ᓄᓇᕗᑦ - ᑲᓇᑕᐅᑉ ᒐᕙᒪᒃᑯᖏᓐᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕ ᐊᒻᒪ ᒥᓂᔅᑕ ᐱᓕᕆᐊᖃᖅᑐᖅ ᐅᑭᐅᖅᑕᖅᑐᒥᐅᓂᒃ ᒪᓕᒐᓕᐅᖅᑎᐅᓪᓗᓂᓗ ᐊᑐᕚᒥ ᓄᓇᕗᒥᐅᓄᑦ, ᓕᐅᓇ ᐊᒡᓗᒃᑲᖅ, ᖁᕕᐊᓱᒃᐳᖅ ᐳᓚᕋᕐᓂᕋᓚᐅᖅᑕᒥᓂᒃ ᓄᓇᓕᖕᓄᑦ ᐅᑭᐅᖅᑕᖅᑐᒥᐅᓄᑦ.
ᐅᓪᓗᓂ ᐳᓚᕋᕐᓂᕆᓚᐅᖅᑕᒥᓂ, ᒥᓂᔅᑕ ᐊᒡᓗᒃᑲᖅ ᑎᑭᔪᓐᓇᓚᐅᖅᐳᖅ ᑭᓐᖓᕐᓄᑦ, ᓴᓂᕋᔭᖕᒧᑦ, ᐃᒡᓗᓕᖕᒧᑦ, ᑰᕌᕐᕈᖕᒧᑦ, ᓴᓪᓕᕐᒧᑦ, ᐃᒡᓗᓕᒑᕐᔪᖕᒧᑦ, ᐊᕐᕕᐊᓄᑦ, ᑎᑭᕋᕐᔪᐊᒧᑦ ᑲᖏᖅᖠᓂᕐᒧᓪᓗ. ᒥᓂᔅᑕ ᖁᔭᓐᓇᒦᕈᒪᓚᐅᖅᖢᑎᒃ ᑕᒪᐃᓐᓂᒃ ᐃᓄᖕᓂᒃ ᑲᑎᖃᑎᒋᔪᓐᓇᓚᐅᖅᑕᒥᓂᒃ.
"ᖁᕕᐊᓱᑦᓯᐊᓚᐅᖅᐳᖓ ᐊᖏᕐᕋᐅᔪᓐᓇᓚᐅᕋᒪ," ᐅᖃᓚᐅᖅᐳᖅ ᐊᒡᓗᒃᑲᖅ. " ᐅᖃᓪᓚᒍᓐᓇᓚᐅᖅᖢᖓᓗ ᐃᓄᖕᓄᑦ ᓄᓇᓕᖕᓂ ᓈᓚᐅᑎᒃᑯᑦ, ᑲᑎᖃᑎᖃᕈᓐᓇᖅᖢᖓᓗ ᐃᓄᖕᓂᒃ ᐊᔾᔨᒌᖏᑦᑐᓂᒃ ᖃᓄᐃᓕᐅᕈᑎᖃᖅᖢᑕ ᓄᓇᓕᖕᓂᓗ ᑭᒡᒐᖅᑐᖅᑎᐅᔪᓂᒃ ᑲᑎᒪᖃᑎᖃᕈᓐᓇᓚᐅᕋᒪ."
ᒥᓂᔅᑕ ᐊᒡᓗᒃᑲᖅ ᐅᖃᓚᐅᖅᐳᖅ ᐱᓕᕆᐊᒃᓴᖃᒻᒪᕆᒃᑲᓗᐊᖅᖢᓂ ᐊᑐᕚᒥ, ᐱᒻᒪᕆᐅᖕᒪᑦ ᐊᖏᕐᕋᐅᒋᐊᖃᕐᓂᖅ ᑐᓴᕆᐊᖅᑐᕐᓗᓂᓗ ᐃᓱᒫᓗᒍᑎᒋᔭᐅᔪᓂᒃ ᓄᓇᓕᖕᓂᒥᐅᓄᑦ. ᐅᖃᓚᐅᖅᖢᓂᓗ ᓄᓇᕗᒥ ᐱᒍᒪᔭᐅᖅᑳᖅᑐᑦ ᐃᓱᒪᒋᖏᓐᓇᕆᐊᖃᖃᑦᑕᕋᒥᒋᑦ.
"ᓄᓇᓕᖕᓄᐊᕋᔭᒋᐊᒃᓴᖅ ᐱᐊᓂᓵᓚᐅᖅᑕᓐᓂᒃ ᐊᒻᒪᓗ ᐸᖕᓂᖅᑑᓕᐊᕈᓐᓇᓚᐅᖅᖢᖓ ᐅᕙᓘᓐᓃᑦ ᐃᖃᓗᒃᑑᑦᓯᐊᒧᑦ ᑐᓴᕆᐊᖅᑐᖅᖢᖓ ᓂᕈᐊᖅᑎᒋᓯᒪᔭᓐᓂᒃ ᐱᒻᒪᕆᐅᕗᖅ. ᐃᓱᒪᒋᖏᓐᓇᖃᑦᑕᖅᖢᒋᓪᓗ ᓄᓇᓕᖕᓂᒥᐅᑦ ᐱᒍᒪᔭᖏᑦ. ᒪᓕᒐᓕᐅᖅᑎᒋᔭᐅᓪᓗᖓ ᐊᑐᕚᒥ ᓄᓇᕗᒥᐅᓄᑦ, ᖃᓄᑐᐃᓐᓇᖅ ᐃᑲᔪᕈᒪᒐᒪ ᓄᓇᕗᒥᐅᓂᒃ ᐃᓅᓯᖏᓐᓄᑦ ᐅᓪᓗᑕᒫᑦ." ᒥᓂᔅᑕ ᐊᒡᓗᒃᑲᖅ
ᒥᓂᔅᑕ ᐊᒡᓗᒃᑲᖅ ᑎᓕᐅᕆᕗᖅ ᓂᕈᐊᖅᑎᒥᓂᒃ ᖃᐅᔨᒋᐊᕐᕕᐅᖃᑦᑕᕈᒪᓪᓗᓂ ᐊᓪᓚᕕᖕᒥᓂ ᖃᖓᑐᐃᓐᓇᒃᑯᑦ ᐊᐱᖁᑎᒃᓴᖃᖅᐸᑕ, ᐃᑲᔪᖅᑕᐅᒋᐊᖃᖅᐸᑕᓗ, ᐅᕙᓘᓐᓂᑦ ᑐᓴᖅᑎᑎᒍᒪᒃᐸᑕ.
