ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑦ ᐃᑲᔪᖅᓱᐃᕗᖅ ᐋᖅᑭᒋᐊᖅᑕᐅᖁᓪᓗᒋᑦ ᐱᓐᖑᐊᕐᕖᑦ ᓯᑕᒪᓂ ᓄᓇᕗᑦ ᓄᓇᖁᑎᖏᓐᓂ

September 03, 2009

ᐃᖃᓗᐃᑦ, ᓄᓇᕗᑦ  - ᓂᕈᐊᖅᑕᐅᓯᒪᔪᖅ ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor), ᐅᖃᐅᓯᖃᖃᐅᕗᑦ ᐅᓪᓗᒥ ᑕᓗᕐᔪᐊᕐᒥᐅᑦ, ᐃᒡᓗᓕᒑᕐᔪᒻᒥᐅᑦ, ᐃᒡᓗᓕᖕᒥᐅᑦ, ᓴᓂᑭᓗᐊᕐᒥᐅᓪᓗ ᐃᑲᔪᖅᑕᐅᓂᐊᕐᓂᖏᓐᓂᑦ $1.1-ᒥᓕᔭᓂᒃ ᑲᑎᓪᓗᒋᑦ ᑮᓇᐅᔭᖃᖅᑎᑦᓯᓂᐊᕐᒪᑕ ᓄᓇᓕᓐᓂ ᐱᓕᕆᐊᒃᓴᓄᑦ, ᐊᖅᑯᑎᒋᔭᐅᓗᑎᒃ ᐱᓐᖑᐊᕐᕕᓐᓄᑦ ᐋᖅᑭᒋᐊᕈᑎᒃᓴᐃᑦ ᑲᓇᑕᒥ (RInC) ᐱᓕᕆᐊᖓᑦ.

"ᑮᓇᐅᔭᖃᕐᑎᑦᓯᔾᔪᑏᑦ ᐱᓐᖑᐊᕐᕕᐅᔪᓄᑦ ᐅᑭᐅᖅᑕᖅᑐᒥ ᑮᓇᐅᔭᖃᕐᑎᑦᓯᔾᔪᑕᐅᒻᒪᑕ ᐃᓅᓯᑦᓯᐊᕆᔭᕆᐊᖃᕐᓂᕐᒧᑦ ᑎᒥᑦᓯᐊᕆᓐᓂᕐᒧᓪᓗ ᐊᒃᑐᐊᓂᖃᕐᓱᑎᒃ ᑲᓇᑕᒥᐅᓄᑦ, ᐱᓗᐊᖅᑐᒥᒃ ᓄᑕᖅᑲᓄᑦ. ᐱᓐᖑᐊᕖᑦ ᓄᓇᓕᓐᓂ ᐱᒋᔭᐅᒻᒪᕆᒻᒪᑕ ᐱᓐᖑᐊᕐᕕᑐᐃᓐᓇᐅᖏᒻᒪᑕ ᑭᓯᐊᓂᑦᑕᐅᖅ ᐃᓄᓐᓄᑦ ᑲᑎᕈᓘᔭᕐᕕᐅᕙᒻᒪᑕ," ᐅᖃᓚᐅᕐᑐᖅ ᓂᕈᐊᖅᑕᐅᓯᒪᔪᖅ ᓴᒃ ᔅᑐᕌ, ᒥᓂᔅᑕᕆᔭᐅᓪᓗᓂᓗ ᐃᓄᓕᕆᔨᑐᖃᒃᑯᓐᓄᑦ ᐅᑭᐅᖅᑕᕐᑐᒥᓗ ᐱᕙᓪᓕᐊᔪᓕᕆᔨᒃᑯᓐᓄᑦ, ᑲᒪᔨᐅᒋᓪᓗᓂᓗ ᐊᓪᓚᖓᔪᓄᑦ ᐃᓕᑕᕆᔭᐅᓯᒪᖏᑦᑐᓄᓪᓗ ᐊᓪᓚᓄᑦ. "ᒐᕙᒪᕗᑦ ᐊᒻᒪᓗ ᓄᓇᕗᑦ ᒐᕙᒪᖓ ᐱᓕᕆᖃᑎᒌᓐᓂᐊᕐᒪᑕ ᓄᓇᕗᒥ ᓄᓇᓖᑦ ᐱᔭᕆᐊᖃᕐᑕᖏᑦ ᓴᖅᑭᒍᓐᓇᖁᓪᓗᒋᑦ, ᓴᖅᑭᑎᕆᕙᓪᓕᐊᓗᑎᒃ ᑮᓇᐅᔾᔭᒃᓴᐅᑎᒃᓴᓂᒃ ᐱᓕᕆᐊᒃᓴᓂᓪᓗ ᓄᓇᓕᓐᓂ."

ᑲᓇᑕ ᐊᒻᒪᓗ ᓄᓇᕗᑦ ᐱᓕᕆᖃᑎᒌᑦᓯᐊᓚᐅᕐᒪᑕ ᓇᓗᓇᐃᖅᓯᓪᓗᑎᒃ ᓯᑕᒪᓂᒃ ᐱᓕᕆᐊᒃᓴᓂᒃ ᑮᓇᐅᔭᖃᕐᑎᑕᐅᓪᓗᑎᒃ ᐱᓐᖑᐊᕐᕕᓐᓄᑦ ᐋᖅᑭᒋᐊᕈᑎᒃᓴᐃᑦ ᑲᓇᑕᒥ (RInC) ᐱᓕᕆᐊᖓᓐᓄᑦ, ᐃᓚᒋᔭᐅᑎᓪᓗᒍ ᑲᓇᑕᒥ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑎᒋᔭᐅᔪᖅ. ᑲᓇᑕᐅᑉ ᒐᕙᒪᖓ ᑮᓇᐅᔭᖃᕐᑎᑦᓯᓂᐊᕐᑐᖅ $567,000-ᓂᒃ ᐊᔾᔨᑦᓯᐊᖏᓐᓂᑦ ᑮᓇᐅᔭᖃᕐᑎᑦᓯᓂᐊᕆᓪᓗᓂ ᓄᓇᕗᑦ ᒐᕙᒪᖓ ᒪᓕᒋᐊᖃᕐᓱᑎᓪᓗ ᐊᖏᕈᑕᐅᓯᒪᔪᓂᒃ ᐊᑎᓕᐅᖃᑎᒌᔾᔪᑕᐅᓯᒪᔪᓂᒃ.

ᑮᓇᐅᔭᐃᑦ ᑎᑭᐅᒪᓂᐊᕐᑐᑦ $100,000-ᓄᑦ ᑕᓗᕐᔪᐊᓂ ᓇᓗᒐᓛᕐᕕᐅᑉ ᓴᓇᔭᐅᒋᐊᕈᑎᒃᓴᖏᓐᓄᑦ; ᑮᓇᐅᔭᐃᑦ ᑎᑭᐅᒪᓂᐊᕐᑐᑦ $150,000-ᓄᑦ ᐃᒡᓗᓕᒑᕐᔪᖕᒥ ᕿᑎᒡᕕᐅᑉ ᓴᓇᔭᐅᒋᐊᕈᑎᒃᓴᖏᓐᓄᑦ; ᐊᒻᒪᓗ $200,000-ᓄᑦ ᐃᒡᓗᓕᖕᒥ ᓯᐊᕐᕆᔮᕐᕕᐅᑉ ᕿᑯᒃᓴᔭᓂᒃ ᓇᑎᓕᖅᑐᖅᑕᐅᓂᖓᓄᑦ ᐊᒻᒪᓗ $117,000-ᓄᑦ ᓴᓂᑭᓗᐊᕐᒥ.

"ᐱᓐᖑᐊᕐᓂᖅ ᐊᑑᑎᖃᒻᒪᕆᖕᒪᑦ ᐅᑭᐅᖅᑕᖅᑑᑉ ᓄᓇᖁᑎᖏᓐᓂ," ᐅᖃᓚᐅᕐᑐᖅ ᒥᓂᔅᑕ ᓗᐊᓐ ᑯᓱᒐᖅ, ᒥᓂᔅᑕᕆᔭᐅᔪᖅ ᓄᓇᓕᓕᕆᔨᒃᑯᓐᓄᑦ ᒐᕙᒪᒃᑯᓐᓄᓪᓗ ᐱᔨᒃᓯᕋᖅᑐᓕᕆᔨᒃᑯᓐᓄᑦ. "ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᓂᐊᕐᑐᑦ ᓴᓇᔭᐅᒋᐊᒃᑲᓐᓂᖁᓪᓗᒋᑦ ᐱᓐᖑᐊᕐᕕᒐᓚᐃᑦ ᓄᓇᖁᑎᑦᑎᓐᓂ ᖃᐅᔨᒪᑦᓯᐊᖁᓪᓗᑕ ᓇᓗᒐᓛᕐᕖᑦ ᕿᑎᒡᕖᓪᓗ ᐊᑐᖅᑕᐅᑦᓯᐊᕈᓐᓇᕐᓂᖏᓐᓂᑦ ᐃᓚᒌᓄᑦ ᓄᑕᖅᑲᓄᓪᓗ ᓯᕗᓂᒃᓴᐅᓂᐊᕐᑐᓂ ᐅᑭᐅᖑᓂᐊᕐᑐᓂ."

ᐱᓐᖑᐊᕐᕕᓐᓄᑦ ᐋᖅᑭᒋᐊᕈᑎᒃᓴᐃᑦ ᑲᓇᑕᒥ (RInC) ᐱᓕᕆᐊᖓᑦ, ᓴᖅᑭᑕᐅᓯᒪᒻᒥᔪᖅ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor) ᐋᖅᑭᒃᑕᐅᓚᐅᕐᑐᖅ ᐋᖅᑭᒋᐊᖅᑕᐅᖁᓪᓗᒋᑦ ᓴᓇᔭᐅᒋᐊᒃᑲᓐᓂᖁᓪᓗᒋᓪᓗ ᐱᓐᖑᐊᕐᕕᒐᓚᐃᑦ, ᐱᖃᓯᐅᑎᓪᓗᒋᑦ ᓄᑖᑦ ᓴᓇᔭᐅᓂᐊᕐᑐᑦ ᐃᓚᒋᐊᕈᑏᑦ ᐊᓯᑖᖅᑕᐅᔾᔪᑏᓪᓗ.

ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor) ᓯᕗᒃᑲᑕᐃᔨᐅᑎᑕᐅᔪᖅ ᓴᖅᑭᑎᕆᔨᐅᓪᓗᓂᓗ ᑲᓇᑕᒥ ᐱᕙᓪᓕᐊᔪᓕᕆᔾᔪᑕᐅᔪᓂᒃ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓂ, ᐊᒻᒪᓗ ᐊᑐᐊᒐᓕᐅᖅᑎᐅᓪᓗᑎᒃ, ᖃᐅᔨᓴᖅᑎᐅᓪᓗᑎᒃ ᐃᑲᔪᕋᓱᒃᑎᐅᓪᓗᑎᓪᓗ. ᐃᓄᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ ᐱᕙᓪᓕᐊᑎᑦᓯᔾᔪᑕᐅᔪᑦ ᐅᑭᐅᖅᑕᖅᑐᒥ ᓯᑕᒪᐃᓕᖓᔪᑎᒍᑦ ᑐᓐᖓᕕᒋᔭᐅᓂᐊᕐᑐᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐅᐸᓗᖓᐃᔭᐅᑎᓕᐊᕆᓯᒪᔭᖏᓐᓄᑦ.

ᑲᓇᑕᒥ 2009-ᒥ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑎᓕᐊᖑᓯᒪᔪᖅ ᑐᐊᕕᐅᔾᔨᒋᐊᖅᓯᒪᕗᖅ ᓯᐊᒻᒪᕆᐊᕆᓪᓗᓂᓗ ᓴᖅᑭᐅᒪᕙᒌᕐᑐᓂᒃ ᑲᓇᑕᐅᑉ ᑮᓇᐅᔭᖁᑎᖏᓐᓂᒃ $33-ᐱᓕᔭᓐᑐᕐᓂᐊᕐᒪᑕ ᓴᓇᔭᐅᔪᒃᓴᓂᒃ ᑲᓇᑕᓕᒫᒥ ᐊᒻᒪᓗ ᓄᑖᓂᒃ $12-ᐱᓕᔭᓂᒃ ᑮᓇᐅᔭᖃᕐᑎᑦᓯᓂᐊᕆᓪᓗᑎᒃ ᐅᑭᐅᓐᓂᒃ ᒪᕐᕉᓐᓂᐊᕐᑐᓂᒃ.

ᐅᓪᓗᒥ ᒥᓂᔅᑕ ᔅᑐᕌᓪ ᐅᖃᐅᓯᖃᖅᑲᐅᒻᒥᔪᖅ ᑮᓇᐅᔭᖃᕐᑎᑦᓯᓂᐊᕐᓂᕐᒥᓂᒃ ᐱᕙᓪᓕᐊᔪᓕᕆᓂᖅᑎᒍᑦ ᐱᓕᕆᐊᒃᓴᐅᓂᐊᕐᑐᓄᑦ ᐅᑭᐅᖅᑕᖅᑐᒥ ᑐᕌᕐᓂᐊᕐᓱᑎᒃ ᔫᑳᓐᒥᐅᓄᑦ ᓄᓇᑦᓯᐊᕐᒥᐅᓄᓪᓗ.


ᖃᓄᐃᑦᑑᓂᖓ - ᓯᑕᒪᑦ ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ RInC ᑮᓇᐅᔭᖃᖅᑎᑦᓯᓗᑎᒃ ᓄᓇᕗᒥ

ᐅᑭᐅᖅᑕᖅᑐᒥ, ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ (RInC) ᐊᐅᓚᑕᐅᕗᖅ ᓴᖅᑭᑕᐅᕋᑖᓚᐅᕐᑐᒧᑦ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor). ᑮᓇᐅᔭᖃᕐᑎᑦᓯᓚᐅᕐᐳᑦ $1.7-ᒥᓕᔭᓂᒃ ᑐᓂᔭᐅᓪᓗᑎᒃ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓄᑦ ᐱᓐᖑᐊᕐᕕᓐᓄᑦ ᐱᓕᕆᐊᒃᓴᐅᑎᑕᐅᓂᐊᕐᓱᑎᒃ.

ᓯᑕᒪᑦ ᓄᓇᕗᒥ ᓄᓇᓖᑦ ᐱᑎᑕᐅᓂᐊᕐᑐᑦ $567,000-ᓂᒃ ᐅᑭᐅᖅᑕᖅᑐᒥ  ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ (RInC) ᐱᓕᕆᐊᖓᑎᒍᑦ ᐱᓐᖑᐊᕐᕕᖁᑎᖏᑦ ᕿᑎᕝᕕᖏᑦ ᓴᓇᔭᐅᒋᐊᒃᑲᓐᓂᖁᓪᓗᒋᑦ. ᑳᓐᑐᕌᖃᕈᑎᒃᓴᐃᑦ ᐱᔭᐅᓇᓱᓚᐅᕐᑐᑦ ᐱᓕᕆᔪᒃᓴᖅᓯᐅᕈᑕᐅᓪᓗᑎᒃ ᒪᑐᓚᐅᕐᑐᖅ ᔫᓂ 15, 2009-ᒥ.


ᐃᒡᓗᓕᒑᕐᔪᒃ - ᓄᓇᓕᓐᓂ ᕿᑎᒡᕕᐅᑉ ᓴᓇᔭᐅᒋᐊᒃᑲᓐᓂᕈᑎᐊ ᑲᑎᓪᓗᒋᑦ: $300,000
($150,000 ᑐᓐᓂᐅᑕᐅᓪᓗᑎᒃ ᑲᓇᑕᒥ ᓄᓇᕗᒥᓗ ᒐᕙᒪᐅᔪᓄᑦ)

ᐃᒡᓗᓕᒑᕐᔫᑉ ᕿᑎᒡᕕᐊ ᓴᓇᔭᐅᓚᐅᖅᓯᒪᔪᖅ 1980-ᖏᓐᓂ ᓱᕈᖅᐸᓪᓕᐊᓯᒪᒻᒪᕆᖕᒪᑦ ᐅᑭᐅᓂ ᐊᓂᒍᖅᐸᓪᓕᐊᓯᒪᔪᓂ. ᓄᓇᓕᓐᓄᑦ ᐊᑐᖅᑕᐅᒻᒪᕆᒃᐸᒻᒪᑦ ᑲᑎᕈᓘᔭᕐᕕᐅᕙᒃᓱᓂ ᓄᓇᓕᓐᓂ ᓱᔪᖃᕈᓘᔭᖅᑎᓪᓗᒍ, ᐊᒻᒪᓗ ᒪᒃᑯᒃᑐᓄᑦ ᐃᓐᓇᒻᒪᕆᓐᓄᓪᓗ ᐊᑐᖅᑕᐅᕙᒃᑭᓪᓗᓂ ᒧᒥᕐᕕᐅᓪᓗᓂ, ᕼᐊᑭᕐᕕᐅᓪᓗᓂ, ᐹᔅᑭᕐᕚᕕᐅᓪᓗᓂ ᐃᓄᐃᓪᓗ ᐱᓐᖑᐊᕈᓯᖏᓐᓄᑦ ᕿᑎᒡᕕᐅᕙᒃᑭᓪᓗᓂ.

ᑮᓇᐅᔭᐃᑦ ᑐᓐᓂᐅᑕᐅᔪᑦ ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ (RInC) ᐱᓕᕆᐊᖓᒍᑦ ᓴᓇᔭᐅᒋᐊᒃᑲᓐᓂᕈᑕᐅᓂᐊᕐᐳᑦ ᐊᑐᖅᑕᐅᖏᓐᓇᖁᓪᓗᒍ ᕿᑎᒡᕕᒃ ᐃᒡᓗᓕᒑᕐᔪᖕᒥᐅᓄᑦ.


ᑕᓗᕐᔪᐊᓂ ᓇᓗᒐᓛᕐᕕᐅᑉ ᓴᓇᔭᐅᒋᐊᕐᓂᖓ ᐱᓕᕆᐊᖅ ᑲᑎᓪᓗᒍ: $200,000
($100,000 ᑐᓐᓂᐅᑕᐅᓪᓗᑎᒃ ᑲᓇᑕᒥ ᓄᓇᕗᒥᓗ ᒐᕙᒪᐅᔪᓄᑦ)

ᑕᓗᕐᔪᐊᓂ ᓇᓗᒐᓛᕐᕕᒃ ᓴᓇᔭᐅᓚᐅᕐᓯᒪᒻᒪᑦ ᐊᕙᑏᑦ ᐅᑭᐅᖑᓕᕐᑐᑦ ᓴᓇᔭᐅᒋᐊᒃᑲᓐᓂᕆᐊᖃᕐᑐᖅ ᐊᑐᖅᑕᐅᒃᑲᓐᓂᖁᓪᓗᒍ. ᑮᓇᐅᔭᐃᑦ ᑐᓐᓂᐅᑕᐅᔪᑦ ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ (RInC) ᐱᓕᕆᐊᖓᒍᑦ ᐊᑐᖅᑕᐅᓂᐊᕐᐳᑦ ᐃᓗᐊᓂ ᐃᕿᐊᖅᓯᓕᖅᑐᖅᑕᐅᓂᐊᕐᒪᑦ ᓴᓇᔭᐅᒋᐊᒃᑲᓐᓂᕐᓗᑎᓪᓗ ᕿᔪᐃᑦ ᐊᕙᓗᑦᓯᓯᒪᔪᑦ ᓇᓗᒐᓛᕐᕕᒻᒥᑦ. ᓴᓇᔭᐅᒋᐊᒃᑲᓐᓂᕐᓂᖏᑦ ᐃᑲᔪᕐᓂᐊᕐᑐᑦ ᑕᓗᕐᔪᐊᕐᒥᐅᑦ ᓇᓗᒐᓛᕐᕕᒻᒥᑦ ᐊᑐᖃᑦᑕᕈᓐᓇᕐᓂᐊᕐᒪᑕ ᐅᑭᐅᓕᒫᖅ, ᐱᓐᖑᐊᕐᕕᐅᕙᓪᓗᓂᓗ ᐊᓯᖏᓐᓂᓗ ᓄᓇᓖᑦ ᐱᓐᖑᐊᕐᓂᐊᕐᑎᓪᓗᒋᑦ ᐊᑐᖅᑕᐅᔪᓐᓇᕐᓗᓂ. ᐃᓅᓯᑦᓯᐊᕆᓐᓂᕐᒧᓪᓗ ᑐᕌᖓᔪᓂᒃ ᓴᖅᑭᑎᑦᓯᒃᑲᓐᓂᕈᑕᐅᓗᓂ.


ᐃᒡᓗᓕᖕᒥ ᓴᓂᑭᓗᐊᕐᒥᓗ ᓯᐊᕐᕆᔮᕐᕖᑦ - ᕿᑯᒃᓴᔭᓂᒃ ᓇᑎᓕᖅᑐᖅᑕᐅᓂᐊᕐᑐᑦ ᐱᓕᕆᐊᒃᓴᖅ ᑲᑎᓪᓗᒋᑦ: $400,000 ᐊᒻᒪᓗ $234,000, ᐊᑐᓂ ($200,000 ᐊᒻᒪᓗ $117,000 ᑐᓐᓂᐅᑕᐅᓪᓗᑎᒃ ᑲᓇᑕᒥ ᓄᓇᕗᒥᓗ ᒐᕙᒪᐅᔪᓄᑦ, ᐊᑐᓂ)

ᓄᓇᓕᓐᓂ ᓯᐊᕐᕆᔮᕐᕖᑦ ᐱᒻᒪᕆᐅᒻᒪᑕ ᓄᓇᓕᓐᓂ ᑲᑎᕈᓘᔭᕐᕕᐅᕙᒻᒪᑕ ᐃᒡᓗᓕᖕᒥ ᓴᓂᑭᓗᐊᕐᒥᓗ. ᑮᓇᐅᔭᐃᑦ ᑐᓐᓂᐅᑕᐅᔪᑦ ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ (RInC) ᐱᓕᕆᐊᖓᒍᑦ ᐊᑐᖅᑕᐅᓂᐊᕐᑐᑦ ᕿᑯᒃᓴᔭᓂᒃ ᓇᑎᓕᖅᑐᖅᑕᐅᖁᓪᓗᒋᑦ ᓯᐊᕐᕆᔮᕐᕖᑦ. ᓴᓇᔭᐅᒋᐊᕐᓂᖏᑦ ᐱᐅᓯᒋᐊᕈᑕᐅᓂᐊᕐᑐᑦ ᐊᑯᓂᐅᓂᖅᓴᖅ ᐊᑐᖅᑕᐅᔪᓐᓇᖁᓪᓗᒋᑦ ᐊᒻᒪᓗ ᓇᑎᖏᑦ ᖄᖃᑦᓯᐊᖁᓪᓗᒋᑦ ᐊᐅᔭᓂᖓᓂ ᐊᑐᖅᑕᐅᖃᑦᑕᕈᓐᓇᕐᓂᐊᕐᒪᑕ.


ᐃᑲᔪᕈᑏᑦ ᐃᒡᓗᕐᔪᐊᓄᑦ ᐱᓐᖑᐊᕐᕕᓐᓄᑦ, ᐃᑲᔪᖅᓱᐃᓪᓗᑎᒃ ᑲᓇᑕᒥ ᑮᓇᐅᔾᔭᒃᓴᐅᑎᓄᑦ
ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ (RInC) ᑲᓇᑕᒥ ᐱᓕᕆᐊᖑᕗᖅ ᑮᓇᐅᔾᔭᒃᓴᐅᑎᓄᑦ ᐱᕈᖅᐸᓪᓕᐊᑎᑦᓯᔾᔪᑕᐅᒐᓱᐊᕐᓱᓂ $500-ᒥᓕᔭᓂᒃ ᑮᓇᐅᔭᖃᕐᑎᑦᓯᓂᐊᕐᑐᑦ ᒫᑦᓯ 31, 2011-ᒧᑦ. ᐊᒥᖅᑳᖃᑎᖃᕐᓂᐊᕐᑐᑦ ᐊᑭᓕᖅᑐᒐᒃᓴᓄᑦ ᓴᓇᔭᐅᒋᐊᕈᑎᖏᓐᓄᑦ, ᐋᖅᑭᒋᐊᖅᑕᐅᔾᔪᑎᖏᓐᓄᑦ ᐱᓐᖑᐊᕐᕖᑦ ᕿᑎᒡᕖᑦ ᑲᓇᑕᐅᑉ ᓄᓇᓕᖁᑎᖏᓐᓂ. ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ (RInC) ᐊᖅᑯᑎᒋᔭᐅᕙᒃᑐᑦ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓄᑦ (CanNor) ᐱᖓᓱᓂ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓂ, ᐊᒻᒪᓗ ᑲᓇᑕᒥ ᐊᕕᒃᑐᖅᓯᒪᔪᑦ ᐱᕙᓪᓕᐊᔪᓕᕆᔨᒃᑯᖏᓐᓄᑦ.

ᐱᓐᖑᐊᕐᕕᓕᕆᓂᕐᒧᑦ ᓴᓇᔭᐅᔪᒃᓴᑦ ᑲᓇᑕᒥ (RInC) ᐱᓕᕆᐊᖓᑦ ᐃᑲᔪᖅᓱᐃᕙᒃᐳᑦ "ᐊᑐᐃᓐᓇᕈᖅᑎᑕᐅᔾᔪᑎᖏᓐᓄᑦ" ᓴᓇᔭᐅᒋᐊᒃᑲᓐᓂᕆᐊᖃᕐᑐᑦ ᓄᓇᓕᓐᓂ ᐱᓐᖑᐊᕐᕕᓐᓄᑦ ᕿᑎᒡᕕᓐᓄᑦ ᐃᑲᔪᕐᓂᖃᕐᓂᐊᕐᓱᓂ ᑮᓇᐅᔾᔭᒃᓴᐅᑎᓂᒃ ᓴᖅᑭᑎᕆᓂᕐᒥᓪᓗ ᐱᓕᕆᐊᒃᓴᓂᒃ ᓄᓇᓕᓐᓂ.