ᐃᖃᓗᐃᑦ, ᓄᓇᕗᑦ - ᓂᕈᐊᖅᑕᐅᓯᒪᔪᖅ ᓴᒃ ᔅᑐᕌᓪ ᒥᓂᔅᑕᕆᔭᐅᔪᖅ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor), ᐱᖃᑎᖃᕐᓱᓂ ᓂᕈᐊᖅᑕᐅᓯᒪᔪᖅ ᑖᓂᐅᓪ ᓯᐅᓴᒃᒥᒃ, ᓄᓇᕗᒥ ᐊᕙᑎᓕᕆᓂᕐᒧᑦ ᒥᓂᔅᑕᕆᔭᐅᔪᖅ, ᐅᓪᓗᒥ ᐅᖃᐅᓯᖃᖅᑲᐅᔫᒃ ᐱᒻᒪᕆᓐᓂᒃ ᐱᓕᕆᐊᒃᓴᐅᓂᐊᕐᑐᓂᒃ ᓴᓐᖏᑦᑎᒃᐹᓪᓕᖁᓪᓗᒋᑦ ᓄᓇᕗᒥ ᐃᖃᓗᓕᕆᓂᕐᒧᑦ ᐱᓕᕆᐊᖑᔪᑦ.

"ᓄᓇᕗᑦ ᐃᒪᖁᑎᖏᑦ ᐃᑲᔪᖅᓯᒪᕐᔪᐊᕐᐳᑦ ᐃᓄᓐᓂᒃ ᓄᓇᓕᓐᓂᓪᓗ ᐅᑭᐅᖅᑕᖅᑐᒥ ᐅᑭᐅᒐᓵᓗᓐᓄᑦ. ᑕᕆᐅᖓ ᐊᑐᖅᑕᐅᒻᒪᕆᒃᒪᑦ ᐃᓕᖅᑯᓯᖏᑦ, ᐃᓅᓯᖏᑦ ᑮᓇᐅᔭᓕᐅᕈᑎᖏᓪᓗ ᓄᓇᕗᒥᐅᑦ ᑲᔪᓯᐅᒪᑦᓯᐊᖁᓪᓗᒋᑦ," ᐅᖃᓚᐅᕐᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᒻᒥᔪᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂ ᐊᐅᓚᑦᓯᔨᐅᓪᓗᓂ ᐊᓪᓚᖓᔪᓂᒃ, ᐃᓕᑕᕆᔭᐅᓯᒪᓐᖏᑦᑐᓂᓪᓗ ᐊᓪᓚᓂᒃ. "ᑖᒃᑯᐊ ᐱᓕᕆᐊᑦ ᐃᑲᔪᕐᓂᐊᕐᑐᑦ ᓄᓇᕗᒥ ᐃᖃᓗᓕᕆᔾᔪᑕᐅᔪᑦ ᐱᕈᖅᐸᓪᓕᐊᒃᑲᓐᓂᖁᓪᓗᒋᑦ ᑲᔪᓯᐅᒪᐃᓐᓇᖁᓪᓗᒋᓪᓗ."

"ᖁᕕᐊᓱᒃᐳᒍᑦ ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᑎᒍᑦ ᐃᑲᔪᕐᓂᖃᕐᓂᐊᕐᒪᑕ ᓄᓇᕗᒥᐅᓂᒃ," ᐅᖃᓚᐅᕐᑐᖅ ᒥᓂᔅᑕ ᓯᐅᓴᒃ. "ᐊᑐᕐᓗᒋᑦ ᑮᓇᐅᔭᐃᑦ, ᐊᒥᓱᓐᖑᕆᐊᕐᑎᑦᓯᓂᐊᕐᐳᒍᑦ ᖃᐅᔨᓴᕈᑕᐅᕙᒃᑐᓂᒃ ᐃᓕᓐᓂᐊᕐᑎᑦᓯᔾᔪᑕᐅᕙᒃᑐᓂᓪᓗ, ᑕᒪᐃᓐᓂ ᓄᓇᒥ ᐃᒪᕐᒥᓗ, ᓴᓐᖏᑦᑎᒃᐹᓪᓕᖁᓪᓗᒋᑦ ᐃᖃᓗᓕᕆᔾᔪᑎᕗᑦ ᐊᒻᒪᓗ ᓯᕗᓂᒃᓴᐅᓂᐊᕐᑐᒥ ᑲᔪᓯᑦᓯᐊᖁᓂᐊᕐᑕᕗᑦ."

ᑲᑐᑎᔭᐅᓪᓗᓂ ᐱᓕᕆᐊᖑᓂᐊᕐᑐᖅ ᑲᓇᑕᐅᑉ ᓄᓇᕗᓪᓗ ᒐᕙᒪᒃᑯᖏᓐᓂ ᑮᓇᐅᔭᖃᕐᑎᑕᐅᓂᐊᕐᑐᖅ $1.5-ᒥᓕᔭᓂᒃ ᓯᐊᒻᒪᒃᑕᐅᓯᒪᓂᐊᕐᓱᓂ ᐅᑭᐅᓐᓄᑦ ᒪᕐᕉᓐᓄᑦ. ᐃᑲᔪᕐᓂᐊᕐᑐᑦ ᖃᐅᔨᒪᔭᐅᓕᒃᑲᓐᓂᖁᓪᓗᒍ ᐱᕈᖅᐸᓪᓕᐊᖁᓪᓗᒍᓗ ᐃᖃᓗᓕᕆᓂᐅᕙᒃᑐᖅ ᓄᓇᕗᒥ. ᓄᓇᕗᑦ ᒐᕙᒪᒃᑯᖏᓐᓂ ᐊᕙᑎᓕᕆᔨᒃᑯᑦ ᐱᓕᕆᕕᖓᑦ, ᐃᖃᓗᓕᕆᔨᒃᑯᖏᑦ ᓇᑦᓯᓕᕆᔨᒃᑯᖏᓪᓗ, ᐊᐅᓚᑦᓯᔨᐅᑎᑕᐅᓂᐊᕐᐳᖅ ᐱᓕᕆᐊᖑᓂᐊᕐᑐᓂᒃ. ᐱᑎᑕᐅᓂᐊᕐᑐᑦ ᐃᒻᒪᖄ $620,000-ᓂᒃ ᓄᓇᓕᓐᓂ ᐋᖅᑭᒋᐊᕈᑎᒃᓴᓄᑦ ᑮᓇᐅᔭᖃᕈᑕᐅᔪᓂᑦ (CAF) ᒪᕐᕉᓐᓄᑦ ᐱᓕᕆᐊᒃᓴᐅᓂᐊᕐᑑᓐᓄᑦ ᓴᓐᖏᑦᑎᑕᐅᒋᐊᖁᓪᓗᒋᑦ ᓯᐊᒻᒪᕆᐊᒃᑲᓐᓂᖁᓪᓗᒋᓪᓗ ᑎᓄᔾᔨᕕᖕᒥ ᐃᖃᓗᓕᕆᔾᔪᑕᐅᔪᓂᒃ. ᑮᓇᐅᔭᐃᑦ ᑐᓐᓂᐅᑕᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᑲᔪᕐᓂᐊᕐᑐᑦ ᐃᓕᓐᓂᐊᕐᑎᑕᐅᔾᔪᑎᒃᓴᖏᓐᓄᑦ ᒥᑭᔪᓂ ᐅᒥᐊᕐᓂ ᐃᖃᓗᒐᓱᐊᕈᑕᐅᕙᒃᑐᓄᑦ.

$60,000-ᑲᓐᓂᕐᓂᒃ ᑮᓇᐅᔭᖃᕐᑎᑦᓯᓂᐊᕐᒥᔪᑦ ᒫᓐᓇᓵᖅ ᓴᖅᑭᑕᐅᓚᐅᕐᑐᒥᒃ ᐅᐸᓗᖓᐃᔭᐅᑎᒃᓴᓄᑦ ᑮᓇᐅᔭᖃᕐᑎᑦᓯᔾᔪᑏᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᖓᒍᑦ (SINED). ᑖᓐᓇ ᐱᓕᕆᐊᖅ ᐃᑲᔪᕐᓂᖃᕐᓂᐊᕐᑐᖅ ᐊᔾᔨᒌᖏᑦᑐᓂᒃ ᐃᖃᓗᓕᕆᔾᔪᑕᐅᕙᒃᑐᑦ ᖃᐅᔨᓴᖅᑕᐅᓂᖏᓐᓄᑦ ᖃᐅᔨᓴᖅᐸᓪᓕᐊᑎᓪᓗᒋᑦ ᖃᓄᐃᑦᑐᓂᒃ ᐃᖃᓗᒐᓱᐊᕈᓐᓇᕐᒪᖔᑕ ᕼᐊᑦᓴᓐ ᐃᑭᕋᓴᖓᓂ.

ᐅᐸᓗᖓᐃᔭᐅᑎᒃᓴᓄᑦ ᑮᓇᐅᔭᖃᕐᑎᑦᓯᔾᔪᑏᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᖓᒍᑦ (SINED). ᐊᒻᒪᓗ ᓄᓇᓕᓐᓂ ᐋᖅᑭᒋᐊᕈᑎᒃᓴᓄᑦ ᑮᓇᐅᔭᖃᕈᑕᐅᔪᓂᑦ (CAF) ᐊᐅᓚᑕᐅᕗᑦ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor), ᓴᖅᑭᑕᐅᕋᑖᓚᐅᕐᑐᖅ ᓯᕗᒃᑲᑕᐃᔨᐅᖁᓪᓗᒍ ᓴᖅᑭᑎᑦᓯᖁᓪᓗᒍᓗ ᑲᓇᑕᐅᑉ ᒐᕙᒪᒃᑯᖏᑦᑕ ᐱᕙᓪᓕᐊᔪᓕᕆᔾᔪᑎᖏᓐᓂᑦ ᐊᕕᒃᑐᖅᓯᒪᔪᓂ ᓄᓇᓕᓐᓂ ᐅᑭᐅᖅᑕᖅᑐᒥ ᐊᑐᐊᒐᓕᐅᖅᑎᐅᓪᓗᑎᒃ, ᖃᐅᔨᓴᖅᑎᐅᓪᓗᑎᒃ ᐃᑲᔪᕆᐊᖅᑎᐅᓪᓗᑎᓪᓗ.

ᑖᓐᓇ ᐅᖃᐅᓯᕆᔭᐅᔪᖅ ᐃᑲᔪᕆᐊᒃᑲᓐᓂᐅᑕᐅᓂᐊᕐᑐᖅ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᐊᕆᓯᒪᔭᖏᓐᓄᑦ ᑲᔪᓯᒋᐊᖁᓪᓗᒍ ᐅᑭᐅᖅᑕᖅᑐᒧᑦ ᐅᐸᓗᖓᐃᔭᐅᑎᓕᐊᖑᓯᒪᔪᖅ ᐊᐅᓚᑦᓯᔾᔪᑎᒃᓴᒃᑲᓐᓂᐅᓗᓂ ᑲᓇᑕᐅᑉ ᐅᑭᐅᖅᑕᖅᑐᖁᑎᐊᓂᒃ, ᓴᐳᓐᓂᐊᕐᑎᐅᓗᑎᒃ ᐅᑭᐅᖅᑕᖅᑑᑉ ᐊᕕᑎᐊᓂ ᐱᖁᑎᑐᖃᕐᓂᒃ, ᐃᓄᓕᕆᓂᕐᒥᒃ ᐱᕙᓪᓕᐊᔪᓕᕆᓂᕐᒥᓪᓗ ᐋᖅᑭᒋᐊᖅᓯᔾᔪᑕᐅᓗᓂ ᐊᒻᒪᓗ ᐅᑭᐅᖅᑕᖅᑐᒥᑦ ᐊᐅᓚᑦᓯᔾᔪᑕᐅᔪᖅ ᐱᐅᓯᒋᐊᒃᑲᓐᓂᖁᓪᓗᒍ.


ᑮᓇᐅᔭᖃᕐᑎᑦᓯᔾᔪᑕᐅᔪᖅ ᓄᓇᕗᒥ ᐃᒃᑲᓐᓂᕐᒥ ᐃᑎᓂᕐᒥᓗ ᑕᕆᐅᕐᒥ ᐃᖃᓗᓕᕆᔾᔪᑕᐅᔪᓄᑦ

ᐅᑭᐅᖅᑕᖅᑐᒥ, ᓄᓇᓕᓐᓂ ᐋᖅᑭᒋᐊᕈᑎᒃᓴᓄᑦ ᑮᓇᐅᔭᖃᕈᑕᐅᔪᓂᑦ (CAF) ᐱᓕᕆᐊᖅ ᐊᒻᒪᓗ ᐅᐸᓗᖓᐃᔭᐅᑎᒃᓴᓄᑦ ᑮᓇᐅᔭᖃᕐᑎᑦᓯᔾᔪᑏᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᖓᑦ (SINED) ᐊᐅᓚᑕᐅᕗᑦ ᓴᖅᑭᑕᐅᕋᑖᓚᐅᕐᑐᒧᑦ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor)-ᑯᓐᓄᑦ.

ᑖᒃᑯᐊ ᐱᖓᓱᑦ ᐱᓕᕆᐊᑦ ᑐᕌᖓᑎᑕᐅᕗᑦ ᖃᐅᔨᒪᓕᖅᐸᓪᓕᐊᖁᓪᓗᒋᑦ ᐱᕈᖅᐸᓪᓕᐊᖁᓪᓗᒋᓪᓗ ᓄᓇᕗᑦ ᐃᓗᐊᓂ ᐃᖃᓗᓕᕆᔾᔪᑕᐅᕙᒃᑐᑦ, ᐊᒻᒪᓗ ᑮᓇᐅᔾᔭᒃᓴᐅᑕᐅᓕᖅᐸᓪᓕᐊᒃᑲᓐᓂᖁᓪᓗᒋᑦ.


ᐅᒥᐊᕐᒥ ᐱᓕᕆᔨᓄᑦ ᐃᑲᔫᑎᒃᓴᒃᑲᓐᓂᕐᓄᑦ ᐱᓕᕆᐊᖅ

ᐱᓕᕆᐊᒃᓴᖅ ᑲᑎᓪᓗᒋᑦ: ᐃᒻᒪᖄ $200,000 ᐅᑭᐅᓐᓄᑦ ᒪᕐᕉᓐᓄᑦ

ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor)-ᑯᓐᓄᑦ ᑮᓇᐅᔭᖃᕐᑎᑦᓯᔾᔪᑕᐅᔪᑦ: ᐃᒻᒪᖄ $140,000 ᐅᑭᐅᓐᓄᑦ ᒪᕐᕉᓐᓄᑦ

ᖃᐅᔨᓴᕐᓂᖅ ᐃᓕᓐᓂᐊᕐᑎᑦᓯᓂᕐᓗ ᓇᓗᓇᐃᖅᑕᐅᓚᐅᕐᐴᒃ ᓯᕗᓪᓕᖅᐸᐅᔾᔭᐅᖁᔭᐅᓪᓗᑎᒃ ᓄᓇᕗᒥ ᐃᒃᑲᑦᑐᒥ ᐃᖃᓗᓕᕆᔾᔪᑎᒃᓴᓄᑦ ᐊᑕᔨᔪᒥᓪᓗ ᑲᔪᓯᔪᓐᓇᖁᓪᓗᒋᑦ ᓯᕗᓂᒃᓴᐅᓂᐊᕐᑐᒥ. ᐃᓕᓐᓂᐊᕐᑎᑦᓯᔾᔪᑕᐅᓂᐊᕐᑐᖅ ᐱᓕᕆᑎᑕᐅᒻᒪᕆᓪᓗᑎᒃ ᐃᓕᓐᓂᐊᕐᑎᑕᐅᔪᑦ ᐃᖃᓗᓕᕆᓂᕐᒥᒃ ᐊᒻᒪᓗ ᐃᓕᒃᐸᓪᓕᐊᔪᓐᓇᖁᓪᓗᒋᑦ ᐃᒪᕐᒥ ᐱᓕᕆᔾᔪᑕᐅᕙᒃᑐᓂᒃ ᐃᖃᓗᒐᓱᒃᑏᑦ ᐳᓚᕋᖅᑐᓕᕆᓂᕐᒥᓪᓗ ᐱᓕᕆᐊᖃᕐᑐᑦ ᐃᑭᒪᑎᑕᐅᕙᓪᓗᑎᒃ ᓄᓇᕗᒥ ᐊᕙᑎᓕᕆᔨᒃᑯᑦ ᐱᓕᕆᕕᖓᑦᑕ ᐅᒥᐊᖁᑎᐊᓂ 27-ᓂᒃ ᐃᓯᒐᓐᖑᐊᓂᒃ ᑕᑭᓂᖃᕐᑐᒥ. 2009-ᒥ 2010-ᒥᓗ ᐃᖃᓗᓕᕆᓐᓇᒥ, ᐅᒥᐊᖅ ᑎᓄᔾᔨᕕᒻᒨᖅᑕᐅᓂᐊᕐᑐᖅ ᐸᓐᓂᖅᑑᑉ ᖃᓂᒋᔮᓂ. ᐱᓕᕆᕝᕕᐅᖃᑦᑕᕐᓂᐊᕐᒪᑦ ᐃᖃᓗᓕᕆᕕᐅᓗᓂ ᐊᒻᒪᓗ ᐃᓕᓐᓂᐊᕐᑎᑦᓯᕕᐅᓯᓐᓈᕐᓗᓂ ᐅᒥᐊᓕᕆᔨᓄᑦ ᐸᓐᓂᖅᑑᒥ ᐊᒻᒪᓗ ᐊᐅᓚᑦᓯᓂᖏᓐᓄᑦ ᖃᐅᔨᓴᕈᑕᐅᔪᓂᒃ ᐱᓕᕆᕕᐅᒻᒥᓗᓂ. ᐊᒥᓱᑦ ᑲᑐᔾᔨᖃᑎᒌᑦ ᑮᓇᐅᔭᑎᒍᑦ ᐃᑲᔪᕐᓂᐊᕐᒥᔪᑦ, ᐱᖃᓯᐅᑎᓪᓗᒋᑦ ᓄᓇᕗᒥ ᐃᖃᓗᓕᕆᔨᒃᑯᑦ ᐃᓕᓴᐃᔨᖏᑦ, ᓄᓇᕗᑦ ᒐᕙᒪᒃᑯᖏᑦ, ᑲᓇᑕᒥ ᐃᖃᓗᓕᕆᔨᒃᑯᑦ, ᐊᒻᒪᓗ ᐸᓐᓂᖅᑑᒥ ᐃᖃᓗᓕᕆᔨᒃᑯᑦ.


ᑎᓄᔾᔨᕕᒻᒥ ᐃᒃᑲᓐᓂᕐᒥ ᐊᐅᔭᒃᑯᑦ ᐃᖃᓗᓕᕆᔾᔪᑎᒃᓴᑦ

ᐱᓕᕆᐊᒃᓴᖅ ᑲᑎᓪᓗᒋᑦ: ᐃᒻᒪᖄ $750,000 ᐅᑭᐅᓐᓄᑦ ᒪᕐᕉᓐᓄᑦ

ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor) ᑮᓇᐅᔭᐃᑦ: $480,000 ᐅᑭᐅᓐᓄᑦ ᒪᕐᕉᓐᓄᑦ

ᓯᐊᒻᒪᒃᑎᕆᒋᐊᕐᓂᖅ ᓄᓇᕗᒥ ᐃᒃᑲᓐᓂᕐᒥ ᐃᖃᓗᓕᕆᔾᔪᑕᐅᔪᑦ ᐱᒻᒪᕆᐅᒻᒪᑕ ᐊᑕᔩᓐᓇᖁᓪᓗᒋᑦ. ᑲᔪᓯᑎᑕᐅᕙᓪᓕᐊᖁᓪᓗᒋᑦ ᐋᖅᑭᐅᒪᓂᖃᑦᓯᐊᕐᑐᑦ ᐅᑭᐅᒃᑯᑦ ᖃᓕᕋᓕᓐᓂᐊᕈᑕᐅᕙᒃᑐᑦ, ᐅᑭᐅᓐᓄᑦ ᒪᕐᕉᓐᓄᑦ ᐱᓕᕆᐊᖑᓂᐊᕐᑐᖅ ᖃᐅᔨᓴᖃᑦᑕᕈᑕᐅᓂᐊᕐᐳᖅ ᐊᐅᔭᒃᑯᑦ ᖃᓕᕋᓕᓐᓂᐊᕈᑕᐅᔪᑦ ᑲᔪᓰᓐᓇᕈᓐᓇᕐᒪᖔᑕ ᑎᓄᔾᔨᕕᒻᒥ. ᐃᓚᒋᔭᐅᑎᓪᓗᒍ ᐱᓕᕆᐊᒃᓴᒧᑦ, ᐃᖃᓗᓕᕆᓂᕐᒧᑦ ᖃᐅᔨᓴᕈᑎᒃᓴᐃᑦ ᐱᐊᓂᒃᑕᐅᓂᐊᕐᐳᑦ ᐱᓕᕆᐊᖃᖃᑕᐅᓗᑎᒃ ᑲᓇᑕᒥ ᐃᖃᓗᓕᕆᔨᒃᑯᑦ ᓇᓗᓇᐃᖅᓯᒐᓱᐊᕐᑎᓪᓗᒋᑦ ᓂᐅᕐᕈᑕᐅᖃᑦᑕᕋᔭᕐᑐᓂᒃ ᐃᖃᓗᒐᓱᕝᕕᐅᒐᔭᕐᑐᓂᒃ ᐊᐅᔭᐅᓂᖓᓂ ᐱᓕᕆᕙᓪᓗᑎᒃ. ᖃᐅᔨᓴᕐᓂᐊᕐᒥᔪᑦ ᖃᓄᐃᑦᑐᓂᒃ ᐅᒥᐊᓂᒃ ᐊᑐᕈᓐᓇᕐᒪᖔᑕ ᖃᓕᕋᓕᓐᓂᐊᕈᑕᐅᔪᒃᓴᓂᒃ. ᓄᓇᕗᑦ ᒐᕙᒪᒃᑯᖏᑦ, ᑲᑭᕙᒃᑯᑦ ᑲᑐᔾᔨᖃᑎᒌᖓᑦ ᐊᒻᒪᓗ ᐸᓐᓂᖅᑑᒥ ᐃᖃᓗᓕᕆᔨᒃᑯᑦ ᐃᑲᔪᖃᑕᐅᓂᐊᕐᒥᔪᑦ ᑮᓇᐅᔭᑎᒍᑦ ᐱᓕᕆᐊᒃᓴᖅ ᑲᔪᓯᔪᓐᓇᖁᓪᓗᒍ.


2009-ᒥ ᐊᔾᔨᒌᖏᑦᑐᓂᒃ ᐃᖃᓗᒐᓱᐊᕈᑕᐅᔪᒃᓴᐃᑦ ᖃᐅᔨᓴᖅᑕᐅᓂᖓᓄᑦ ᐱᓕᕆᐊᖅ

ᐱᓕᕆᐊᒃᓴᖅ ᑲᑎᓪᓗᒋᑦ: ᐃᒻᒪᖄ $588,000

ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor) ᑮᓇᐅᔭᐃᑦ: $60,000

ᐊᒥᓱᓄᑦ ᑲᑐᔾᔨᓗᑎᒃ ᐱᓕᕆᐊᕆᔭᐅᓚᐅᕐᑐᖅ ᐱᕈᖅᐸᓪᓕᐊᔾᔪᑕᐅᓂᐊᕐᐳᖅ ᓯᕗᕐᖓᒍᑦ ᖃᐅᔨᓴᕈᑕᐅᓯᒪᔪᑦ ᕼᐊᑦᓴᓐ ᐃᑭᕋᓴᖓᓂ ᒪᓕᓪᓗᒋᑦ. ᖃᐅᔨᓴᖃᑦᑕᕐᓂᐊᕐᓱᑎᒃ ᖃᓄᑎᒋ ᐊᒥᓲᓂᖃᕐᒪᖔᑕ ᑭᖑᖅᐸᐃᑦ ᐱᔭᐅᓇᓱᒃᐸᒃᑐᑦ ᕼᐊᑦᓴᓐ ᐃᑭᕋᓴᖓᑕ ᐅᐊᓐᓇᖅᐸᓯᐊᓃᒃᑐᑦ ᐱᒻᒪᕆᐅᒻᒪᑕ ᐊᒻᒪᓗ ᓯᕗᓪᓕᖅᐹᒥᒃ ᖃᐅᔨᓴᖅᑕᐅᓕᑕᐃᓐᓇᕐᓂᐊᕐᓱᑎᒃ ᑕᐃᒪᓐᖓᑦ 1980-ᖏᓐᓂᓂᑦ, ᖃᐅᔨᒐᓱᐊᕐᓗᑎᒃ ᓇᓂ ᑭᖑᖅᐸᓐᓂᐊᕈᓐᓇᕐᒪᖔᑕ ᐃᒪᕐᓂ ᐊᒃᑐᐊᓂᖃᕐᑐᓂ ᓄᓇᕗᒧᑦ ᐊᒻᒪᓗ ᓄᓇᕕᒃᒧᑦ. ᖃᐅᔨᓴᕐᓂᐊᕐᒥᔪᑦ ᐊᑯᑭᑦᑐᐃᑦ ᖃᓂᒋᔮᓂ ᖃᓕᕋᓕᓐᓂᐊᕐᓂᐅᔪᓐᓇᕐᑐᓂᑦ. ᑕᒪᒃᑯᐊ ᖃᐅᔨᓴᕈᑏᑦ ᐱᒻᒪᕆᐅᓂᐊᕐᑐᑦ ᖃᐅᔨᓴᖅᑕᐅᑦᓯᐊᕐᓯᒪᖁᓪᓗᒋᑦ ᐊᐅᓚᑕᐅᑦᓯᐊᖁᓪᓗᒋᓪᓗ ᐃᖃᓗᓕᕆᔾᔪᑏᑦ ᐱᖁᔭᓕᐅᖅᑎᖏᓐᓄᑦ ᖃᐅᔨᒪᔭᐅᑦᓯᐊᕈᓐᓇᕐᓂᐊᕐᒪᑕ. ᓄᓇᕗᑦ ᒐᕙᒪᒃᑯᖏᑦ, ᕿᑭᖅᑖᓗᒻᒥ ᐃᖃᓗᒐᓱᒃᑏᑦ ᑲᑐᔾᔨᖃᑎᒌᖓᑦ, ᓄᓇᕗᑦ ᑐᓐᖓᕕᒃᑯᑦ, ᓄᓇᕗᒥ ᐆᒪᔪᓕᕆᔩᑦ ᑲᑎᒪᔨᕐᔪᐊᖏᑦ ᐊᒻᒪᓗ ᒪᑭᕕᒻᒥ ᑯᐊᐱᕇᓴᒃᑯᖏᑦ ᓄᓇᕕᒃᒥ ᑮᓇᐅᔭᑎᒍᑦ ᐃᖃᔪᖅᓯᒪᓂᐊᕐᒥᔪᑦ ᐱᓕᕆᐊᒃᓴᒧᑦ.


ᐃᑲᔪᖅᓱᐃᓂᖅ ᐃᖃᓗᓕᕆᔨᓂᑦ, ᐃᑲᔪᖅᓱᐃᓂᖅ ᑲᓇᑕᒥ ᑮᓇᐅᔾᔭᒃᓴᐅᑎᓂᒃ

ᐅᑭᐅᖅᑕᖅᑐᒥ, ᓄᓇᓕᓐᓂ ᐋᖅᑭᒋᐊᕈᑎᒃᓴᓄᑦ ᑮᓇᐅᔭᖃᕈᑕᐅᔪᓂᑦ (CAF) ᐋᖅᑭᒃᑕᐅᓯᒪᕗᑦ ᐃᑲᔪᖁᓪᓗᒋᑦ ᓄᓇᓕᓐᓂᑦ, ᐱᓗᐊᖅᑐᒥᒃ ᑐᓐᖓᕕᖃᓗᐊᕐᑐᓂᒃ ᓄᓇᒥᐅᑕᑎᒍᑦ ᑮᓇᐅᔭᓕᐅᕋᓱᐊᕐᓂᕐᒥᒃ ᐊᒻᒪᓗ ᓴᓇᔪᓕᕆᔨᖏᓐᓂᑦ, ᐃᖅᑲᓇᐃᔮᒃᓴᖃᐃᓐᓇᖁᓪᓗᒋᑦ ᐊᒻᒪᓗ ᓱᖏᐅᑎᓴᖁᓪᓗᒋᑦ ᑮᓇᐅᔾᔭᒃᓴᐅᑎᓕᕆᔾᔪᑎᖏᓐᓂᑦ. ᐊᒥᓱᑦ ᐱᓕᕆᐊᑦ ᑮᓇᐅᔭᖃᕐᑎᑕᐅᕗᑦ ᐅᑭᐅᖅᑕᖅᑐᒥ, ᓄᓇᓕᓐᓂ ᐋᖅᑭᒋᐊᕈᑎᒃᓴᓄᑦ ᑮᓇᐅᔭᖃᕈᑕᐅᔪᓂᑦ (CAF) ᐱᓕᕆᖃᑎᒌᓐᓂᕐᒥᑦ ᐱᕙᓪᓕᐊᖁᓪᓗᒋᑦ ᓴᖅᑭᐅᒪᕙᒌᖅᑐᓂᑦ, ᐊᒻᒪᓗ ᓯᕕᑐᔪᒧᑦ ᑮᓇᐅᔭᓕᐅᕈᑎᑎᒍᑦ ᐃᑲᔫᑎᖃᖁᓪᓗᒋᑦ.

ᑲᓇᑕᒥ ᑮᓇᐅᔾᔭᒃᓴᐅᑎᓕᕆᓂᕐᒧᑦ ᐸᕐᓇᐅᑦ ᐊᑐᐃᓐᓇᕈᐃᓂᐊᕐᑐᖅ $1-ᐱᓕᔭᓂᒃ ᐅᑭᐅᓐᓄᑦ ᒪᕐᕉᓐᓄᑦ ᐊᖅᑯᑎᒋᔭᐅᓗᓂ ᐅᑭᐅᖅᑕᖅᑐᒥ, ᓄᓇᓕᓐᓂ ᐋᖅᑭᒋᐊᕈᑎᒃᓴᓄᑦ ᑮᓇᐅᔭᖃᕈᑕᐅᔪᓂᑦ (CAF) ᐱᓕᕆᐊᖅ ᐱᓕᕆᐊᖑᖁᓪᓗᒋᑦ ᓯᕕᑭᑦᑐᒧᑦ ᑮᓇᐅᔾᔭᒃᓴᐅᑎᐅᔪᓐᓇᕐᑐᑦ ᑲᓇᑕᐅᑉ ᓄᓇᓕᖁᑎᖏᓐᓂ ᐊᒃᑐᖅᑕᐅᓯᒪᔪᓂ ᓯᓚᕐᔪᐊᕐᒥ ᑮᓇᐅᔾᔭᒃᓴᐅᑏᑦ ᑲᑕᒃᓯᒪᓚᐅᕐᓂᖏᓐᓄᑦ. ᐅᑭᐅᖅᑕᖅᑐᒥ, ᓄᓇᓕᓐᓂ ᐋᖅᑭᒋᐊᕈᑎᒃᓴᓄᑦ ᑮᓇᐅᔭᖃᕈᑕᐅᔪᓂᑦ (CAF) ᐱᓕᕆᐊᖅ ᐊᐅᓚᐅᕗᖅ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor) ᐱᖓᓱᓂ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓂ, ᐊᒻᒪᓗ ᐊᓯᖏᓐᓄᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐱᕙᓪᓕᐊᔪᓕᕆᔨᒃᑯᖏᓐᓄᑦ ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓂ.

ᐅᐸᓗᖓᐃᔭᐅᑎᒃᓴᓄᑦ ᑮᓇᐅᔭᖃᕐᑎᑦᓯᔾᔪᑏᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᖓᑦ (SINED) ᑕᓪᓕᒪᓄᑦ ᐅᑭᐅᓄᑦ ᐱᓕᕆᐊᒃᓴᐅᑎᑕᐅᕗᖅ ᑐᕌᖓᓗᐊᕐᓱᓂ ᐅᑭᐅᖅᑕᖅᑐᒥᐅᓄᑦ ᓄᑖᖑᓪᓗᓂ ᐃᓕᔭᐅᓚᐅᕐᑐᖅ ᑮᓇᐅᔭᖃᕐᑎᑦᓯᔾᔪᑕᐅᓂᐊᕐᑐᓄᑦ 2009-ᒥ. ᐃᓗᓕᖃᕐᓂᐊᕐᑐᖅ ᐱᓕᕆᐊᒃᓴᓂᒃ ᑐᕌᖓᔪᓂᒃ ᐱᕙᓪᓕᐊᔪᓕᕆᓂᕐᒧᑦ ᐅᑭᐅᖅᑕᖅᑐᒥ, ᓴᓐᖏᑦᑎᒃᐹᓪᓕᖁᓪᓗᒋᑦ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᑦ ᐊᒻᒪᓗ ᐱᕈᖅᐸᓪᓕᐊᒃᑲᓐᓂᖁᓪᓗᒋᑦ ᑮᓇᐅᔭᓕᐅᕈᑕᐅᔪᓐᓇᕐᑐᑦ ᐅᑭᐅᖅᑕᖅᑐᒥᐅᓄᑦ, ᓇᖕᒥᓂᖅ ᐱᓕᕆᕕᐅᔪᓄᑦ ᓄᓇᓕᖏᓐᓄᓪᓗ. ᐅᐸᓗᖓᐃᔭᐅᑎᒃᓴᓄᑦ ᑮᓇᐅᔭᖃᕐᑎᑦᓯᔾᔪᑏᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᖓᑦ (SINED) ᐊᐅᓚᑕᐅᕗᖅ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor) ᑕᒪᐃᓐᓂ ᐱᖓᓱᓂ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓂ.