ᐅᑐᐱᕆ 14ᖑᑎᓪᓗᒍ, ᓄᓇᕗᒥᐅᑦ ᓂᕈᐊᓚᐅᖅᐳᑦ ᐅᕙᓐᓂᒃ ᑭᒡᒐᖅᑐᐃᔨᒋᔭᐅᖁᓪᓗᖓ. ᐅᐱᒍᓱᒻᒪᕆᑉᐳᖓ ᑕᑎᖃᕈᒪᓂᑦᑎᓐᓂᑦ ᐅᕙᓐᓂᒃ ᐊᒻᒪ ᖁᔭᓕᓪᓗᖓᓗ ᐱᕕᒃᓴᖃᖅᑎᑕᐅᔪᓐᓇᕋᒪ ᑕᒪᑐᒥᙵ ᖁᕕᐊᒋᔭᕐᓂᒃ.
ᓂᕈᐊᖅᑕᐅᓇᓱᓐᓂᓕᒫᓐᓂ ᐅᖃᖃᑎᖃᕈᓐᓇᖅᓯᓚᐅᖅᐳᖓ ᕼᐊᓐᓇᓚᒐᓴᕐᓂᑦ ᐃᓄᓐᓂᑦ. ᐆᒥᖓ ᑐᓴᖃᑦᑕᓚᐅᖅᑕᕋ ᓄᓇᕘᒥᐅᓂᑦ ᐊᔾᔨᒌᐸᓘᖃᑦᑕᓚᐅᖅᐳᖅ; ᓄᓇᕘᖃᕈᒪᕗᒍᑦ ᐱᕈᐃᓐᓇᕐᓂᐊᖅᑐᒥᒃ ᓯᕗᒧᐊᖏᓐᓇᕐᓂᐊᖅᑐᒥᓪᓗ; ᓄᓇᓕᖁᑎᖃᕈᒪᕗᒍᑦ ᓴᐃᓕᓇᖅᑐᓂᑦ, ᐊᑦᑕᓇᖅᑕᐃᓕᒋᐊᖅᑎᑕᐅᓯᒪᔪᓂᑦ ᐊᒻᒪ ᓴᓗᒪᔪᓂᑦ. ᓄᓇᕘᖃᕈᒪᕗᒍᑦ ᓯᕗᓂᒃᓴᑦᑎᓐᓂ ᓴᓇᔪᓐᓇᕐᓗᑕ ᖁᕕᐊᒋᓂᐊᖅᑕᑦᑎᓐᓂ, ᐃᓚᑦᑎᓄᓪᓗ ᖁᕕᐊᒋᔭᐅᓂᐊᖅᑐᓂ ᐊᒻᒪᓗ ᐃᓄᑐᖃᖁᑎᑦᑎᓐᓄᑦ ᖁᕕᐊᒋᔭᐅᓂᐊᖅᑐᓂ.
ᓂᕈᐊᕐᓂᕆᔭᓯ ᐅᕙᓐᓂᒃ ᓂᕈᐊᓚᐅᖅᐳᓯ ᑲᓐᓲᕙᑎᕝᑯᓐᓂᑦ, ᑖᒃᑯᐊᓗ ᓯᑏᕙᓐ ᕼᐋᐸᒥᒃ ᓯᕗᓕᖅᑎᖃᖅᑐᑎᑦ ᒐᕙᒪᐅᖁᓪᓗᓯᐅᒃ ᑭᒡᒐᖅᑐᐃᓛᖑᒍᓐᓇᕋᓱᒋᓪᓗᒋᑦ ᓯᕗᓂᕆᔪᒪᔭᑦᑎᓐᓄᑦ. ᐱᒃᑯᒍᓱᒻᒪᕆᑉᐳᖓ ᐃᓚᒋᔭᐅᓂᓐᓂ ᐳᕋᐃᒻ ᒥᓂᔅᑕᐅᑉ ᒥᓂᔅᑕᖁᑎᖏᓐᓄᑦ ᐊᒻᒪᓗ ᐅᕙᒃᑯᓪᓕ ᐅᑭᐅᖅᑕᖅᑐᖅ ᓴᙱᔪᒥᒃ ᓂᐱᖃᖁᓂᐊᖅᑐᒍ ᐋᑐᐊᒥ ᑕᒪᒃᑯᐊ ᐱᒻᒪᕆᐅᒋᔭᑦᑎᓐᓂᑦ ᐊᙳᑎᓇᓱᒃᑎᓪᓗᑕ.
ᖁᔭᓐᓇᒦᕈᒪᕗᖓ ᑭᒃᑯᓕᒫᓂᑦ ᓂᕈᐊᕆᐊᖅᑐᓚᐅᖅᑐᓂᑦ ᓂᕈᐊᕐᓂᐅᓚᐅᖅᑐᒥ ᐊᒻᒪ ᐃᖅᑲᐃᑎᔪᒪᓪᓗᓯ ᓂᕈᐊᖃᑦᑕᕐᓂᐅᑉ ᐱᒻᒪᕆᐅᓂᖓᓂᒃ. ᓄᖅᑲᔪᐃᑦᑑᓚᐅᖅᐳᖓ ᑕᐃᒪᙵᓂᒃ ᐋᑐᐊᓕᐊᓚᐅᕋᒪ ᐊᒻᒪ ᐊᒃᓱᕈᒃᑲᐅᓛᖑᓯᒪᔫᒍᒪᓪᓗᖓ ᒪᓕᒐᓕᐅᖅᑎᐅᓂᕐᒧᑦ ᐅᑭᐅᖅᑕᖅᑐᒥᒃ ᐱᖁᔭᓕᐅᕐᕕᔾᔪᐊᒥ.
ᑕᒪᓐᓇ ᓂᕈᐊᕐᓂᐅᓚᐅᖅᑐᖅ ᓂᕆᐅᑦᑎᐊᕈᑎᒋᕙᕋ ᓄᓇᕘᑦᑕ ᐊᒻᒪ ᑲᓇᑕᖁᑎᑦᑕ ᓯᕗᓂᒃᓴᕆᓂᐊᖅᑕᖓᓂᒃ. ᐱᓇᓱᓕᕇᖅᓯᒪᕗᖓ ᓴᖅᑭᑎᑦᑎᓪᓗᖓᓗ ᐊᑐᖅᑕᐅᔪᓐᓇᖅᑐᓂᑦ ᓄᓇᕘᒥᐅᓄᑦ ᐊᒻᒪ ᑲᓇᑕᒥᐅᓄᑦ. ᐋᑐᐊᒦᓐᓂᕆᓂᐊᖅᑕᕐᓂ ᑲᔪᓰᓐᓇᕐᓂᐊᖅᐳᖓ ᑭᒡᒐᖅᑐᐃᓂᕆᔭᕐᓂᑦ ᓄᓇᕘᒥᐅᓕᒫᑦᑎᐊᓂᑦ!
ᐅᓪᓗᖃᑦᑎᐊᕐᓂᐊᖅᐳᓯ,
ᒥᓂᔅᑕ ᓕᐅᓇ ᐊᒡᓘᒃᑲᖅ, ᒪᓕᒐᓕᐅᖅᑎ
ᓄᓇᕘᒧᑦ
ᒥᓂᔅᑕ ᑲᒪᒋᔭᓕᒃ ᐅᑭᐅᖅᑕᖅᑐᒧᑦ ᐊᒻᒪ ᐋᓐᓂᐊᖅᑕᐃᓕᒪᔪᓕᕆᔨᒃᑯᓐᓄᑦ
