᓂᔅᑕᕆᔭᐅᔪᖅ ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᑎᖅᑎᖏᓐᓄᑦ ᐊᒻᒪᓗ ᐆᒻᒪᖅᑯᑎᓕᕆᓂᕐᒧᑦ ᒥᓂᔅᑕ.

ᑐᑭᓯᒋᐊᒃᑲᓐᓂᕈᒪᒍᕕᑦ ᑕᒪᑐᒪ ᒥᒃᓵᓄᑦ ᐊᒻᒪᓗ ᖃᓄᐃᑦᑐᓂᒃ ᒪᓕᒐᖅᑕᖃᐅᕐᒪᖔᖓ, ᐅᕘᓇ ᖃᕆᓴᐅᔭᒃᑰᖅᑎᑕᐅᓯᒪᔪᓂᒃ ᑕᑯᒋᐊᕈᓐᓇᖅᑐᑎᑦ, ᑐᕌᕈᑖ www.publicsafety.gc.ca.