(ᐃᖃᓗᐃᑦ) – ᐋᓐᓂᐊᖅᑐᓕᕆᓂᕐᒧᑦ ᒥᓂᔅᑕᐅᔪᖅ, ᑲᒪᔨᐅᓪᓗᓂ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ ᒐᕙᒪᓂᒃ ᐊᒻᒪᓗ ᓄᓇᕗᒻᒥ ᒪᓕᒐᓕᐅᖅᑎᐅᔪᖅ ᑲᓇᑕᒥ, ᓕᐅᓇ ᐊᒡᓗᒃᑲᖅ ᐊᒻᒪ ᓗᑦᑖᖅ ᑏᕕᑦ ᐸᑦᓚ－ᔫᓐᔅ (David Butler-Jones), ᑲᓇᑕᐅᑉ ᐋᖓᔪᖄᕐᔪᐊᖓ ᐃᓅᓕᒫᓄᑦ ᐋᓐᓂᐊᖅᑐᓕᕆᓂᕐᒧᑦ ᑲᒪᔨᐅᔪᖅ, ᐅᖃᐅᓯᖃᓚᐅᖅᑐᖅ ᐃᓚᖏᓐᓂᒃ ᐅᖃᐅᓯᐅᖃᑦᑕᖅᓯᒪᔪᓂᒃ ᐱᔾᔪᑎᖃᖅᑐᓂᒃ ᑲᐱᔭᐅᓂᕐᒧᑦ ᐅᓗᕆᐊᓇᕐᓂᖃᖏᑦᑐᓂᒃ, ᐊᑐᑦᑎᖃᑦᑎᐊᕐᓂᖏᓐᓂᒃ, ᐊᒻᒪᓗ ᖃᓄᐃᓕᔾᔪᑕᐅᔪᓐᓇᕐᓂᖏᓐᓂ ᑕᐅᓐᑯᑦ ᑲᑎᒪᕕᖓᓐᓂ ᑲᑎᒪᑎᓪᓗᒋᑦ ᐃᓄᐃᑦ ᓄᓇᕗ�ᒻᒥ ᐅᓪᓗᒥ.
“ᐱᒻᒪᕆᐊᓘᖕᒪᑦ ᑲᓇᑕᒥᐅᑕᐃᑦ ᐃᓕᑦᑎᓯᒪᑦᑎᐊᕆᐊᖃᕐᓂᖏᑦ ᓱᓕᔪᓂᒃ ᑲᐱᔭᐅᓂᕐᒧᑦ ᖃᓂᒻᒪᒃᑕᐃᓕᒪᔾᔪᑎᓄᑦ,” ᐅᖃᖃᐅᔪᖅ ᒥᓂᔅᑕ ᐊᒡᓗᒃᑲᖅ. “ᑲᐱᔭᐅᖃᑦᑕᕐᓂᖅ ᐅᓗᕆᐊᓇᖏᒻᒪᑦ ᐊᒻᒪ ᐊᑐᑦᑎᖃᑦᑎᐊᖅᓱᓂ ᑲᓇᒥᑕᐅᓄᑦ ᐃᖕᒥᓂᒃ ᓴᐳᓐᓂᐊᓂᖏᓐᓄᑦ ᐃᓚᒥᓂᒡᓗ ᓄᕙᖕᓇᕐᔪᐊᖅᑐᒥᒃ.”
ᑐᑭᓯᓇᓱᐊᕐᓂᖏᓐᓂ ᖃᐅᔨᒪᔭᐅᔭᕆᐊᖃᖅᑐᓂᒃ ᑲᐱᔭᐅᓂᕐᒧᑦ ᐃᓱᒪᓘᑕᐅᔪᓂᒃ, ᑲᓇᑕᒥᐅᑦ ᑐᑭᓯᓂᐊᑦᑎᐊᖃᑦᑕᕆᐊᖃᖅᑐᑦ ᖃᐅᔨᒪᑦᑎᐊᖅᑐᓂᒃ ᓲᕐᓗ ᐃᓄᓕᒫᓂᒃ ᐅᖁᒪᐃᓐᓂᕐᓂᐊᖅᑎᐅᕙᒃᑐᓂᒃ ᐋᓐᓂᐊᖅᑐᓕᕆᔨᒃᑯᓐᓂᒃ ᑲᓇᑕᒥ, ᐋᓐᓂᐊᖅᑐᓕᕆᔨᕐᔪᐊᒃᑯᓐᓂᒃ ᑲᓇᑕᒥ, ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓂ ᐊᒻᒪᓗ ᐊᕕᒃᑐᖅᓯᒪᓂᖏᓐᓂ ᐅᑭᐅᖅᑕᖅᑐᒥ ᐃᖃᓇᐃᔭᕐᕕᖏᓐᓂᒃ ᒐᕙᒪᒃᑯᓐᓂᒃ ᐋᓐᓂᐊᖅᑐᓕᕆᓂᕐᒧᑦ ᐊᒻᒪᓗ/ᐅᕝᕙᓗᓐᓃᑦ ᐋᓐᓂᐊᖅᑐᓕᕆᔨᓂᒃ ᐃᖃᓇᐃᔭᖅᑎᐅᔪᓂᒃ.
“ᐅᓗᕆᐊᓇᕐᓂᖏᑦ ᑲᐱᔭᐅᓯᒪᓂᒃᑯᑦ ᐊᐃᑦᑐᖅᑕᐅᒌᒃᑯᑏᑦ ᖃᓂᒪᓇᖅᑐᓂᒃ ᓲᕐᓗ H1N1－ᒥᒃ ᓄᕙᓕᕐᓇᕐᔪᐊᖅᑐᒥᒃ, ᐊᖏᓂᖅᓴᒻᒪᕆᐅᖕᒪᑕ ᐱᔾᔪᑕᐅᔪᑦ ᓴᓂᐊᓂ ᖃᓄᐃᓕᓂᐅᓂᐊᖅᑐᓂᒃ ᑲᐱᔭᐅᓂᕐᒥᒃ,” ᐅᖃᖃᐅᔪᖅ ᓗᑦᑖᖅ ᑏᕕᑦ－ᐸᑦᓚ ᔫᓐᔅ. “ᑲᐱᔭᐅᓂᒃᑯᑦ ᐅᓗᕆᐊᓇᖏᓐᓂᖅᐸᖑᖃᑕᐅᖕᒪᑦ ᐅᓪᓗᒥ ᐃᓱᐊᖅᓴᖅᑕᐅᓂᐅᕙᓕᖅᑐᓂ. ᖃᐅᔨᓴᖅᑕᐅᑦᑎᐊᖄᖃᑦᑕᕐᒪᑕ ᓯᕗᓂᑐᖄᒍᑦ ᐊᒻᒪᓗ ᕿᒥᕐᕈᐊᖅᑕᐅᑎᐊᒃᑲᓐᓂᖅᐸᒃᓱᑎᒃ ᑲᒻᐸᓂᐅᔪᓄᑦ, ᒪᓕᒐᓕᕆᔨᐅᔪᓄᑦ, ᐊᒻᒪᓗ ᒐᕙᒪᒃᑯᓐᓄᑦ, ᐊᑐᐃᓐᓇᕈᖅᑎᑕᐅᓚᐅᖏᓐᓂᖏᓐᓂᒃ ᐃᓄᓕᒫᓄᑦ, ᐊᒻᒪ ᒪᓕᒃᑕᐅᕙᓪᓕᐊᖏᓐᓇᖅᑐᒥᒃ ᖃᐅᔨᓴᖅᑕᐅᕙᓪᓕᐊᖏᓐᓇᖃᑦᑕᕆᓪᓗᑎᒃ ᑭᖑᓂᐊᒍᑦ.”
ᓯᑎᒃᑯᑦ ᑲᑎᒪᕕᖓᓂ ᐃᓄᐃᑦ ᑲᑎᒪᓕᓚᐅᖅᑐᑦ ᑐᓴᖅᑎᑦᑎᓚᐅᖅᑎᓪᓗᒍ ᒥᓂᔅᑕ ᐅᓛᒃᑯᑦ ᓴᕿᑦᑎᓯᒪᓂᕐᒥᓂᒃ ᑕᒪᒃᑭᖅᑐᓂᒃ ᐸᕐᓇᒃᓯᒪᔾᔪᑎᓂᒃ ᓇᓗᓇᐃᒃᑯᑕᕐᓂᒃ ᐊᑐᖅᑕᐅᔪᓐᓇᖅᑐᓂᒃ ᑲᓇᑕᒥᐅᓄᑦ ᖃᐅᔨᒪᔾᔪᑎᒃᓴᓂᒃ ᒥᒃᓵᓄᑦ ᖃᓂᒪᓇᕐᔪᐊᖅᑐᑉ H1N1－ᒥᒃ, ᖃᓄᕐᓕ ᐃᖕᒥᓂᒃ ᓴᐳᓐᓂᐊᖅᓯᒪᔪᓐᓇᕐᒪᖔᑕ ᖃᓂᒪᓂᖅᑕᕈᓐᓇᕐᓂᕐᒥᒃ, ᐊᒻᒪᓗ ᖃᓄᐃᓕᐅᕆᐊᖃᕐᒪᖔᑕ, ᐃᖕᒥᓂᒃ ᐃᓚᖏᓪᓗᓐᓃᑦ ᖃᓐᓂᒪᓕᕋᔭᖅᐸᑦ. ᑐᑭᓯᒋᐊᑦᑎᐊᒃᑲᓐᓂᕈᒪᒍᕕᑦ ᐊᒻᒪᓗ ᐱᔪᒪᒍᕕᒋᑦ ᓇᓗᓇᐃᒃᑯᑕᐃᑦ ᐅᖃᓕᒫᒐᒃᓴᐃᑦ, ᖃᕆᑕᐅᔭᒃᑯᑦ ᐅᖓᓯᒃᑐᒥᒃ ᐅᕙᖓᑦ ᐱᓂᐊᖅᐸᑎᑦ
www.fightflu.ca.
“ᑕᕿᒐᓴᐅᓯᒪᔪᓂ ᐊᒡᒋᖅᑐᓂ, ᐅᖃᐅᓯᕆᕙᓪᓕᐊᖏᓐᓇᕐᓂᐊᖅᑕᕗᑦ ᐃᓱᒪᓘᑕᐅᔪᑦ ᑲᓇᑕᒥᐅᓄᑦ ᐱᔾᔪᑎᖃᖅᑐᓂᒃ ᖃᓂᒪᓂᕐᔪᐊᕐᒥᒃ/ᓄᕙᖕᓇᕐᔪᐊᕐᒥᒃ H1N1－ᒥᒃ, ᐊᒻᒪᓗ ᐃᓱᒪᓘᑖᐅᓂᖏᓐᓂᒃ ᑲᐱᔭᐅᖃᑦᑕᕐᓂᖅ,” ᐅᖃᖃᐅᔪᖅ ᒥᓂᔅᑕ ᐊᒡᓘᒃᑲᖅ. “ᑲᓇᑕᒥᐅᑦ ᑐᓂᔭᐅᓯᒪᓂᐊᖅᑐᑦ ᖃᐅᔨᒪᔾᔪᑎᒃᓴᖏᓐᓂᒃ ᐃᖕᒥᓂᖅ ᓴᐳᓐᓂᐊᕈᓐᓇᕐᓂᐊᕐᒪᑕ ᖃᓂᒪᓂᕐᒥᒃ ᓄᕙᖕᓇᕐᓂᕐᒥᒃ H1N1－ᒥᒃ.”
