ᐃᖃᓗᐃᑦ, ᓄᓇᕗᑦ, ᔫᓐ 19, 2009 - ᐃᓄᐃᑦ ᐊᔪᖏᓴᖅᑎᑕᐅᓂᐊᖅᐳᑦ ᐃᖅᑲᓇᐃᔭᖅᑎᑕᐅᓗᑎᒡᓗ ᐃᓕᓐᓂᐊᖅᑎᑕᐅᓗᑎᒡᓗ ᐊᑯᓂ ᐃᖃᓗᓕᕆᔪᓐᓇᕐᓂᖏᓐᓄᑦ ᐃᓕᓐᓂᐊᖅᑎᑕᐅᓪᓚᕆᒡᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᑐᓴᖅᑎᑎᓚᐅᖅᐳᖅ ᑕᐃᐋᓐ ᕕᓐᓕ, ᒥᓂᔅᑕ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᔪᖏᓴᖅᑐᓕᕆᓂᕐᒧᓪᓗ ᐱᕙᓪᓕᐊᑎᑎᔨᑦ ᑲᓇᑕᐅᑉ ᒐᕙᒪᒃᑯᖏᓐᓂ.
ᓄᓇᕗᒥ ᐱᕙᓪᓕᐊᑎᑎᓂᕐᒧᑦ ᐃᖃᓗᓕᕆᓂᕐᒧᑦ ᐃᓕᓐᓂᐊᕈᑎᒃᓴᖅ, ᓄᓇᕗᒥᐅᓄᑦ ᐃᖃᓗᓕᕆᓂᕐᒧᑦ ᐃᓕᓐᓂᐊᕈᑎᒃᓴᓕᕆᔨᒃᑯᑦ, ᑮᓇᐅᔭᖃᖅᑎᑎᓂᐊᖅᐳᑦ ᑲᓇᑕᐅᑉ ᒐᕙᒪᒃᑯᖏᑦᑕ ᓄᓇᖃᖅᑳᖅᓯᒪᔪᑦ ᐊᔪᖏᓴᕆᐊᖃᕐᓂᖏᓐᓄᑦ ᐃᖅᑲᓇᐃᔭᖅᑎᑕᐅᒋᐊᖃᕐᓂᖏᓐᓄᑦ ᐱᓕᕆᖃᑎᒌᒍᑕᐅᓪᓗᓂ (ASEP) ᐃᓕᓐᓂᐊᖅᑎᑎᓂᐊᖅᐳᑦ ᑖᒃᑯᑎᒎᓇ. ᐃᖃᓗᓕᕆᓂᖅ ᓇᓗᓇᐃᖅᑕᐅᓯᒪᕗᖅ ᓄᓇᕗᑦ ᒐᕙᒪᒃᑯᖏᓐᓄᑦ ᑮᓇᐅᔭᓕᐅᕈᑕᐅᔪᓐᓇᖃᑕᐅᓂᖓᓄᑦ ᐱᖓᓱᓂᑦ ᐱᓕᕆᐊᓂᑦ.
"ᒐᕙᒪᕗᑦ ᐱᓕᕆᐊᖃᕈᒪᖕᒪᑕ ᑲᓇᑕᐅᑉ ᐃᖅᑲᓇᐃᔭᖅᑎᒋᕙᒃᑕᖏᑦ ᓯᕗᓂᒃᓴᖃᑦᓯᐊᖁᓪᓗᒋᑦ ᐃᓕᓐᓂᐊᖅᑎᑕᐅᓯᒪᑦᓯᐊᕐᓗᑎᒃ, ᐊᔪᖏᑦᓯᐊᕐᓗᑎᒡᓗ ᓇᓂᑐᐃᓐᓇᖅ ᓯᓚᕐᔪᐊᒥ ᐊᔪᖏᓪᓗᑎᒃ ᐱᓕᕆᐊᒥᖕᓂᒃ," ᐅᖃᓚᐅᖅᐳᖅ ᕕᓐᓕ. "ᑖᒃᑯᐊ ᑮᓇᐅᔭᑦ ᐊᑐᕐᓂᐊᖅᑕᕗᑦ $2.9-ᒥᓕᔭᓐᑖᓚᐃᑦ ᐃᓕᓐᓂᐊᖅᑎᑎᒍᑕᐅᓂᐊᖅᐳᑦ ᐊᔪᖏᓴᕐᓂᕐᒧᑦ ᐱᕙᓪᓕᐊᒍᑕᐅᓂᐊᖅᖢᑎᒡᓗ 170-ᓄᑦ ᐃᓄᖕᓄᑦ, ᐱᓕᕆᐊᒃᓴᖃᕈᓐᓇᖁᓪᓗᒋᑦ 100-ᓂᒃ ᐊᑯᓂ ᓄᓇᕗᑦ ᐃᖃᓗᓕᕆᕙᓪᓕᐊᓂᖏᓐᓄᑦ."
"ᑖᓐᓇ ᐃᓕᓐᓂᐊᕈᑕᐅᓂᐊᖅᑐᖅ ᐊᑐᕐᓂᐊᖅᐳᖅ ᐊᔪᖏᑦᑐᓂᒃ ᑕᕆᐅᒥ ᐃᖃᓗᓕᕆᖃᑦᑕᕈᓐᓇᖅᑐᓂᒃ ᐱᑕᖃᖁᓪᓗᒍ, ᓄᓇᒥᓗ ᐃᑎᔪᒥᓗ ᐃᖅᑲᓇᐃᔭᖅᑎᖃᕈᓐᓇᖁᓪᓗᑕ, ᑮᓇᐅᔭᓕᐅᕈᑎᒃᓴᖃᑦᓯᐊᖁᓪᓗᑕ," ᐅᖃᓚᐅᖅᐳᖅ ᒥᓯᓯ ᓕᔅ ᑭᔭᓐ, ᑐᑭᒧᐊᒃᑎᑎᔨᐅᖃᑕᐅᔪᖅ, ᓄᓇᕗᒥ ᐃᖃᓗᓕᕆᓂᕐᒧᑦ ᐃᓕᓐᓂᐊᖅᑎᑎᔨᐅᔪᓂᑦ.
ᑕᒪᓐᓇ ᐱᓕᕆᐊᕆᔭᐅᓂᐊᖅᑐᖅ ᐃᓕᓐᓂᐊᕈᑕᐅᓗᓂ ᑲᑐᔾᔨᖃᑎᒌᒍᑕᐅᓪᓗᓂ ᐃᖃᓗᓕᕆᔨᒃᑯᓪᓗ, ᑲᓇᑕᐅᑉ ᓄᓇᑦᓯᐊᓪᓗ ᒐᕙᒪᒃᑯᖏᑦ, ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᑦᑕᓗ ᓄᓇᕗᒥ ᓯᓚᑦᑐᖅᓴᕐᕕᓕᕆᔨᒃᑯᓐᓄᓪᓗ, ᐱᒋᐊᖅᑕᐅᓯᒪᓪᓗᓂ ᐃᑲᔪᖅᑕᐅᓂᖃᖁᓪᓗᒋᑦ ᐃᓄᐃᑦ ᐃᖃᓕᕆᔨᐅᓂᕐᒧᑦ.
"ᑮᓇᐅᔭᑦ ᓄᓇᕗᒥ ᐃᖃᓗᓕᕆᓂᕐᒧᑦ ᐃᓕᓐᓂᐊᖅᑎᑎᔨᓂᑦ ᐱᔭᐅᔪᖅ ᐃᑲᔪᕈᑕᐅᓪᓚᕆᖕᓂᐊᖅᐳᖅ ᐱᕙᓪᓕᐊᑎᑕᐅᒃᑲᓐᓂᕐᓂᖏᓐᓄᑦ ᓄᓇᕗᒥ ᐃᖃᓗᓕᕆᓂᖅ," ᐅᖃᓚᐅᖅᐳᖅ ᒥᓂᔅᑕ ᑖᓂᐅ ᓲᓴᒃ, ᒥᓂᔅᑕ ᐊᕙᑎᒥᐅᑕᓕᕆᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓂ. "ᑖᒃᑯᐊ ᑎᒥᐅᔪᑦ ᐃᓕᓐᓂᐊᕐᓂᕐᒧᑦ ᐱᓕᕆᓂᐊᖅᑐᑦ ᐊᑲᐅᓯᕚᓪᓕᕈᑕᐅᓂᐊᖅᐳᑦ ᐃᓕᓐᓂᐊᖅᑎᑎᒍᑕᐅᓗᓂᓗ ᐃᓄᖕᓂᒃ, ᐃᖅᑲᓇᐃᔭᕈᓐᓇᖁᓪᓗᒋᑦ ᑮᓇᐅᔭᓕᐅᕈᑎᖃᖁᓪᓗᒋᓪᓗ ᐱᕙᓪᓕᐊᑎᑕᐅᓂᖓᓂ ᓄᓇᕗᒥ ᐃᖃᓗᓕᕆᓂᖅ."
ᓄᓇᖃᖅᑳᖅᓯᒪᔪᑦ ᐊᔪᖏᓴᖅᑎᑕᐅᓂᖏᓐᓄᑦ ᐃᖅᑲᓇᐃᔭᖅᑎᑕᐅᓂᖏᓐᓄᓪᓗ ᑲᑐᔾᔨᖃᑎᒌᒍᑕᐅᔪᖅ ᐱᔾᔪᑎᖃᖅᐳᖅ ᓄᓇᖃᖅᑳᖅᓯᒪᔪᑦ ᐃᖅᑲᓇᐃᔭᖅᑖᖅᑎᑕᐅᕙᓪᓕᐊᖁᓪᓗᒋᑦ ᐊᔪᖏᓴᕐᓗᑎᒃ ᐃᓕᓐᓂᐊᖅᑎᑕᐅᓗᑎᒡᓗ ᐃᓚᐅᔪᓐᓇᖁᓪᓗᒋᑦ ᑮᓇᐅᔭᓕᐅᕐᓂᕐᒧᑦ. ᑕᐃᒪᓐᓇ ᑲᑐᔾᔨᖃᑎᒌᒃᖢᑎᒃ ᐱᓕᕆᐊᖃᖅᖢᑎᒃ, ᑲᓇᑕᐅᑉ ᒐᕙᒪᒃᑯᖏᑦ ᐱᑕᖃᖅᑎᑎᓇᓱᐊᖅᐳᑦ ᑲᓇᑕᒥ ᐃᖅᑲᓇᐃᔭᖅᑎᑦ ᓯᕗᓂᒃᓴᖃᑦᓯᐊᕈᓐᓇᖁᓪᓗᒋᑦ ᐃᓕᓐᓂᐊᖅᑎᑕᐅᓯᒪᓗᑎᒃ, ᐊᔪᖏᑦᓯᐊᕐᓗᑎᒡᓗ ᓇᓂᑐᐃᓐᓇᖅ ᓯᓚᕐᔪᐊᒥ ᐱᓕᕆᐊᕆᔪᓐᓇᖅᑕᒥᖕᓂᒃ.
ᑲᓇᑕᒥ ᑮᓇᐅᔭᒃᓴᐅᑎᖃᕐᓂᕐᒧᑦ ᐸᕐᓇᒍᑕᐅᔪᑎᒍᑦ, ᑮᓇᐅᔭᖁᑎᒋᔭᐅᔪᑦ 2009-ᒥ ᐊᑐᕐᓗᒋᑦ ᒐᕙᒪᒃᑯᑦ ᐱᕙᓪᓕᐊᑎᑎᒍᑎᖃᖅᐳᑦ ᐃᓕᓐᓂᐊᖅᑎᑕᐅᒍᑎᒃᓴᓂᒃ ᐊᒻᒪᓗ $100-ᒥᓕᔭᒃᑲᓐᓂᖃᖅᖢᑎᒃ ᐅᑭᐅᓄᑦ ᐱᖓᓱᓄᑦ ᐊᑐᕐᓂᐊᖅᑐᓄᑦ ᑲᓇᑕᒥ ᑕᐃᒪᓐᓇ ᐱᓕᕆᒍᑎᒃᓴᓂᒃ ᐃᓕᓐᓂᐊᖅᑎᑎᓂᕐᒧᑦ. ᑕᒪᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐃᑲᔪᕐᓂᐊᖅᐳᑦ 25-ᓂᒃ ᑕᐃᒪᓐᓇ ᓄᑖᒃᑯᑦ ᐃᓕᓐᓂᐊᕐᓂᐊᖅᑐᓂᒃ, ᐃᖅᑲᓇᐃᔭᖅᑎᑕᐅᓕᕈᓐᓇᖅᖢᑎᒡᓗ 6,000 ᓄᓇᖃᖅᑳᖅᓯᒪᔪᑦ ᓇᓂᑐᐃᓐᓇᖅ ᑲᓇᑕᒥᐅᑕᐃᑦ.
ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᒃᓴᐅᑎᖃᖅᑎᑎᓂᕐᒧᑦ ᐸᕐᓇᐅᑎᒋᓯᒪᔭᖓᑦ ᓴᖅᑭᔮᖅᑎᑎᒍᑕᐅᓂᐊᖅᐳᑦ ᐱᓕᕆᐊᒃᓴᖃᖅᑎᑕᐅᓂᖅᓴᐅᓕᖁᓪᓗᒋᓪᓗ ᓄᓇᖃᖅᑳᖅᓯᒪᔪᑦ ᑲᓇᑕᒥᐅᑕᐃᑦ ᐃᑲᔪᖅᑕᐅᕙᓪᓕᐊᖁᓪᓗᒋᓪᓗ ᓄᓇᖃᖅᑳᖅᓯᒪᔪᑦ ᐊᔪᖏᓴᖅᑎᑕᐅᓗᑎᒃ ᐃᖅᑲᓇᐃᔭᒐᒃᓴᖃᖅᑎᑕᐅᓗᑎᒡᓗ.
