ᓕᐅᓇ ᐊᒡᓘᒃᑲᖅ ᓂᕈᐊᖅᑕᐅᒋᐊᓐᖓᓚᐅᖅᐳᖅ ᑭᒡᒐᖅᑐᐃᖁᓪᓗᒍ ᓄᓇᕗᒥᐅᓂᑦ ᐱᖁᔭᓕᐅᕐᕕᔾᔪᐊᒥ ᐅᑐᐱᕆ 2008-ᖑᑎᓪᓗᒍ. ᐅᑐᐱᕆ 30-ᖑᑎᓪᓗᒍ ᓯᕗᓪᓕᖅᐸᐅᓪᓗᓂ ᐃᓅᓪᓗᓂ ᐊᖏᖅᑎᑕᐅᓚᐅᖅᐳᖅ ᒐᕙᒪᑐᖃᒃᑯᑦ ᓯᕗᓕᖅᑎᖏᓐᓄᑦ.
ᑲᓇᑕᒧᑦ ᓂᕈᐊᖅᑕᐅᓇᓱᓚᐅᖅᑎᓐᓇᒍ ᓕᐅᓇ ᐱᔨᑦᑎᕋᓚᐅᖅᐳᖅ ᓄᓇᕘᒧᑦ ᒪᓕᒐᓕᐅᕐᕕᒻᒥ ᒪᓕᒐᓕᐅᖅᑎᒋᔭᐅᓪᓗᓂ ᓇᑦᑎᓕᒻᒥ (ᐅᖅᓱᖅᑑᖅ ᐊᒻᒪ ᑕᓗᖅᔪᐊᖅ).
ᒪᓕᒐᓕᐅᖅᑎᐅᑎᓪᓗᒍ ᓂᕈᐊᖅᑕᐅᓯᒪᓚᐅᕆᕗᖅ ᓄᓇᕘᑉ ᓯᕗᓕᖅᑎᖏᓐᓄᑦ. ᑲᒪᒋᔭᖃᕆᐊᓐᖓᓚᐅᖅᐳᖅ ᑮᓇᐅᔭᓕᕆᓂᕐᒧᑦ ᒥᓂᔅᑕᐅᓪᓗᓂ ᐊᒻᒪ ᒪᓕᒐᓕᐅᕐᕕᒻᒧᑦ ᐃᒃᓯᕙᐅᑕᕆᔭᐅᓪᓗᓂ ᒥᓂᔅᑕᓐᖑᖅᑐᓂᓗ ᑭᖑᓂᐊᒍᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᐊᒻᒪ ᐃᓄᓕᕆᓂᕐᒧᑦ ᐊᒻᒪᓗ ᒥᓂᔅᑕᐅᓚᐅᕆᓪᓗᓂ ᐊᕐᓇᐃᑦ ᖃᓄᐃᓕᖓᓂᖏᓐᓄᑦ.
ᓕᐅᓇ ᐃᓅᓯᓕᒫᑲᓴᖓᓂ ᐃᖅᑲᓇᐃᔭᑯᑖᖅᓯᒪᕗᖅ ᒐᕙᒪᒃᑯᓐᓂ. ᓂᕈᐊᖅᑕᐅᓚᐅᖅᑎᓐᓇᒍ ᓕᐅᓇ ᐃᖅᑲᓇᐃᔭᖃᑦᑕᓚᐅᖅᐳᖅ ᐊᔾᔨᒌᓐᖏᑦᑐᓂᑦ ᒐᕙᒪᒃᑯᓐᓂ ᓄᓇᑦᑎᐊᕐᒥ ᐊᒻᒪ ᓄᓇᕘᒥ, ᒪᓕᒐᓕᐅᕐᕕᒻᒧᑦ ᑎᑎᕋᖅᑎᒧᑦ ᑐᓪᓕᕆᔭᐅᓪᓗᓂ, ᒥᓂᔅᑕᒧᑦ ᑐᓪᓕᕆᔭᐅᓪᓗᓂ ᐃᓕᖅᑯᓯᓕᕆᔨᒃᑯᓐᓄᑦ, ᒥᓂᔅᑕᒧᑦ ᑐᓪᓕᕆᔭᐅᓪᓗᓂ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᐊᒻᒪᓗ ᒥᓂᔅᑕᒧᑦ ᑐᓪᓕᐊᓄᑦ ᐃᑲᔪᖅᑎᐅᓪᓗᓂ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᐊᒻᒪ ᒐᕙᒪᐅᖃᑎᒌᑦᑐᓕᕆᔨᒃᑯᓐᓄᑦ.
ᐱᓕᕆᑎᓪᓗᒍ ᒐᕙᒪᑐᖃᒃᑯᓐᓂ, ᐅᑭᐅᖅᑕᖅᑑᑉ ᒐᕙᒪᖏᓐᓂ, ᐃᖃᓗᑦᑑᑦᑎᐊᑉ ᓄᓇᓕᖓᓐᓂ ᒐᕙᒪᖏᓐᓂ ᑲᑎᒪᔨᐅᖃᑕᐅᓚᐅᖅᑐᓂ ᐅᑭᐅᓂᑦ ᐱᖓᓲᔭᖅᑐᓂᑦ, ᐃᑲᕐᕋᒐᔭᓐᓂᑦ ᐊᑭᓕᖅᓱᖅᑕᐅᓇᓂ ᐱᓕᕆᓯᒪᓪᓗᓂ ᓄᓇᓕᓐᓂᑦ ᐊᒻᒪ ᑲᑎᒪᔨᐅᖃᑕᐅᓯᒪᓪᓗᓂ ᐊᔾᔨᒌᓐᖏᑦᑐᓂᑦ ᓲᕐᓗ ᓯᓚᑦᑐᓴᕐᕕᒃᑯᓐᓂ, ᓄᓇᕘᒧᑦ ᐊᑦᑐᖅᑕᐅᔪᓕᕆᔨᒃᑯᓐᓂ ᐊᒻᒪᓗ ᓄᓇᑦᑎᐊᕐᒥ ᑭᓪᓕᓯᓂᐊᕐᓂᕐᒧᑦ ᐱᓕᕆᕕᒻᒥ; ᓕᐅᓇ ᐊᒃᓱᕈᐃᓐᓇᖃᑦᑕᖅᓯᒪᕗᖅ ᐃᓄᓐᓄᑦ ᑐᕌᖓᔪᓂᑦ ᓲᖃᐃᒻᒪ ᐱᕈᖅᓴᖅᑕᐅᓪᓗᓂ ᐅᑉᐱᕆᓚᐅᕐᒪᒋᑦ.
ᓕᐅᓇ ᐱᕈᖅᓴᓚᐅᖅᐳᖅ ᑖᒻ ᐸᐃᒥ, ᑕᓗᖅᔪᐊᕐᒥ ᐊᒻᒪ ᐅᖅᓱᖅᑑᒥ. ᑲᑎᑎᑕᐅᓯᒪᕗᖅ ᐅᕌᐱ ᒪᒃᓃᐅᓪᒧᑦ ᐊᒻᒪ ᐃᕐᓂᖃᖅᑐᓂ ᑰᐸᒥᒃ.
