ᐊᕐᕕᐊᑦ, ᓄᓇᕗᑦ, ᓯᑎᐱᕆ 23, 2009 - ᓕᐅᓇ ᐊᒡᓗᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᕐᔪᐊᒃᑯᓐᓄᑦ, ᑭᒡᒐᖅᑐᖅᑐᒍ ᒋᐅᕆ ᒍᑦᔨᐅ, ᒥᓂᔅᑕ (ᖃᐅᔨᓴᖅᑐᓕᕆᓂᕐᒧᑦ ᓄᑖᕐᖑᐸᓪᓕᐊᔪᓕᕆᓂᕐᒧᓪᓗ), ᐱᖃᑎᖃᖅᑐᑎᒃ ᑖᓂᐊᓕ ᓲᓴᒃ, ᓄᓇᕗᒻᒥ ᒥᓂᔅᑕ ᐊᕙᑎᓕᕆᔨᒃᑯᓐᓄᑦ, ᒥᓂᔅᑕ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᒥᓂᔅᑕᐅᓪᓗᓂᓗ ᑲᒪᒋᔭᖃᖅᑐᖅ ᓄᓇᕗᑦ ᓯᓚᑦᑐᓴᕐᕕᒃᑯᓐᓂᒃ, ᐅᓪᓗᒥ ᐅᖃᐅᓯᖃᖅᑕᐅᔪᑦ ᐅᖓᑖᓃᑦᑐᓂᒃ $4.9 ᒥᓕᐊᓐ ᐱᖁᑎᕐᔪᐊᓄᑦ ᑮᓇᐅᔭᖃᖅᑎᑦᓯᓂᕐᒧᑦ ᓄᓇᕗᑦ ᓯᓚᑦᑐᓴᕐᕕᒃᑯᑦ ᐃᓕᓴᕕᖏᓐᓄᑦ ᓄᓇᓕᓐᓂᓗ ᐃᓕᓴᕕᖏᓐᓄᑦ.
ᐃᓚᒋᔭᐅᓪᓗᓂ ᑲᓇᑕᐅᑉ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑎᖓᑕ, ᑲᓇᑕᐅᑉ ᒐᕙᒪᒃᑯᖏᑦ ᓴᖅᑭᖅᓯᓯᒪᔪᑦ ᖃᐅᔨᒪᓕᖅᐸᓪᓕᐊᓂᕐᒧᑦ ᐱᖁᑎᕐᔪᐊᓂᒃ ᐱᓕᕆᐊᒥᒃ, ᐊᕐᕌᒎᓐᓄᑦ ᒪᕐᕉᓐᓄᑦ $2 ᐱᓕᐊᓐ ᐱᕙᓪᓕᐊᔪᓕᕆᓂᕐᒧᑦ ᑲᔪᖏᖅᓴᐃᒍᑎᑦᓴᓂᒃ ᐃᑲᔪᕈᑕᐅᓂᐊᕐᓗᑎᒃ ᐊᑭᑐᔫᑎᓄᑦ ᑲᓇᑕᒥ ᓯᓚᑦᑐᓴᕐᕕᖏᓐᓂ, ᐃᓚᒋᔭᐅᓪᓗᑎᒃ ᓯᓚᑦᑐᓴᕐᕕᔾᔪᐊᑦ ᓄᓇᓕᓐᓂᓗ ᓯᓚᑦᑐᓴᕐᕖᑦ. ᐅᓪᓗᒥ ᐅᖃᐅᓯᐅᔪᑦ ᖁᕕᐊᓱᐊᒍᑎᖃᕈᑕᐅᔪᑦ ᐱᓕᕆᐊᓂᒃ ᐱᔪᓐᓇᖃᑕᐅᓂᐊᖅᑐᓂᒃ ᓄᓇᕗᒻᒥ ᐱᓕᕆᐊᑎᒍᑦ.
“ᒐᕙᒪᒋᔭᑦᑕ ᑮᓇᐅᔭᖃᖅᑎᑦᓯᓂᖏᑦ ᓴᖅᑭᖅᓯᒍᑕᐅᓂᐊᖅᑐᑦ ᐃᖅᑲᓇᐃᔮᑦᓴᓂᒃ ᑖᒃᑯᓇᓂ ᓄᓇᓕᓐᓂ ᓴᙱᓕᖅᐹᓪᓕᕈᑕᐅᓗᑎᓪᓗ ᓄᓇᕗᒻᒥ ᐊᑯᓂᐅᔪᒧᑦ ᐱᔪᓐᓇᕐᓂᖅᑖᖅᐸᓪᓕᐊᑎᑦᓯᓂᕐᒧᑦ ᖃᐅᔨᓴᖅᑐᓕᕆᓂᕐᒧᑦ ᓄᑖᕐᖑᐸᓪᓕᐊᔪᓂᓪᓗ ᓴᖅᑭᖅᓯᕙᓪᓕᐊᓂᕐᒧᑦ,” ᐅᖃᖅᓯᒪᔪᖅ ᒥᓂᔅᑕ ᐊᒡᓗᒃᑲᖅ. “ᓄᑖᕐᖑᕆᐊᖅᑕᐅᓂᖏᑦ ᓯᓚᑦᑐᓴᕐᕖᑦ ᓇᓗᓇᐃᖅᓯᒍᑕᐅᓂᐊᖅᑐᖅ ᐃᓕᓐᓂᐊᖅᑏᑦ ᐱᓕᒻᒪᑦᓴᒍᓐᓇᕐᓂᖏᓐᓂᒃ ᖃᐅᔨᓴᖅᑏᓪᓗ ᐱᔾᔪᑎᑦᓴᖅᑖᕈᓐᓇᖁᓪᓗᒋᑦ ᖃᐅᔨᒐᓱᐊᖅᑎᓪᓗᒋᑦ ᐱᕚᓪᓕᕈᑕᐅᓂᐊᖅᑐᓂᒃ ᑲᓇᑕᒥᐅᓄᑦ ᓄᓇᕐᔪᐊᓕᒫᒥᐅᑕᓄᓪᓗ.”
ᐱᓕᕆᐊᖅ ᐃᑲᔪᕈᑕᐅᓂᐊᖅᑐᖅ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ ᑲᔪᖏᖅᓴᐃᒍᑕᐅᓗᓂ ᓴᖅᑭᖅᓯᒍᑕᐅᓗᓂᓗ ᐃᖅᑲᓇᐃᔮᑦᓴᓂᒃ ᖃᐅᔨᒪᔨᒻᒪᕆᓐᓄᑦ, ᓴᓇᔭᐅᓯᒪᓂᕐᓂᒃ ᑎᑎᖅᑐᒐᖅᑎᓄᑦ, ᓴᓇᔪᓕᕆᔨᕈᔪᓐᓄᓪᓗ. ᓴᖅᑭᖅᓯᕙᓪᓕᐊᒍᑕᐅᒻᒥᔪᑦ ᓄᑖᖑᓂᖅᐹᓂᒃ ᖃᕆᓴᐅᔭᒃᑰᕈᑎᓂᒃ ᑲᓇᑕᒥ ᖃᐅᔨᓴᕈᑕᐅᕙᑦᑐᑦ ᐃᓕᓐᓂᐊᖅᑎᑦᓯᒍᑕᐅᕙᑦᑐᓪᓗ ᐃᓪᓗᕐᔪᐊᖏᓐᓄᑦ ᓯᕗᕌᓃᒃᑲᓐᓂᖁᓪᓗᒍ ᖃᐅᔨᓴᖅᑐᓕᕆᓂᕐᒧᑦ ᐱᕙᓪᓕᐊᓂᖅ.
ᑮᓇᐅᔭᖃᖅᑎᑦᓯᒍᑕᐅᔪᑦ ᐅᓪᓗᒥ ᐅᖃᐅᓯᐅᖅᑲᐅᔪᑦ ᐃᓚᒋᔭᖃᖅᑐᑦ $2.2 ᒥᓕᐊᓐ ᒐᕙᒪᑐᖃᒃᑯᓐᓂᒃ, ᐊᒻᒪᓗ $2.76 ᒥᓕᐊᓐ ᓄᓇᕗᑦ ᒐᕙᒪᒃᑯᖏᓐᓂᒃ.
“ᖃᕆᓴᐅᔭᓕᕆᓂᕐᒧᑦ ᐊᑭᑐᔫᑎᓄᑦ ᐱᓕᕆᐊᖅ ᐊᓪᓗᕆᐊᕈᑕᐅᒻᒪᕆᑦᑐᖅ ᐱᐅᓯᕚᓪᓕᖅᑕᐅᖁᓪᓗᒋᑦ ᓯᓚᑦᑐᓴᕐᕕᓐᓂ ᐱᓕᕆᐊᑦ ᐱᔨᑦᓯᕋᐅᑏᓪᓗ ᓄᓇᓕᓕᒫᑦᑎᓐᓂ ᓄᓇᕗᒻᒥ ᑐᓴᕈᒥᓇᖅᑐᓂᓪᓗ ᐊᑦᑐᐃᓂᖃᕐᓂᐊᖅᑐᑦ ᐃᓘᓐᓇᖏᓐᓂ 25-ᓂ ᓄᓇᓕᓐᓂ. ᑐᙵᕕᓕᐅᕈᑕᐅᓂᐊᖅᑐᑦ ᑐᓴᐅᒪᖃᑦᑕᐅᑎᕈᓘᔭᕐᓂᒃ ᖃᕆᓴᐅᔭᒃᑯᑦ ᐃᓕᓐᓂᐊᕈᓐᓇᕐᓂᖅ ᖃᐅᔨᓴᕈᓐᓇᕐᓂᕐᓗ ᐊᑐᐃᓐᓇᐅᒃᑲᓐᓂᖁᓪᓗᒍ ᓄᓇᕗᒻᒥᐅᓕᒫᓄᑦ ᓄᓇᓕᓐᓂ ᐃᓕᓴᕕᖏᑎᒍᑦ,” ᐅᖃᖅᓯᒪᔪᖅ ᒥᓂᔅᑕ ᓲᓴᒃ. “ᑕᒪᓐᓇ ᐱᕕᖃᑦᓯᐊᕈᑕᐅᓂᐊᖅᑐᖅ ᓄᓇᕗᒻᒥᐅᓕᒫᓄᑦ ᐊᑑᑎᖃᕈᓐᓇᖁᓪᓗᒋᑦ ᐃᓕᓐᓂᐊᕈᑎᑦᓴᓂᒃ ᓇᒻᒥᓂ ᓄᓇᖏᓐᓃᓪᓗᑎᒃ.”
ᑲᓇᑕᐅᑉ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑎᖓ ᑲᔪᖏᖅᓴᐃᒍᑕᐅᓂᐊᖅᑐᓂᒃ ᑲᓇᑕᒥ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ ᐊᕐᕌᒎᓂᐊᖅᑑᓐᓂᒃ ᒪᕐᕉᓐᓂᒃ ᐱᐅᓯᕚᓪᓕᖅᓯᒍᑕᐅᓗᑎᓪᓗ ᐊᑯᓂᐅᔪᒧᑦ ᐊᑭᑦᑐᕋᐅᑎᖃᑕᐅᒍᓐᓇᕐᓂᖏᓐᓂᒃ $12 ᐱᓕᐊᓐ ᓄᑖᑦ ᐱᖁᑎᕐᔪᐊᓄᑦ ᑮᓇᐅᔭᖃᖅᑎᑦᓯᒍᑎᖏᑦ, ᐃᓚᒋᔭᐅᓪᓗᑎᒃ $2 ᐱᓕᐊᓐ ᖃᐅᔨᒪᓕᖅᐸᓪᓕᐊᓂᕐᒧᑦ ᐱᖁᑎᕐᔪᐊᓂᒃ ᐱᓕᕆᐊᒥᒃ. ᑖᒃᑯᐊ ᓄᑖᑦ ᐃᑲᔪᖅᓯᒍᑕᐅᔪᑦ ᑐᒡᓕᐊᓂ ᑮᓇᐅᔭᖃᖅᑎᑦᓯᒍᑎᒻᒪᕆᐅᓂᐊᖅᑐᑦ ᑲᓇᑕᐅᑉ ᒐᕙᒪᒃᑯᖏᑕ ᐊᕐᕌᒍᕋᓴᕐᓄᑦ ᖃᐅᔨᓴᖅᑐᓕᕆᓂᕐᒧᑦ ᓄᑖᕐᖑᐸᓪᓕᐊᔪᓕᕆᓂᕐᒧᓪᓗ ᖃᓄᖅᑑᕈᑎᖓᓂ, ᓅᒋᐊᖅᑎᑦᓯᓂᖅ ᖃᐅᔨᓴᖅᑐᓕᕆᓂᕐᒥᒃ ᓄᑖᕐᖑᐸᓪᓕᐊᔪᓕᕆᓂᕐᒥᓪᓗ ᑲᓇᑕᒧᑦ ᐱᕚᓪᓕᕈᑎᑦᓴᓂᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒪᓕᖅᐸᓪᓕᐊᓂᕐᒧᑦ ᐱᖁᑎᕐᔪᐊᓂᒃ ᐱᓕᕆᐊᑉ ᒥᑦᓵᓄᑦ, ᖃᐅᔨᒋᐊᕐᕕᒋᒍᓐᓇᑕᐃᑦ ᖃᕆᓴᐅᔭᒃᑯᑦ www.ic.gc.ca/knowledge-infrastructure.
ᑐᑭᓯᒋᐊᒃᑲᓐᓂᕈᒪᒍᕕᑦ ᑲᓇᑕᐅᑉ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑎᖓᑕ ᒥᑦᓵᓄᑦ, ᑕᑯᒋᐊᕈᒃ www.actionplan.gc.ca.
