ᑲᓇᑕᒥ ᑮᓇᐅᔾᔭᒃᓴᐅᑎᓕᕆᓂᕐᒧᑦ ᐸᕐᓇᐅᑏᑦ ᐃᑲᔪᖅᓱᐃᔪᑦ ᓄᓇᕗᒥ ᓄᓇᒥᐅᑕᓂᒃ ᖃᐅᔨᓴᕐᓂᕐᒧᑦ

September 25, 2009

ᑲᓇᑕᒥ ᐅᑭᐅᖅᑕᕐᑐᒧᑦ ᐱᕙᓪᓕᐊᔪᓕᕆᓂᕐᒧᑦ ᐱᔨᒃᓯᕋᕐᑏᑦ-09-007
ᐃᖃᓗᐃᑦ ᓄᓇᕗᑦ - ᓂᕈᐊᖅᑕᐅᓯᒪᔪᖅ ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᒥ ᐅᑭᐅᖅᑕᕐᑐᒧᑦ ᐱᕙᓪᓕᐊᔪᓕᕆᓂᕐᒧᑦ ᐱᔨᒃᓯᕋᕐᑏᑦ (CanNor), ᐅᓪᓗᒥ ᐅᖃᐅᓯᖃᖃᐅᔪᑦ ᐱᖓᓲᔪᖅᑐᓂᒃ ᐅᔭᕋᒃᓴᔭᓕᕆᓂᕐᒧᑦ ᐱᓕᕆᐊᖑᓂᐊᕐᑐᓂᒃ ᓄᓇᕗᒥ. ᑖᓐᓇ ᐱᒋᐊᕐᑎᑕᐅᔪᖅ ᐊᔪᕐᓇᕈᓐᓃᓚᐅᕐᐳᑦ ᑲᓇᑕᒥ ᑮᓇᐅᔾᔭᒃᓴᐅᑎᓕᕆᓂᕐᒧᑦ ᐸᕐᓇᐅᑎᒋᔭᐅᔪᑎᒍᑦ ᑲᔪᓯᒋᐊᕈᑕᐅᓂᐊᕐᑐᑦ ᓯᕗᓂᒃᓴᒥ ᑮᓇᐅᔭᓕᐅᕈᑕᐅᖁᓪᓗᒋᑦ ᓄᓇᒥᐅᑕᓂᒃ ᕿᓂᕐᓂᒃᑯᑦ ᓄᓇᕗᒥ.

"ᖃᐅᔨᒪᓕᕐᐸᓪᓕᐊᓂᕗᑦ ᓄᓇᕗᒥ ᐊᔾᔨᐅᖏᓐᓂᖓᓄᑦ ᓄᓇᖓ ᓯᕕᑐᔪᒧᑦ ᐱᕙᓪᓕᐊᔪᓕᕆᓂᖅᑎᒍᑦ ᐱᕈᖅᐸᓪᓕᐊᔾᔪᑕᐅᓂᐊᕐᐳᖅ ᓄᓇᕗᒥ" ᐅᖃᓚᐅᕐᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᔪᖅ ᐃᓄᓕᕆᔨᑐᖃᒃᑯᓐᓄᑦ ᐅᑭᐅᖅᑕᖅᑐᒥᓗ ᐱᕙᓪᓕᐊᔪᓕᕆᓂᕐᒧᑦ ᐊᐅᓚᑦᓯᔨᐅᓪᓗᓂᓗ ᐊᓪᓚᖓᔪᓂᒃ ᐃᓕᑕᕆᔭᐅᓯᒪᓐᖏᑦᑐᓂᓪᓗ ᐊᓪᓚᓂᒃ. "ᑮᓇᐅᔭᖃᕐᑎᑦᓯᓗᑕ ᖃᐅᔨᓴᕈᑎᒃᓴᓄᑦ ᒫᓐᓇ, ᐱᕙᓪᓕᐊᑎᑦᓯᔪᓐᓇᕐᓂᐊᕐᐳᒍᑦ ᓄᓇᕗᑦ ᓄᓇᖁᑎᖏᓐᓂᑦ ᓯᕗᓂᒃᓴᐅᓂᐊᕐᑐᒧᑦ."

"ᓄᓇᒥᐅᑕᓂᒃ ᐱᕙᓪᓕᐊᑎᑦᓯᓂᖅ ᐱᒻᒪᕆᐅᕗᖅ ᓄᓇᕗᒧᑦ ᑮᓇᐅᔾᔭᒃᓴᐅᑎᒋᔭᐅᑎᓪᓗᒍ ᐊᒻᒪᓗ ᑮᓇᐅᔭᖃᕐᑎᑦᓯᓂᕗᑦ ᐱᕈᖅᐸᓪᓕᐊᒃᑲᓐᓂᕈᑕᐅᒐᔭᕐᓱᓂ ᓯᕗᓂᒃᓴᒥ" ᐅᖃᓚᐅᕐᑐᖅ ᓂᕈᐊᖅᑕᐅᓯᒪᔪᖅ ᓕᐅᓇ ᐊᒡᓘᑲᖅ, ᒥᓂᔅᑕᕆᔭᐅᔪᖅ ᐅᑭᐅᖅᑕᖅᑐᒧᑦ ᐋᓐᓂᐊᕐᑐᓕᕆᓂᕐᒧᓪᓗ."

ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖃᖅᑎᑦᓯᓂᐊᕐᑐᑦ $1.1-ᒥᓕᔭᓂᒃ ᐅᐸᓗᖓᐃᔭᐅᑎᒃᓴᓂᑦ ᐅᑭᐅᖅᑕᖅᑐᒥᐅᑦ ᐱᕙᓪᓕᐊᑎᑕᐅᔾᔪᑎᖏᑎᒍᑦ ᐱᓕᕆᐊᖑᔪᑎᒍᑦ. ᑖᓐᓇ ᑮᓇᐅᔭᖁᑎᒋᔭᐅᔪᖅ ᐃᑲᔪᕐᓂᐊᕐᑐᖅ ᐱᖓᓲᔪᖅᑐᓂᒃ ᐊᔾᔨᒌᖏᑦᑐᓂᒃ ᓄᓇᒥᐅᑕᓂᒃ ᐱᓕᕆᐊᖑᓂᐊᕐᑐᓂᒃ ᐱᐊᓂᒃᑕᐅᔪᒃᓴᒫᖑᓪᓗᑎᒃ 2009-ᒥ ᐱᓕᕆᓐᓇᐅᑎᓪᓗᒍ. ᓄᓇᕗᑦ ᒐᕙᒪᒃᑯᖏᓐᓂ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᖃᐅᔨᓴᐃᓂᐊᕐᑐᑦ 2009-10-ᒥᓗ ᐱᓕᕆᐊᖑᓂᐊᕐᑐᓂᒃ, ᐱᓕᕆᖃᑎᖃᕐᓗᑎᒃ ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓂᒃ ᑲᓇᑕᒥ ᐅᔭᕋᒃᓴᔭᓕᕆᔨᒃᑯᓐᓂᑦ ᐱᓕᕆᖃᑎᖃᕐᒥᓗᑎᒃ. ᓇᓗᓇᐃᔭᖅᑕᐅᓯᒪᓂᖏᑦ ᐱᓕᕆᐊᒃᓴᐃᑦ ᑎᑎᕋᖅᑕᐅᓯᒪᕗᑦ ᑐᑭᓯᒋᐊᕈᑎᖏᓐᓂ.

"ᓄᓇᒥᐅᑕᓂᒃ ᓇᓗᓇᐃᒃᑯᓯᖅᑐᐃᓂᖅ ᖃᐅᔨᓴᕐᓂᕐᓗ ᓄᓇᕗᒥ ᐊᑑᑎᖃᒻᒪᕆᓐᓂᐊᕐᑐᑦ ᐅᔭᕋᕐᓂᐊᕐᑐᓕᕆᔩᑦ ᕿᓂᕈᓐᓇᖁᓪᓗᒋᑦ ᐅᔭᕋᒃᓴᔭᓂᒃ ᓄᓇᕗᒥ" ᐅᖃᓚᐅᕐᑐᖅ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔪᓕᕆᓂᕐᒧᓪᓗ ᒥᓂᔅᑕ ᐲᑕ ᑕᑉᑑᓇ. "ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᑦᑕ ᐱᓕᕆᓂᖓᑦ ᐃᑲᔪᕐᓂᐊᕐᒥᔪᖅ ᐱᕙᓪᓕᐊᑎᑕᐅᔪᓂᒃ ᓄᑖᓂᒃ ᓄᓇᖁᑎᑦᑎᓐᓂ. ᑖᒃᑯᐊ ᑮᓇᐅᔭᐃᑦ ᐱᔭᕆᐊᖃᒻᒪᕆᒃᐳᑦ"

ᐱᓕᕆᐊᖑᓂᐊᕐᑐᖅ ᑲᒪᒋᔭᒃᓴᐅᑎᑕᐅᕗᖅ ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓄᑦ (CanNor) ᓯᕕᑐᔪᒧᑦ ᐱᕙᓪᓕᐊᔪᓕᕆᔾᔪᑎᒃᓴᓂᒃ ᐱᖓᓱᓂ ᐊᕕᒃᑐᖅᓯᒪᔪᓂ ᐱᓕᕆᐊᒃᓴᖃᒻᒪᕆᒃᑎᑕᐅᓪᓗᑎᒃ. ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᑦ ᓯᕗᒃᑲᑕᐃᔨᐅᓂᐊᕐᑐᖅ ᓴᖅᑭᑎᑦᓯᕙᓪᓗᓂᓗ ᑲᓇᑕᐅᑉ ᒐᕙᒪᒃᑯᖏᑦᑕ ᐱᕙᓪᓕᐊᔪᓕᕆᔾᔪᑎᖏᓐᓂᑦ ᓄᓇᕗᑦ ᐃᓗᐊᓂ, ᐊᒻᒪᓗ ᐊᑐᐊᒐᒃᓴᓄᑦ, ᖃᐅᔨᓴᕐᓂᕐᒧᑦ ᐃᑲᔪᖅᓱᐃᓂᕐᒧᓪᓗ. ᐃᓄᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ ᐅᑭᐅᖅᑕᖅᑐᒥ ᓯᑕᒪᑎᒍᑦ ᑐᓐᖓᕕᒋᔭᐅᓂᐊᕐᑐᖅ ᑲᓇᑕᐅᑉ ᒐᕙᒪᒃᑯᖏᑦ ᐅᑭᐅᖅᑕᖅᑐᒥ ᐅᐸᓗᖓᐃᔭᐅᑎᓕᕆᔾᔪᑎᖏᓐᓄᑦ.


ᑐᑭᓯᒋᐊᕈᑎᖏᑦ - ᐱᖓᓲᔪᖅᑐᑦ ᓄᓇᒥᐅᑕᓂᒃ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᑦ ᓄᓇᕗᒥ

ᓄᓇᒥᐅᑕᓂᒃ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᐃᑦ ᑮᓇᐅᔭᖃᕐᑎᑕᐅᔪᑦ ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓄᑦ ᐋᖅᑭᒋᐊᕈᑕᐅᓂᐊᕐᐳᖅ ᐃᓄᐃᑦ ᑐᑭᓯᒋᐊᕈᒪᔾᔪᑎᖃᕐᐸᑕ ᐅᔭᕋᒃᓴᔭᓂᒃ ᖃᐅᔨᓴᕐᓂᕐᒧᑦ ᐊᑐᐃᓐᓇᐅᑎᑦᓯᕙᓪᓗᑎᒃ; ᓄᑖᑎᒍᑦ ᐱᓕᕆᔾᔪᑎᒃᓴᓂᒃ ᓴᖅᑭᑎᑦᓯᓗᑎᒃ ᐅᑭᐅᖅᑕᕐᑐᒥ ᕿᓂᕐᓂᕆᔭᐅᔪᑦ ᐊᑲᐅᓂᖅᓴᐅᖁᓪᓗᒋᑦ; ᓄᓇᒥᐅᑕᓂᓪᓗ ᖃᐅᔨᓴᕈᑎᕕᓂᖏᑦ ᓴᖅᑭᑕᐅᔪᓐᓇᕐᓗᑎᒃ ᓄᓇᓖᑦ ᐱᕙᓪᓕᐊᑎᑕᐅᑦᓯᐊᖁᓪᓗᒋᑦ ᑮᓇᐅᔭᓕᐅᕈᑎᒃᓴᓂᓪᓗ ᓴᖅᑭᑎᑦᓯᔾᔪᑕᐅᓗᑎᒃ, ᖃᐅᔨᓴᖅᐸᓪᓗᑎᓪᓗ ᓄᓇᐃᑦ ᐅᓗᕆᐊᓇᕐᓂᖏᓐᓂᑦ ᐅᑭᐅᖅᑕᖅᑐᒥ ᐸᕐᓇᐅᑎᓕᐅᕈᑕᐅᔪᓐᓇᖁᓪᓗᒋᑦ ᐅᓗᕆᐊᓇᕈᑎᖏᑦ ᐸᓚᕈᓐᓇᖁᓪᓗᒋᑦ.


ᐱᓕᕆᐊᒃᓴᖅ 1: ᐱᕙᓪᓕᐊᑎᑦᓰᓐᓇᕐᓂᖅ ᐊᐅᓚᑦᓯᓂᕐᓗ ᓄᓇᕗᒥ ᐅᔭᕋᒃᓴᔭᓕᕆᓂᕐᒧᑦ ᖃᕆᑕᐅᔭᒃᑯᑦ ᑐᑭᓯᒋᐊᕐᕕᒃᓴᒥᒃ

ᐱᓕᕆᐊᒃᓴᒧᑦ ᑲᑎᓪᓗᒋᑦ ᑮᓇᐅᔭᐃᑦ: $130,000
ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓂᑦ ᑮᓇᐅᔭᐃᑦ: $50,000
ᐅᔭᕋᒃᓴᔭᓂᒃ ᐱᕙᓪᓕᐊᑎᑦᓯᓂᖅ ᑲᔪᓯᕙᓪᓕᐊᖁᓪᓗᒍ ᓄᓇᕗᒥ, ᐱᔨᒃᓯᕋᕐᑎᐅᓂᐊᕐᑐᑦ ᐊᐅᓚᑦᓯᑦᓯᐊᕆᐊᖃᕐᒪᑕ ᖃᕆᑕᐅᔭᑎᒍᑦ ᑐᑭᓯᒋᐊᕐᕕᒃᓴᒥᒃ ᓇᓗᓇᐃᒃᑯᑕᓂᒃ ᑕᑯᒃᓴᐅᑎᑦᓯᔪᓐᓇᖁᓪᓗᒋᑦ ᐃᓱᒪᓕᐅᕈᑕᐅᓂᐊᕐᑎᓪᓗᒋᑦ. Nunavutgeoscience.ca ᐃᑲᔪᕐᓂᖃᕐᓂᐊᕐᑐᖅ ᐱᓕᕆᐊᖃᕐᑎᓪᓗᒋᑦ ᐊᐅᓚᑦᓯᓗᑎᒃ ᐋᖅᑭᐅᒪᑦᓯᐊᕐᑐᓂᒃ ᐅᔭᕋᒃᓴᔭᓕᕆᓂᕐᒧᑦ ᖃᕆᑕᐅᔭᑎᒍᑦ ᑐᑭᓯᒋᐊᕈᑎᒃᓴᓂᒃ. ᐱᓕᕆᐊᒃᓴᐅᓂᐊᕐᑐᑦ 2009-10-ᒧᓪᓗ ᐱᖃᓯᐅᔾᔨᓂᐊᕐᑐᑦ ᓄᑖᓐᖑᕆᐊᕆᖃᑦᑕᕐᓂᒥᒃ ᐊᑐᖅᑕᐅᕙᒃᑐᓂᒃ ᖃᕆᑕᐅᔭᑎᒍᑦ, ᓴᖅᑭᑎᑦᓯᓗᑎᒃ "ᓄᑖᓂᒃ ᑐᓴᖅᑕᐅᔭᕆᐊᓕᓐᓂᒃ" ᒪᒃᐱᒐᖃᕐᓗᑎᒃ, ᐃᓚᓯᓗᑎᒃ ᐅᖅᓱᐊᓗᓕᕆᓂᕐᒧᑦ ᐃᓱᒪᒋᔭᐅᓯᒪᔪᓂᒃ ᐱᓕᕆᖃᑎᖃᕐᓗᑎᓪᓗ ᓄᓇᓕᓐᓂ ᐅᔭᕋᒃᓴᔭᐃᑦ ᐊᑐᐃᓐᓇᐅᓂᖏᓐᓄᑦ ᑐᑭᓯᒋᐊᕐᕕᒃᓴᓂᒃ.


ᐱᓕᕆᐊᒃᓴᖅ 2: ᖁᓕᒥᒎᓕᒃᑯᑦ ᖃᐅᔨᓴᕈᑏᑦ ᓇᓃᒻᒪᖔᑕ ᐅᔭᕋᒃᓴᔭᐃᑦ ᐱᓕᕆᔾᔪᑕᐅᓂᐊᕐᑐᑦ, ᕿᑎᕐᒥᐅᓂ (ᓴᕕᕋᔭᒃᓴᔭᐃᑦ/ᑭᑭᐊᒃᓴᔭᐃᑦ ᒍᓘᐃᓪᓗ)

ᐱᓕᕆᐊᒃᓴᖅ ᑲᑎᓪᓗᒋᑦ ᑮᓇᐅᔭᐃᑦ: $325,000
ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓂᑦ ᑮᓇᐅᔭᐃᑦ: $250,000
ᐱᓕᕆᐊᒃᓴᒥ ᑕᕝᕙᓂ ᓇᓗᓇᐃᒃᑯᓯᖅᓱᐃᓂᐊᕐᐳᑦ ᖁᓕᒥᒎᓕᒃᑯᑦ ᖃᐅᔨᓴᖅᑕᐅᓯᒪᔪᓂᒃ ᓄᓇᓂᒃ ᐱᑕᖃᕋᓱᒋᔭᐅᔪᓂᒃ ᓄᓇᒥᐅᑕᓂᒃ ᐅᖅᓱᐊᓗᒃᓴᔭᓂᒃ ᒎᓗᓂᓪᓘᓐᓃᑦ ᓴᕕᕋᔭᖃᕈᒥᓇᕐᓂᖏᓐᓂᓗ (northern Slave Province-ᖑᓂᕋᕐᑕᐅᔪᒥ.) ᑖᓐᓇ ᐱᓕᕆᐊᖑᓂᐊᕐᑐᖅ ᐃᑲᔪᒻᒪᕆᓐᓂᐊᕐᑐᖅ ᐅᔭᕋᒃᓴᔭᖃᕐᑐᓂᒃ ᓇᓗᓇᐃᒃᑯᓯᖅᑐᐃᓕᖅᐸᑕ ᕿᓂᕐᕕᖃᕐᑎᓪᓗᒋᓪᓗ ᓄᓇᕗᒥ. ᐅᔭᕋᒃᓴᔭᓕᕆᓂᐅᑉ ᒥᒃᓵᓄᑦ ᑐᑭᓯᐅᒪᑦᓯᐊᕐᓂᖅ ᐱᔪᒪᓕᖅᓴᐃᔾᔪᑕᐅᒃᑲᓐᓂᕐᓂᕐᒪᑕ ᐃᓄᓐᓄᑦ ᕿᓂᕐᕕᖃᕈᒪᔪᓄᑦ ᐅᔭᕋᕐᓂᐊᕐᑐᓕᕆᓂᕐᒧᓪᓗ ᑮᓇᐅᔭᖃᕐᑎᑦᓯᓂᕐᒥᒃ ᓄᓇᕗᑦ ᐃᓗᐊᓂ. 


ᐱᓕᕆᐊᒃᓴᖅ 3: ᓇᓗᓇᐃᔭᖅᓯᒪᔪᑦ ᐅᔭᕋᒃᓴᔭᐃᑦ ᖃᐅᔨᓴᖅᑕᐅᓯᒪᓂᖏᑦ ᒎᓗᒃᓴᔭᖃᕐᑐᓂ ᐅᔭᕋᒃᓴᔭᖏᓐᓂᓗ (Hope Bay Belt-ᖑᓂᕋᖅᑕᐅᔪᒥ)
ᐱᓕᕆᐊᒃᓴᖅ ᑲᑎᓪᓗᒋᑦ: $60,000
ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓂᑦ ᑮᓇᐅᔭᐃᑦ: $60,000
Hope Bay Belt-ᖑᓂᕋᖅᑕᐅᔪᒥ ᒎᓗᒃᓴᔭᖅᑕᖃᒻᒪᕆᓐᓂᕋᖅᑕᐅᕗᖅ ᖃᓄᑐᐃᓐᓇᖅ ᖃᐅᔨᓴᖅᑕᐅᓯᒪᒐᓗᐊᕐᑎᓪᓗᒍ ᓇᓗᓇᐃᔭᖅᓯᒪᔪᑎᒍᑦ, ᓱᓕ ᓄᓇᐅᑉ ᐃᓚᖓ ᑐᑭᓯᔭᐅᕌᓂᒃᓯᒪᓐᖏᒻᒪᑦ ᐱᑕᖃᒻᒪᕆᒻᒪᖔᑦ ᐅᔭᕋᒃᓴᔭᓂᒃ. ᓄᑖᑎᒍᑦ ᓇᓗᓇᐃᒃᑯᓯᖅᑐᐃᓂᐊᕐᐳᑦ ᖃᐅᔨᓴᕐᓗᑎᓪᓗ ᑐᑭᓯᐅᒪᔭᐅᑦᓯᐊᕐᓂᖅᓴᐅᖁᓪᓗᒋᑦ ᒎᓗᑕᖃᒻᒪᕆᒻᒪᖔᑕ ᑕᒫᓂ ᓄᓇᒥ, ᑐᑭᓯᐅᒪᔭᐅᑦᓯᐊᖅᑎᓪᓗᒋᑦ ᐃᓱᒪᓕᐅᕈᑕᐅᔪᓐᓇᕐᓂᖅᓴᐅᓂᐊᕐᒪᑕ ᑮᓇᐅᔭᖃᖅᑎᑕᐅᑦᓯᐊᕐᓂᖅᓴᐅᖁᓪᓗᒋᓪᓗ ᓄᓇᕗᒥ ᐱᓕᕆᐊᖑᓂᐊᕐᑐᑦ.


ᐱᓕᕆᐊᒃᓴᖅ 4: ᓄᓇᒥᐅᑕᐃᑦ ᓇᓗᓇᐃᒃᑯᓯᖅᑐᖅᑕᐅᓂᖏᑦ

ᐱᓕᕆᐊᒃᓴᖅ ᑲᑎᓪᓗᒋᑦ: $150,000
ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓂᑦ ᑮᓇᐅᔭᐃᑦ: $150,000
ᐱᓕᕆᔾᔪᑎᒃᓴᐃᑦ ᐱᖁᑏᑦ ᐱᕙᓪᓕᐊᑎᑦᓯᔾᔪᑕᐅᔪᒃᓴᓄᑦ ᓴᖅᑭᖁᓪᓗᒋᑦ ᐱᕙᓪᓕᐊᔪᓕᕆᓂᕐᓗ ᑲᔪᓯᑦᓯᐊᖁᓪᓗᒍ, ᓈᒻᒪᑦᓯᐊᕐᑐᓂᒃ ᐱᐅᔪᓂᓪᓗ ᓯᐅᕋᕐᓂᒃ ᑐᐊᐸᓂᓪᓗ ᕿᓂᕐᕕᐅᓯᒪᔪᑦ ᓇᓂᓯᕕᐅᓯᒪᔪᓪᓗ ᐊᑐᐃᓐᓇᐅᑦᓯᐊᕆᐊᖃᕐᐳᑦ ᓄᓇᓕᓕᒫᓄᑦ ᓄᓇᕗᒥ. ᓱᓇᑐᐃᓐᓇᕐᓂᒃ ᓴᓇᔪᓐᓇᔾᔮᖏᒻᒪᑕ ᖃᐅᔨᒪᑦᓯᐊᖏᓪᓗᑎᒃ ᐅᔭᕋᒃᓴᔭᖃᑦᓯᐊᕋᓗᐊᕐᒪᖔᑦ ᐱᓕᕆᕕᐅᓂᐊᕐᑐᓂ. ᑖᓐᓇ ᐱᓕᕆᐊᒃᓴᖅ ᑐᕌᖓᑎᑕᐅᓂᐊᕐᑐᖅ ᓇᓗᓇᐃᖅᓯᓂᕐᒧᑦ ᓇᓃᒻᒪᖔᑕ, ᓇᓗᓇᐃᒃᑯᓯᖅᓱᐃᓂᕐᒧᑦ ᑐᐊᐸᒃᓴᔭᓂ ᓯᐅᕋᕐᓂᓪᓗ ᐱᖓᓱᓂ ᓄᓇᕗᑦ ᓄᓇᖁᑎᖏᓐᓂ. ᐅᑯᐊᖑᓪᓗᑎᒃ: ᐅᖅᓱᖅᑑᖅ, ᒫᓐᓇ ᐊᖅᑯᓯᐅᕈᑎᒃᓴᖅᑕᖃᓐᖏᒻᒪᑕ ᑐᐊᐸᓂᒃ; ᐸᓐᓂᖅᑑᒥ, ᓈᒻᒪᒃᑐᓂᒃ ᐱᓕᕆᔾᔪᑎᒃᓴᖃᓗᐊᓐᖏᒻᒪᑕ ᐱᖁᑎᒃᓴᓄᑦ ᐊᑐᖅᑕᐅᔪᒃᓴᓄᑦ ᐱᖃᓯᐅᑎᓪᓗᒋᑦ ᐊᖅᑯᑎᒃᓴᐃᑦ ᐊᒻᒪᓗ; ᓇᐅᔮᓂ, ᐊᖅᑯᓯᐅᕈᑎᒃᓴᖅᑕᖃᑦᓯᐊᖏᒻᒪᑕ ᑐᐊᐸᒃᓴᓂᒃ ᓯᐅᕋᕐᓂᓪᓗ.
ᓇᓗᓇᐃᖅᓯᔪᓐᓇᖅᐸᑕ ᓄᓇᒥᐅᑕᒃᓴᔭᓂᒃ ᐅᔭᕋᒃᓴᔭᓂᓪᓗ ᐱᑕᖃᕐᓂᖏᓐᓂᑦ ᓇᓗᓇᐃᒃᑯᓯᖅᓱᐃᔪᓐᓇᕐᓂᐊᕐᒪᑕ, ᐱᖁᑎᒃᓴᐃᓪᓗ ᐱᔭᕆᐊᖃᒻᒪᕆᒃᑐᑦ ᓴᖅᑭᑕᐅᖁᓪᓗᒋᑦ ᑖᒃᑯᓇᓂ ᓄᓇᓕᓐᓂ.


ᐱᓕᕆᐊᒃᓴᖅ 5: ᖃᐅᔨᓴᖅᑕᐅᓂᖏᑦ ᓇᓃᒻᒪᖔᑕ ᖃᓄᑎᒋᓗ ᐱᑕᖃᖅᑎᒋᒻᒪᖔᑕ ᐅᒃᑯᓯᒃᓴᐃᑦ (ᑐᖑᔪᖅᑕᐃᑦ ᐅᔭᕋᒃᓴᔭᐃᑦ) (ᓴᓪᓕᓂ ᕿᑭᖅᑕᓕᒫᖓᓂ)

ᐱᓕᕆᐊᒃᓴᖅ ᑲᑎᓪᓗᒋᑦ: $40,000
ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓂᑦ ᑮᓇᐅᔭᐃᑦ: $40,000ᐅᒃᑯᓯᒃᓴᐃᑦ ᐃᓚᔭᖏᑦ ᐊᑐᖅᑕᐅᑦᓯᐊᕈᓐᓇᕐᓂᖅᓴᐅᕗᑦ ᐊᓯᖏᓐᓂᑦ ᐅᔭᕋᕐᓂᐊᕐᕕᓐᓂ ᓴᓇᕕᐅᕙᒃᑐᓂ. ᐃᓚᔭᖃᕐᒪᑕ ᐳᓪᓚᐅᔭᓂᒃ. ᓴᓪᓕᐅᑉ ᐃᓚᖓᓂ, ᓄᓇᕗᒥ ᐱᑕᖃᖅᑐᒻᒪᕆᐅᒪᑕ ᐅᒃᑯᓯᒃᓴᐃᑦ ᐊᑐᖅᑕᐅᔪᓐᓇᕐᑐᑦ ᐃᒪᕐᓄᑦ ᐃᕐᕈᖅᑑᑎᒋᔭᐅᓗᑎᒃ ᐅᔭᕋᕐᓂᐊᕐᕕᓐᓂ, ᖄᖅᑎᑦᓯᔪᖃᕐᑎᓪᓗᒍ ᐅᔭᕋᕐᓂᐊᕐᕕᓐᓂ, ᕿᑯᓕᐅᕈᑕᐅᓗᑎᓪᓗ ᐊᒥᓱᓄᓪᓗ ᓴᓇᕝᕕᒡᔪᐊᖑᔪᓄᑦ ᐊᑐᖅᑕᐅᔪᓐᓇᕐᓱᑎᒃ. ᐅᒃᑯᓯᒃᓴᖃᕐᑐᑦ ᓴᓪᓕᐅᑉ ᖃᓂᒋᔮᓂ ᐃᓂᑦᓯᐊᕙᐅᕗᖅ ᐅᒥᐊᕐᔪᐊᒃᑯᑦ ᐅᓯᓕᖅᑐᕐᕕᐅᔪᓐᓇᕐᑐᓂ ᐅᔭᕋᕐᓂᐊᕐᓂᕐᒧᑦ ᐱᓕᕆᕕᐅᔪᓂ ᑭᕙᓪᓕᕐᒥ. ᑖᓐᓇ ᐱᓕᕆᐊᒃᓴᖅ ᖃᐅᔨᓴᕈᑕᐅᓂᐊᕐᐳᖅ ᐅᒃᑯᓯᒃᓴᓂᒃ ᐊᑐᖅᑕᐅᔪᓐᓇᕐᓗᑎᒃ ᓴᓇᕝᕕᓐᓂ. ᐅᒃᑯᓯᒃᓴᐃᑦ ᖃᐅᔨᔭᐅᒃᐸᑕ ᐃᓗᓕᖃᑦᓯᐊᕐᓂᖏᓐᓂᑦ ᐊᑐᖅᑕᐅᔪᓐᓇᕐᑐᓂᒃ ᐅᔭᕋᕐᓂᐊᕕᓐᓄᑦ, ᐱᕙᓪᓕᐊᑎᑕᐅᒃᑲᓐᓂᕋᔭᕐᓂᖏᓐᓂᑦ ᐃᓱᒪᒃᓴᖅᓯᐅᕈᑕᐅᒃᑲᓐᓂᕐᓂᐊᕐᐳᑦ.


ᐱᓕᕆᐊᒃᓴᖅ 6: ᓄᓇᓕᓐᓂ ᐅᓗᕆᐊᓇᕐᓂᖃᑐᐃᓐᓇᕆᐊᖃᕐᑐᓂᒃ ᓇᓗᓇᐃᒃᑯᓯᖅᓱᐃᓂᖅ

ᐱᓕᕆᐊᒃᓴᖅ ᑲᑎᓪᓗᒋᑦ: $650,000
ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓂᑦ ᑮᓇᐅᔭᐃᑦ: $550,000
ᐱᕙᓪᓕᐊᔪᓕᕆᓂᖅ ᓄᓇᕗᒥ ᓇᓗᓇᓐᖏᑦᑐᖅ ᐊᒃᑐᖅᑕᐅᓯᒪᓂᖃᕐᒪᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᓄᑖᑦ ᐃᒡᓗᓕᐅᕈᑎᒃᓴᐃᑦ ᐱᖁᑎᒃᓴᓄᓪᓗ ᓴᓇᔭᐅᒐᔭᕐᑐᑦ ᓄᓇᓕᓐᓄᑦ ᓄᓇᒥᐅᑕᓄᓪᓗ ᐱᕙᓪᓕᐊᑎᑦᓯᓂᕐᒧᑦ, ᐋᖅᑭᐅᒪᑎᑕᐅᖏᓐᓇᕐᓂᖏᓐᓄᓪᓗ ᓄᓇᓕᓐᓂ ᐃᒡᓗᖁᑎᒋᔭᐅᔪᓄᑦ ᐊᒃᑐᖅᑕᐅᓯᒪᔪᐃᓐᓇᐅᓯᒪᒻᒪᑕ. ᑖᓐᓇ ᐱᓕᕆᐊᒃᓴᖅ ᐱᒋᐊᓚᐅᕐᑐᖅ 2006-ᖑᑎᓪᓗᒍ ᓇᓗᓇᐃᖅᓯᒐᓱᐊᕐᓱᑎᒃ ᓇᐅᒃᑯᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᑐᖅᑕᐅᓯᒪᓂᖃᕐᓂᐊᕐᒪᖔᑕ ᐅᐸᓗᖓᐃᔭᐅᑎᒃᓴᓕᐅᕈᑕᐅᓗᑎᓪᓗ ᓄᓇᓕᓐᓄᑦ. ᐃᓚᒋᓕᐅᔾᔭᐅᖃᑕᐅᓂᐊᕐᐳᑦ ᓄᓇᒥᐅᑕᓕᕆᓂᕐᒧᑦ ᑐᑭᓯᒋᐊᕈᑎᒃᓴᐅᓂᐊᕐᑐᓄᑦ ᐃᓱᒪᓕᐅᕈᑎᒃᓴᐅᓂᐊᕐᑎᓪᓗᒋᑦ. ᐱᓕᕆᐊᒃᓴᒧᑦ ᐸᕐᓇᐅᑏᑦ 2009-10-ᒥᓗ ᐱᒋᐊᕐᑎᑕᐅᓂᐊᕐᐳᑦ ᐊᒥᓱᑲᓪᓚᓂ ᓄᓇᕗᑦ ᓄᓇᖁᑎᖏᓐᓂ ᖃᐅᔨᓴᑦᓯᐊᕈᒪᓂᐊᕐᓗᑎᒃ ᓄᓇᐃᑦ ᐅᓗᕆᐊᓇᑐᐃᓐᓇᕆᐊᖃᕐᓂᖏᓐᓂᑦ ᓇᓗᓇᐃᖅᓯᒐᓱᐊᕈᑕᐅᓗᑎᒃ. ᖃᐅᔨᓴᖅᑎᓪᓗᒋᑦ ᖃᐅᔨᔭᐅᔪᑦ ᐸᕐᓇᐅᑎᓕᐅᕈᑕᐅᔪᓐᓇᕐᓂᖅᓴᐅᓂᐊᕐᐳᑦ ᓄᓇᓕᓐᓄᑦ, ᑐᑭᓯᐅᒪᔾᔪᑎᖃᑦᓯᐊᓕᕐᓗᑎᓪᓗ ᐃᒡᓗᓕᐅᕈᑎᒃᓴᓄᑦ ᐱᖁᑎᒃᓴᓕᐅᕈᑎᒃᓴᓄᓪᓗ ᑐᑭᓯᐅᒪᔭᐅᑦᓯᐊᕐᓂᖅᓴᐅᓕᕐᓗᓂᓗ ᓄᓇᐅᑉ ᐃᓗᐊᓂ ᖁᐊᒪᔮᖑᓂᖓ ᖃᓄᐃᑦᑐᒻᒪᕆᐅᒻᒪᖔᑦ.
2009-10-ᒧᓪᓗ ᐅᔭᕋᒃᓴᔭᓕᕆᓂᕐᒧᑦ ᐱᓕᕆᐊᒃᓴᐅᓂᐊᕐᑐᑦ ᑮᓇᐅᔭᖃᖅᑎᑕᐅᓂᐊᕐᐳᑦ ᐅᐸᓗᖓᐃᔭᐅᑎᒃᓴᓄᑦ ᑮᓇᐅᔭᖃᕈᑕᐅᔪᓂᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᕆᔭᐅᔪᓂ. ᑲᓇᑕᒥ ᐱᕙᓪᓕᐊᔪᓕᕆᔾᔪᑎᒃᓴᓄᑦ ᐸᕐᓇᐅᑎ (ᑮᓇᐅᔭᒃᓴᐃᑦ 2009-ᒧᑦ) ᓄᑖᓂᒃ ᑮᓇᐅᔭᖃᕐᑎᑦᓯᒋᐊᓕᓚᐅᕐᐳᑦ ᐊᑐᖅᑕᐅᔪᒃᓴᐅᓂᐊᕐᑐᓂᒃ ᑕᓪᓕᒪᓄᑦ ᐅᑭᐅᓄᑦ ᐊᑭᖃᕐᑎᓪᓗᒋᑦ $90-ᒥᓕᔭᓂᒃ. ᑮᓇᐅᔭᐃᑦ ᐊᑐᐃᓐᓇᐅᑎᑕᐅᔪᑦ ᐊᔾᔨᒌᒃᑎᑕᐅᓗᑎᒃ ᐊᕕᒃᑐᖅᑕᐅᓯᒪᓂᐊᕐᐳᑦ ᐱᖓᓱᓂ ᓄᓇᕗᑦ ᐊᕕᒃᑐᖅᓯᒪᓂᖏᓐᓄᑦ ᐊᑐᖅᑕᐅᔪᒃᓴᐅᓗᑎᒃ.
ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᐅᐸᓗᖓᐃᔭᐅᑎᒃᓴᖅ ᐊᐅᓚᑕᐅᓂᐊᕐᐳᑦ ᑲᓇᑕᒥ-ᓄᓇᕗᒥᓗ ᐅᔭᕋᒃᓴᔭᓕᕆᔨᒃᑯᑦ ᑎᑎᕋᕐᕕᖓᓐᓄᑦ, ᓄᑖᖑᑎᓪᓗᒍ ᓴᖅᑭᑕᐅᓚᐅᕐᑐᖅ ᐱᔨᒃᓯᕋᖅᑎᐅᖁᓪᓗᒍ ᓯᕗᒃᑲᑕᐃᓂᕐᒥᒃ ᓴᖅᑭᑎᑦᓯᔨᐅᓗᑎᓪᓗ ᑲᓇᑕᐅᑉ ᒐᕙᒪᒃᑯᖏᑦᑕ ᐱᕙᓪᓕᐊᔪᓕᕆᔾᔪᑎᖏᓐᓂᑦ ᓄᓇᕗᒥ, ᐊᑐᐊᒐᒃᓴᓕᐅᖅᑎᐅᓗᑎᒃ, ᖃᐅᔨᓴᖅᑎᐅᓗᑎᒃ ᐃᑲᔪᖅᑎᐅᓗᑎᓪᓗ. ᑖᓐᓇ ᐅᖃᐅᓯᐅᓚᐅᕐᑐᖅ ᓇᓗᓇᐃᖅᓯᒋᐊᕈᑕᐅᒃᑲᓐᓂᕐᐳᖅ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᐊᖃᕈᒪᓂᖏᓐᓂᑦ ᐅᑭᐅᖅᑕᖅᑐᒥ ᐅᐸᓗᖓᐃᔭᐅᑎᒃᓴᖅ ᑲᔪᓯᔪᓐᓇᖁᓪᓗᒍ ᓴᖅᑭᐅᒪᑎᑦᓯᒋᐊᕈᑕᐅᓗᓂ ᑲᓇᑕ ᐊᐅᓚᑦᓯᓂᖃᕐᓂᖓᓂᒃ ᐅᑭᐅᖅᑕᖅᑐᒥᐅᓂᒃ, ᓴᐳᓐᓂᐊᖅᑕᐅᖁᓪᓗᒋᑦ ᐅᑭᐅᖅᑕᖅᑑᑉ ᐊᕙᑎᐊᓂ ᐱᖁᑎᑐᖃᐃᑦ, ᓴᖅᑭᐅᒪᑎᑦᓯᒋᐊᕈᑕᐅᓗᓂ ᐃᓄᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ ᐱᓕᕆᐊᒃᓴᓂᒃ ᐊᒻᒪᓗ ᐋᖅᑭᒋᐊᕈᑕᐅᓗᓂ ᐅᑭᐅᖅᑕᖅᑑᑉ ᒐᕙᒪᓕᕆᓂᖅᑎᒍᑦ ᐊᐅᓚᑕᐅᓂᖓᓂᒃ.